ఆంధ్రప్రదేశ్ మాజీ ముఖ్యమంత్రి వైఎస్ జగన్ మోహన్ రెడ్డి పాలనా తీరుపై కేంద్ర మంత్రి, సీనియర్ బీజేపీ నేత శివరాజ్ సింగ్ చౌహాన్ తీవ్ర స్థాయిలో విరుచుకుపడ్డారు. జగన్ పాలనలో రాష్ట్రం సర్వనాశనం అయిందని, ఆయన చేసిన తప్పులకు రాష్ట్ర ప్రజలు ఆయనను ఎప్పటికీ క్షమించరని శివరాజ్ సింగ్ ఘాటుగా విమర్శించారు. బుర్రిపాలెంలో జరిగిన ఒక బహిరంగ సభలో పాల్గొన్న ఆయన మాట్లాడుతూ గత వైసీపి ప్రభుత్వ వైఫల్యాలను ఎండగట్టారు.
దేశంలోని నిరుపేదలందరికీ సొంతింటి కలను నెరవేర్చాలన్నది ప్రధానమంత్రి నరేంద్ర మోడీ సంకల్పాల్లో ఒకటని, అందులో భాగంగా ఏపీలోని పేదలకు కూడా కేంద్రం ఇళ్లు మంజూరు చేసిందని చౌహాన్ గుర్తుచేశారు. అయితే, కేంద్ర ప్రభుత్వం ఇళ్లు ఇచ్చేందుకు పూర్తిగా సిద్ధంగా ఉన్నప్పటికీ, అప్పటి ముఖ్యమంత్రి జగన్ మోహన్ రెడ్డి రాష్ట్ర ప్రభుత్వం తరఫున ఇవ్వాల్సిన మ్యాచింగ్ వాటాను ఇవ్వకుండా అడ్డుకున్నారని ఆయన ఆరోపించారు.
రాష్ట్ర వాటా నిధులు ఇవ్వడానికి నిరాకరించడం ద్వారా లక్షలాది మంది పేదల సొంతింటి కలలపై జగన్ ఉద్దేశపూర్వకంగానే నీళ్లు చల్లారని, తద్వారా రాష్ట్రాన్ని పూర్తిగా నాశనం చేశారని ఆయన మండిపడ్డారు. ఒక కేంద్ర మంత్రి స్థాయి వ్యక్తి, అదీ బీజేపీకి చెందిన సీనియర్ నేత ఈ స్థాయిలో జగన్ మోహన్ రెడ్డిని నేరుగా టార్గెట్ చేస్తూ విమర్శలు గుప్పించడం ఇప్పుడు రాష్ట్ర రాజకీయ వర్గాల్లో తీవ్ర చర్చనీయాంశంగా మారింది.
ర‌ష్యాలో క‌ల‌క‌లం….అంతుచిక్క‌ని వ్యాధితో ల్యాబ్ వ‌ర్క‌ర్ మృతి…!