బీఆర్‌ఎస్‌ ప్రభుత్వం గతంలో అమలు చేసిన పథకాల విషయంలో తమ ప్రభుత్వం రాజకీయాలకు తావివ్వడం లేదని మంత్రి పొన్నం ప్రభాకర్‌ స్పష్టం చేశారు. ప్రజలకు ఉపయోగపడే మంచి పథకాలను గతంలో ఎవరు ప్రవేశపెట్టినా వాటిని కొనసాగించేందుకు తమ ప్రభుత్వం సిద్ధంగా ఉందన్నారు.
కల్యాణలక్ష్మి, షాదీముబారక్‌ పథకాలపై ఓ ప్రైవేటు వ్యక్తి న్యాయస్థానాన్ని ఆశ్రయించారని మంత్రి తెలిపారు. ఈ పరిణామం వెనుక రాజకీయ ఉద్దేశాలు ఉండొచ్చనే అనుమానాన్ని ఆయన వ్యక్తం చేశారు.
ప్రస్తుతం ఈ పథకాలకు సంబంధించి హైకోర్టులో స్టే ఉన్న నేపథ్యంలో, దాన్ని తొలగించేందుకు ప్రభుత్వం న్యాయపరమైన చర్యలు తీసుకుంటోందని పొన్నం తెలిపారు. స్టే ఎత్తివేయించిన అనంతరం పథకాలను గతంలో మాదిరిగానే కొనసాగించేందుకు ప్రభుత్వం ప్రయత్నిస్తోందని చెప్పారు.
అయితే ఈ అంశంపై బీఆర్‌ఎస్‌ నేతలు ప్రభుత్వంపై విమర్శలు చేయడాన్ని మంత్రి తప్పుబట్టారు. చిన్నకాలం పాటు ఉన్న న్యాయపరమైన అడ్డంకిని ఆధారంగా చేసుకుని రాజకీయ ఆరోపణలు చేయడం సరికాదని అన్నారు.
ప్రజా ప్రయోజనాలకు సంబంధించిన పథకాల విషయంలో రాజకీయాలకు అతీతంగా వ్యవహరిస్తామని మంత్రి పొన్నం స్పష్టం చేశారు.
also read: మరో ప్రాణం తీసిన చైనా మాంజా… బైక్‌పై వెళ్తుండగా విషాదం