క్రైమ్ మిర్రర్ : గుంటూరు జిల్లాలో దారుణ ఘటన చోటుచేసుకుంది. కుటుంబ కలహాలు, అనుమానాలు చివరకు ఓ మహిళ ప్రాణాలను బలితీసుకున్నాయి. తెనాలి మండలం అంగలకుదురు గ్రామంలో ఓ వ్యక్తి తన భార్యను కిరాతకంగా హత్య చేసి అనంతరం పోలీస్ స్టేషన్కు వెళ్లి లొంగిపోయిన ఘటన స్థానికంగా తీవ్ర కలకలం రేపింది. స్థానికులు, పోలీసులు తెలిపిన వివరాల ప్రకారం.. అంగలకుదురుకు చెందిన మన్నే నరేంద్రబాబు, సంధ్యారాణి భార్యాభర్తలు. కొంతకాలంగా వీరిద్దరి మధ్య కుటుంబ సమస్యల కారణంగా తరచూ గొడవలు జరుగుతున్నట్లు తెలుస్తోంది. ఈ క్రమంలోనే భార్య ప్రవర్తనపై నరేంద్రబాబు అనుమానం పెంచుకున్నట్లు పోలీసులు ప్రాథమికంగా భావిస్తున్నారు.
ఈ నేపథ్యంలోనే ఆగ్రహానికి లోనైన నరేంద్రబాబు తన భార్య సంధ్యారాణిపై దాడి చేసి హత్య చేసినట్లు సమాచారం. ఘటన అనంతరం నిందితుడు నేరుగా తెనాలి పోలీస్ స్టేషన్కు వెళ్లి జరిగిన విషయాన్ని తెలియజేసి లొంగిపోయాడు. సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిస్థితిని పరిశీలించారు. మృతురాలు సంధ్యారాణి మృతదేహాన్ని స్వాధీనం చేసుకుని పోస్టుమార్టం నిమిత్తం తెనాలి ప్రభుత్వ ఆస్పత్రికి తరలించారు. ఘటనకు సంబంధించిన ఆధారాలను సేకరించి దర్యాప్తు ప్రారంభించారు.
ప్రస్తుతం పోలీసుల అదుపులో ఉన్న నిందితుడు నరేంద్రబాబును విచారిస్తున్నారు. హత్యకు అసలు కారణాలు, ఘటనకు దారితీసిన పరిస్థితులపై పోలీసులు అన్ని కోణాల్లో ఆరా తీస్తున్నారు. మరోవైపు సంధ్యారాణి కుటుంబ సభ్యులు తీవ్ర విషాదంలో మునిగిపోయారు. తమ కుమార్తెను కోల్పోయిన బాధలో కన్నీరుమున్నీరుగా విలపిస్తున్నారు. నిందితుడికి కఠిన శిక్ష విధించాలని వారు డిమాండ్ చేస్తున్నారు. కుటుంబ సమస్యలు, అనుమానాలు పరిష్కరించుకోకుండా తీవ్ర నిర్ణయాలకు దారితీస్తే ఎంతటి విషాదాలు చోటుచేసుకుంటాయో ఈ ఘటన మరోసారి చాటిచెబుతోందని స్థానికులు ఆవేదన వ్యక్తం చేస్తున్నారు.
also read : దారుణం : తల్లితో కలిసి తండ్రిని హతమార్చిన కుమారుడు
