తెలంగాణకు చెందిన 53 ఏళ్ల అరుణ్కుమార్ తివారి జీవితాంతం సాహసయాత్రలను ప్రేమించిన వ్యక్తిగా గుర్తింపు పొందారు. ఐటీ రంగంలో పనిచేస్తూనే పర్వతారోహణపై అపారమైన ఆసక్తి పెంచుకున్న ఆయన.. ప్రపంచంలోని అత్యంత ప్రమాదకరమైన శిఖరాల్లో ఒకటైన మౌంట్ ఎవరెస్ట్ను అధిరోహించాలనే కలను ఎన్నో సంవత్సరాలుగా వెంట తీసుకెళ్లారు. ఇటీవల ఆయన ఆ కలను నిజం చేసుకున్నారు. అయితే విజయోత్సాహంతో తిరుగు ప్రయాణం ప్రారంభించిన కొద్ది సేపటికే విషాదం చోటుచేసుకుంది. నేపాల్కు చెందిన యాత్ర నిర్వహణ సంస్థ ‘పయనీర్ అడ్వెంచర్స్’ వెల్లడించిన వివరాల ప్రకారం, ఎవరెస్ట్ శిఖరాన్ని విజయవంతంగా అధిరోహించిన అనంతరం హిల్లరీ స్టెప్ సమీపంలో అరుణ్కుమార్ తివారి తీవ్ర అస్వస్థతకు గురయ్యారు. వెంటనే ఆయనకు నలుగురు షెర్పాలు సహాయం అందించినప్పటికీ ప్రాణాలు నిలబెట్టలేకపోయారు. దీంతో ఆయన అక్కడికక్కడే మరణించినట్లు వెల్లడించారు.
ఈ ఘటన తర్వాత మరింత భావోద్వేగానికి గురిచేసిన విషయం ఏమిటంటే, అరుణ్కుమార్ తివారి మృతదేహాన్ని ఎవరెస్ట్పైనే వదిలివేయాలని ఆయన కుటుంబ సభ్యులు తీసుకున్న నిర్ణయం. కుటుంబ సభ్యుల మాటల్లో, హిమాలయాలు మరియు ఎవరెస్ట్ పర్వతం పట్ల తివారికి అపారమైన భక్తి, అనుబంధం ఉండేదని తెలిపారు. “ఎవరెస్ట్ను మేము పరమశివుడి నిలయంగా భావిస్తున్నాం. అక్కడే ఆయనకు అంతిమ విశ్రాంతి లభించడం మంచిదని భావించాం” అని తివారి బావమరిది సుధీర్ ఉపాధ్యాయ పేర్కొన్నారు. మృతదేహాన్ని పర్వతం పైభాగం నుంచి కిందకు తీసుకురావడం అత్యంత ప్రమాదకరమైన పని మాత్రమే కాకుండా, అప్పటికే శరీరం తీవ్రంగా దెబ్బతినే అవకాశం ఉంటుందని కూడా కుటుంబం అభిప్రాయపడింది. ఈ నిర్ణయం కేవలం ఖర్చు కారణంగా తీసుకున్నది కాదని, తివారి స్వయంగా కూడా ఇలాంటి పరిస్థితుల్లో ఇదే కోరుకునేవారని కుటుంబ సభ్యులు తెలిపారు.
అరుణ్కుమార్ తివారి సాధారణ పర్వతారోహకుడు కాదు. ప్రపంచవ్యాప్తంగా ఎన్నో క్లిష్టమైన శిఖరాలను విజయవంతంగా అధిరోహించిన అనుభవజ్ఞుడిగా ఆయనకు గుర్తింపు ఉంది. మౌంట్ ఎల్బ్రస్, డెనాలి, అకాంకాగువా వంటి ప్రముఖ పర్వతాలను అధిరోహించి తన సాహసస్ఫూర్తిని నిరూపించారు. 2025లో కూడా మౌంట్ ఎవరెస్ట్ను అధిరోహించేందుకు ప్రయత్నించినప్పటికీ, ఆరోగ్య సమస్యల కారణంగా 7,200 మీటర్ల ఎత్తు వరకు వెళ్లి వెనుదిరగాల్సి వచ్చింది. అయినప్పటికీ తన కలను వదులుకోకుండా ఈసారి మరింత పట్టుదలతో ఎవరెస్ట్ యాత్ర ప్రారంభించారు. చివరకు ప్రపంచ అత్యున్నత శిఖరాన్ని అధిరోహించినప్పటికీ, తిరుగు ప్రయాణంలో అనారోగ్యంతో ప్రాణాలు కోల్పోయారు. ఆయనకు భార్యతో పాటు ఇద్దరు కుమార్తెలు ఉన్నారు.
ఇదే ఎవరెస్ట్ యాత్రలో అమెరికాలో నివసిస్తున్న సందీప్ ఆరే అనే మరో పర్వతారోహకుడు కూడా ప్రాణాలు కోల్పోయినట్లు సమాచారం. మంచు కారణంగా చూపు దెబ్బతినే “స్నో బ్లైండ్నెస్” సమస్యతో పాటు తీవ్రమైన అలసట కారణంగా క్యాంప్-3 సమీపంలో అతను మరణించినట్లు యాత్ర నిర్వాహకులు వెల్లడించారు. అయితే అతని మృతదేహాన్ని షెర్పాలు క్యాంప్-2 వరకు తీసుకురావడంతో హెలికాప్టర్ సాయంతో తరలించే అవకాశం లభించింది.
మౌంట్ ఎవరెస్ట్లో 8,000 మీటర్లకు పైబడిన ప్రాంతాన్ని సాధారణంగా “డెత్ జోన్”గా పిలుస్తారు. అక్కడ ఆక్సిజన్ స్థాయిలు చాలా తక్కువగా ఉండటంతో మనుషులు ఎక్కువసేపు బతకడం దాదాపు అసాధ్యమవుతుంది. ముఖ్యంగా హిల్లరీ స్టెప్ వంటి ప్రాంతాల్లో మంచు తుఫాన్లు, హిమపాతాలు, తీవ్రమైన గాలులు, గడ్డకట్టే చలి ఎప్పుడైనా ప్రాణాపాయం కలిగించగలవు. ఇలాంటి పరిస్థితుల్లో మృతదేహాలను తరలించడం మరింత ప్రమాదకరంగా మారుతుంది. సాధారణంగా ఒక మృతదేహాన్ని కిందకు తీసుకురావడానికి 8 నుంచి 12 మంది అనుభవజ్ఞులైన షెర్పాలు, అదనపు ఆక్సిజన్ సిలిండర్లు, ప్రత్యేక పరికరాలు అవసరం అవుతాయి. ఈ ప్రక్రియకు అనేక రోజులు పట్టడమే కాకుండా దాదాపు రూ.71 లక్షల వరకు ఖర్చవుతుందని నిపుణులు చెబుతున్నారు. ఈ కారణాల వల్లే ఎవరెస్ట్పై మరణించిన పలువురు పర్వతారోహకుల మృతదేహాలు ఇప్పటికీ అక్కడే ఉండిపోతున్నాయని పర్వతారోహణ వర్గాలు పేర్కొంటున్నాయి.
ALSO READ: ఇరాన్పై మరోసారి అమెరికా మెరుపు దాడి..!
