విజయవాడలో విషాదకర ఘటన చోటుచేసుకుంది. విధి నిర్వహణలో ఉన్న పోలీసు అధికారి అకస్మాత్తుగా గుండెపోటుకు గురై మృతి చెందారు. నున్న పోలీస్ స్టేషన్ సర్కిల్ ఇన్స్పెక్టర్గా విధులు నిర్వహిస్తున్న అహ్మద్ అలీ.. ఆదివారం బందోబస్తు విధుల్లో ఉండగానే తీవ్ర అస్వస్థతకు గురై ప్రాణాలు కోల్పోయారు.
సచివాలయ ఉద్యోగులు చేపట్టిన ఆందోళన కార్యక్రమం నేపథ్యంలో విజయవాడ నగరంలో పోలీసులు భారీగా భద్రతా ఏర్పాట్లు చేపట్టారు. ఇందులో భాగంగా గాంధీనగర్లోని ధర్నా చౌక్ వద్ద కూడా పోలీసులు బందోబస్తు నిర్వహించారు. ఈ విధుల్లో సీఐ అహ్మద్ అలీ తన సిబ్బందితో కలిసి పాల్గొన్నారు.
ఆందోళన ప్రాంతంలో పరిస్థితులను పర్యవేక్షిస్తున్న సమయంలో అహ్మద్ అలీకి ఒక్కసారిగా ఛాతిలో తీవ్ర నొప్పి వచ్చింది. దీంతో ఆయన అక్కడికక్కడే కుప్పకూలిపోయారు. వెంటనే తోటి పోలీసులు, అధికారులు స్పందించి ఆయనను చికిత్స కోసం విజయవాడలోని ఆంధ్రా హాస్పిటల్కు తరలించారు.
ఆసుపత్రి అత్యవసర విభాగంలో వైద్యులు చికిత్స అందించినప్పటికీ ఆయన పరిస్థితి విషమంగా మారింది. చివరకు చికిత్స పొందుతూ అహ్మద్ అలీ మృతి చెందారు.
విధుల్లో ఉండగానే సీఐ ప్రాణాలు కోల్పోవడంతో పోలీసు శాఖలో విషాదం నెలకొంది. అహ్మద్ అలీ మృతితో ఆయన కుటుంబ సభ్యులు తీవ్ర విషాదంలో మునిగిపోయారు. ఆయనతో కలిసి పనిచేసిన అధికారులు, సిబ్బంది దిగ్భ్రాంతికి గురయ్యారు. అంకితభావంతో విధులు నిర్వహించే అధికారిని కోల్పోయామని సహచరులు ఆవేదన వ్యక్తం చేశారు. పోలీసు ఉన్నతాధికారులు సైతం అహ్మద్ అలీ మృతికి సంతాపం తెలిపారు.
also read: కష్టాలను అధిగమించిన నివేదా పేతురాజ్: డిప్రెషన్ నుండి ఆదర్శ కుటుంబం వరకు