ఏలూరు జిల్లాలోని జంగారెడ్డిగూడెం పట్టణంలో వెలుగుచూసిన బంగారం మాయం ఘటన తీవ్ర కలకలం రేపుతోంది. బ్యాంకులో తాకట్టు పెట్టిన బంగారం అత్యంత భద్రంగా ఉంటుందనే ఖాతాదారుల నమ్మకానికి ఈ సంఘటన పెద్ద దెబ్బగా మారింది. పశ్చిమ గోదావరి జిల్లా జంగారెడ్డిగూడెంలోని బ్యాంక్ ఆఫ్ బరోడా శాఖలో ఖాతాదారులు తాకట్టు పెట్టిన విలువైన బంగారు ఆభరణాలు కనిపించకపోవడంతో వందలాది మంది ఖాతాదారులు ఆందోళన వ్యక్తం చేస్తున్నారు. తమ జీవితకాల పొదుపులతో కొనుగోలు చేసిన బంగారం ఏమైందో తెలియక బాధిత కుటుంబాలు ఆవేదన వ్యక్తం చేస్తున్నాయి. బ్యాంకులో దాచిన ఆభరణాలే మాయమవుతున్నాయనే వార్త పట్టణమంతా వ్యాపించడంతో ఖాతాదారులు పెద్ద సంఖ్యలో బ్యాంకు వద్దకు చేరుకుని తమ బంగారం సురక్షితంగా ఉందో లేదో పరిశీలించాలని డిమాండ్ చేశారు.
స్థానిక ఎక్సైజ్ పోలీస్ స్టేషన్ సమీపంలోని బ్యాంక్ ఆఫ్ బరోడా శాఖలో గోల్డ్ లోన్ వ్యవహారాలను పర్యవేక్షిస్తున్న రాజు అనే ఉద్యోగి కొద్ది రోజులుగా విధులకు హాజరుకాకపోవడం అనుమానాలకు దారితీసింది. ఇదే సమయంలో శనివారం ముగ్గురు ఖాతాదారులకు చెందిన దాదాపు 30 కాసుల బంగారం కనిపించకపోయినట్లు సమాచారం బయటకు రావడంతో పరిస్థితి ఒక్కసారిగా ఉద్రిక్తంగా మారింది. ఈ విషయం సోమవారం ఉదయం మరింత విస్తృతంగా ప్రచారం కావడంతో తమ ఆభరణాలు కూడా సురక్షితంగా ఉన్నాయా లేదా అన్న ఆందోళనతో మిగిలిన ఖాతాదారులు బ్యాంకు వద్దకు భారీగా తరలివచ్చారు. పరిస్థితిని అదుపులోకి తీసుకురావడానికి జంగారెడ్డిగూడెం ఎస్సై వీరప్రసాద్ తన సిబ్బందితో అక్కడికి చేరుకుని భద్రతా చర్యలు చేపట్టారు. బ్యాంకు అధికారులతో చర్చించి ఖాతాదారులను టోకెన్ల ఆధారంగా లోపలికి పంపించే విధానాన్ని అమలు చేశారు. సోమవారం రాత్రి 7 గంటల వరకు దాదాపు 80 మంది ఖాతాదారులు తమ ఖాతాలకు సంబంధించిన బంగారం వివరాలను పరిశీలించగా, పలువురి ఆభరణాలు కనిపించకపోవడం ఆందోళనను మరింత పెంచింది.
ఈ ఘటనపై సమాచారం అందుకున్న బ్యాంకు ఉన్నతాధికారులు, ప్రత్యేక సిబ్బంది అత్యవసరంగా జంగారెడ్డిగూడెం శాఖకు చేరుకుని రికార్డులు, లాకర్లు, ఖాతా వివరాలను క్షుణ్ణంగా పరిశీలించారు. ప్రాథమిక విచారణలో సుమారు 40 కాసులకుపైగా బంగారం మాయమైనట్లు గుర్తించినట్లు సమాచారం వెలువడింది. జంగారెడ్డిగూడెంకు చెందిన సబ్బారపు శ్రీనివాసరావు తాకట్టు పెట్టిన 5 కాసుల నల్లపూసల గొలుసు పూర్తిగా కనిపించకపోవడం వెలుగులోకి వచ్చింది. నాగులగూడెంకు చెందిన సింహాద్రి గంగాధరరెడ్డి 13 కాసుల బంగారు వస్తువులను తాకట్టు పెట్టగా ప్రస్తుతం కేవలం 32 గ్రాములు మాత్రమే లభ్యమయ్యాయని, మిగిలిన 9 కాసుల బంగారం కనిపించలేదని అధికారులు గుర్తించారు. అదే గ్రామానికి చెందిన చిలుకూరి శ్రీనివాసరెడ్డి గత జనవరిలో తన 4 బంగారు వస్తువులపై తీసుకున్న రుణాన్ని పునరుద్ధరించుకోగా, ప్రస్తుతం తనిఖీల్లో 8 కాసుల విలువైన 3 వస్తువులు కనిపించకుండా పోయి ఒక్క వస్తువు మాత్రమే మిగిలినట్లు వెల్లడైంది. ధర్మారావుపేటకు చెందిన కొప్పుల రమేష్కు చెందిన 2 కాసుల బంగారు గాజులు కూడా మాయమైనట్లు తేలింది. అదేవిధంగా మరో వ్యక్తికి చెందిన 6 కాసుల బంగారంతో పాటు పలువురు ఖాతాదారుల ఆభరణాలు రికార్డుల్లో ఉన్నప్పటికీ లాకర్లలో కనిపించకపోవడం తీవ్ర అనుమానాలకు తావిస్తోంది.
ఈ వ్యవహారంలో బ్యాంకు సిబ్బంది పాత్రపై బాధితులు తీవ్ర అనుమానాలు వ్యక్తం చేస్తున్నారు. తమ బంగారం మాయం కావడానికి లోపలి వ్యక్తుల ప్రమేయమే కారణమని ఆరోపిస్తున్నారు. తమకు పూర్తి న్యాయం జరిగే వరకు వెనక్కి తగ్గబోమని స్పష్టం చేస్తూ బ్యాంకు ఎదుట నిరసన కొనసాగిస్తున్నారు. రాత్రి వేళల్లో కూడా టెంట్లు ఏర్పాటు చేసుకుని అక్కడే కూర్చుని అధికారుల నుంచి సమాధానం కోరుతున్నారు. తమకు జరిగిన నష్టానికి సంబంధించిన వివరాలను లిఖితపూర్వకంగా బ్యాంకు ఉన్నతాధికారులకు అందజేసిన బాధితులు, ఈ ఘటనపై సమగ్ర విచారణ చేపట్టి బాధ్యులపై క్రిమినల్ కేసులు నమోదు చేయాలని డిమాండ్ చేస్తున్నారు. అదృశ్యమైన బంగారాన్ని తిరిగి తమకు అప్పగించాలని కోరుతున్నారు. ప్రభుత్వ రంగ బ్యాంకులోనే ఇలాంటి భద్రతా లోపాలు బయటపడటం స్థానికంగా తీవ్ర చర్చకు దారితీస్తుండగా, ఈ ఘటనపై బ్యాంకు ఉన్నతాధికారుల తుది నివేదిక కోసం బాధితులు, ప్రజలు ఎదురుచూస్తున్నారు.
ALSO READ: Taapsee Pannu: వయసు హీరోయిన్లకే పెరుగుతుందా? హీరోలకు పెరగదా? తాప్సీ షాకింగ్ కామెంట్స్!
