తమిళనాడులోని చెన్నై నగరంలో సంచలనానికి దారి తీసిన ఘోర ఘటన వెలుగులోకి వచ్చింది. నగరంలోని ప్యారిస్ ప్రాంతంలో ఉన్న ఓ దుకాణంలో పనిచేస్తున్న మహిళను లక్ష్యంగా చేసుకుని గుర్తు తెలియని వ్యక్తి అనుమానాస్పద పార్శిల్ అందజేయడం కలకలం రేపింది. సాధారణంగా కనిపించిన ఆ పార్శిల్ లోపల ఉన్న వస్తువులు చూసి అక్కడున్నవారు ఒక్కసారిగా షాక్కు గురయ్యారు. విషయం తెలుసుకున్న పోలీసులు ఘటనపై కేసు నమోదు చేసి దర్యాప్తు ప్రారంభించారు.
పోలీసుల కథనం ప్రకారం.. వ్యాసర్పాడికి చెందిన శ్రుతి అనే మహిళ ప్యారిస్ ప్రాంతంలోని ఓ దుకాణంలో ఉద్యోగం నిర్వహిస్తోంది. రోజు వారి విధుల్లో నిమగ్నమై ఉన్న సమయంలో ఓ వ్యక్తి దుకాణం వద్దకు వచ్చి ఒక పార్శిల్ తీసుకొచ్చాడు. దానిని నేరుగా ఆమెకు ఇవ్వకుండా అక్కడున్న భద్రతా సిబ్బందికి అందజేసి, శ్రుతికి ఇవ్వాలని చెప్పి అక్కడి నుంచి వెళ్లిపోయాడు. ఆ వ్యక్తి ప్రవర్తనలో అనుమానం కలిగే అంశాలు ఉన్నప్పటికీ అప్పటికి ఎవరూ పెద్దగా పట్టించుకోలేదు.
భద్రతా సిబ్బంది ఆ పార్శిల్ను శ్రుతికి అందజేయగా ఆమె దానిని స్వీకరించేందుకు నిరాకరించినట్లు సమాచారం. తాను ఎలాంటి పార్శిల్ ఆర్డర్ చేయలేదని, ఎవరి నుంచి వస్తుందో తెలియదని చెప్పడంతో విషయం షాప్ యజమాని దృష్టికి వెళ్లింది. అనుమానం కలిగిన యజమాని అందరి సమక్షంలో ఆ పార్శిల్ను తెరిచి చూడాలని నిర్ణయించుకున్నారు. పార్శిల్ తెరిచిన వెంటనే అక్కడి వాతావరణం ఒక్కసారిగా మారిపోయింది. లోపల మనిషి పుర్రె, కొన్ని ఎముకలు, విభూది కనిపించడంతో అక్కడున్నవారు తీవ్ర దిగ్భ్రాంతికి గురయ్యారు.
ఈ దృశ్యం చూసిన ఉద్యోగులు, కస్టమర్లు భయాందోళనలకు గురయ్యారు. విషయం వెంటనే స్థానిక పోలీసులకు తెలియజేశారు. పోలీసులు సంఘటన స్థలానికి చేరుకుని ఆ పార్శిల్ను స్వాధీనం చేసుకుని ప్రాథమిక విచారణ చేపట్టారు. మొదటి దశలో ఇది ఎవరో ఉద్దేశపూర్వకంగా చేసిన బెదిరింపు చర్యగా భావిస్తున్నారు.
దర్యాప్తులో భాగంగా శ్రుతి కుటుంబానికి, అదే దుకాణంలో పని చేస్తున్న దినేశ్ కుటుంబానికి మధ్య కొంతకాలంగా వివాదాలు ఉన్నట్లు పోలీసులు గుర్తించారు. వ్యక్తిగత విభేదాల నేపథ్యంలో శ్రుతిని భయపెట్టేందుకే ఈ చర్యకు పాల్పడి ఉండవచ్చని అనుమానం వ్యక్తం చేస్తున్నారు. ఈ కేసులో దినేశ్తో పాటు అతని ఇద్దరు స్నేహితులను అదుపులోకి తీసుకుని ప్రశ్నిస్తున్నారు. పార్శిల్లో లభించిన అవశేషాలు నిజంగా మానవ అవశేషాలేనా అన్నది నిర్ధారించేందుకు పరీక్షలు నిర్వహిస్తున్నారు.
ఈ ఘటన నగరంలో భయాందోళనలకు కారణమైంది. వ్యక్తిగత విభేదాలు ఇలాంటి ఘోర రూపం దాల్చడం ఆందోళన కలిగిస్తోంది. బాధితురాలి భద్రతకు తగిన చర్యలు తీసుకుంటున్నామని పోలీసులు వెల్లడించారు. పూర్తి వివరాలు వెలుగులోకి రావాల్సి ఉంది.
ALSO READ: Affair: ప్రియుడితో కలిసి భర్తను చంపిన భార్య