అనంతపురం జిల్లాలోని గుంతకల్లు పట్టణంలో అర్ధరాత్రి దొంగలు సాహసోపేతంగా దోపిడీకి యత్నించిన ఘటన తీవ్ర కలకలం రేపింది. నిత్యం రద్దీగా ఉండే ట్రావెల్స్ బంగ్లా సర్కిల్ సమీపంలోని ఎస్బీఐ ఏటీఎంను లక్ష్యంగా చేసుకున్న దుండగులు, ఏటీఎం యంత్రాన్ని పూర్తిగా ఎత్తుకెళ్లేందుకు ప్రణాళికాబద్ధంగా ప్రయత్నించారు. అర్ధరాత్రి సుమారు 2:30 గంటల సమయంలో బ్లాక్ కలర్ బొలెరో టెంపో వాహనంలో వచ్చిన ముగ్గురు వ్యక్తులు ఏటీఎం కేంద్రంలోకి చొరబడి ముందుగా అద్దాలను ధ్వంసం చేశారు. అనంతరం ఏటీఎం యంత్రానికి బలమైన తాడు కట్టి, బయట నిలిపిన బొలెరో వాహనం సాయంతో లాగి తీసుకెళ్లేందుకు ప్రయత్నించారు. అయితే ఈ క్రమంలో భారీ శబ్దాలు రావడంతో ఎదురుగా ఉన్న ఇంటి యజమాని నిద్రలేచి బయటకు వచ్చి పరిస్థితిని గమనించాడు.
ఏటీఎం యంత్రాన్ని బలవంతంగా లాక్కెళ్లేందుకు దుండగులు ప్రయత్నిస్తున్న దృశ్యాలను చూసిన ఆ వ్యక్తి వెంటనే అప్రమత్తమై గట్టిగా దొంగలు అంటూ కేకలు వేశాడు. దీంతో స్థానికులు మేల్కొనే అవకాశం ఉందని భావించిన దుండగులు తమ ప్రయత్నాన్ని మధ్యలోనే విరమించుకుని ఏటీఎం యంత్రాన్ని అక్కడే వదిలేసి బొలెరో వాహనంలో వేగంగా పరారయ్యారు. ఈ ఘటన మొత్తం అక్కడ ఏర్పాటు చేసిన సీసీ కెమెరాల్లో రికార్డు కావడంతో పోలీసులు కీలక ఆధారాలు సేకరించారు. ముగ్గురు వ్యక్తులు వాహనంలో వచ్చి ఏటీఎంను ఎత్తుకెళ్లేందుకు ప్రయత్నించిన దృశ్యాలు స్పష్టంగా నమోదైనట్లు సమాచారం.
బ్యాంకు వర్గాల ప్రకారం ఆ సమయంలో ఏటీఎం యంత్రంలో దాదాపు రూ.30 లక్షల నగదు ఉన్నట్లు తెలుస్తోంది. దుండగులు తమ యత్నంలో విఫలమవడంతో భారీ నష్టం తప్పిందని అధికారులు ఊపిరి పీల్చుకున్నారు. యంత్రం పూర్తిగా ఎత్తుకెళ్లి ఉంటే పెద్ద మొత్తంలో నగదు దోపిడీ జరిగే అవకాశం ఉండేదని భావిస్తున్నారు. స్థానికంగా ఈ ఘటన తీవ్ర ఆందోళనకు కారణమవగా, రాత్రి వేళల్లో భద్రతా ఏర్పాట్లపై కూడా ప్రశ్నలు తలెత్తుతున్నాయి.
ఇదే తరహా ఘటన సుమారు 2 నెలల క్రితం ధర్మవరంలో కూడా చోటుచేసుకుంది. అప్పట్లో కూడా కొందరు దుండగులు బొలెరో టెంపో వాహనంలో వచ్చి ఎస్బీఐ ఏటీఎం యంత్రానికి తాడు కట్టి లాక్కెళ్లారు. అనంతరం రాప్తాడు సమీపానికి తీసుకెళ్లి యంత్రాన్ని పగలగొట్టి అందులోని నగదును దోచుకుని, ఏటీఎం యంత్రాన్ని అక్కడే వదిలేసి పరారయ్యారు. ప్రస్తుతం గుంతకల్లులో జరిగిన ఘటన తీరు కూడా అదే విధంగా ఉండటంతో రెండు సంఘటనల వెనుక ఒకే ముఠా ఉండొచ్చని పోలీసులు అనుమానం వ్యక్తం చేస్తున్నారు. సీసీ కెమెరాల దృశ్యాలను పరిశీలిస్తూ దుండగుల కదలికలపై దృష్టి సారించిన పోలీసులు ప్రత్యేక బృందాలతో గాలింపు చర్యలు చేపట్టారు. త్వరలోనే నిందితులను గుర్తించి అరెస్టు చేస్తామని అధికారులు చెబుతున్నారు.
ALSO READ: ‘వర్క్ ఫ్రమ్ బైక్’ యువకుడికి సీపీ స్ట్రాంగ్ వార్నింగ్ (VIDEO)
