తమిళనాడులో మరో కొత్త తరహా మోసం వెలుగులోకి వచ్చింది. ‘కొత్త అంటువ్యాధి’ పేరుతో ప్రజలను భయపెట్టి, ప్రభుత్వ సహాయం పేరుతో డబ్బు ఇస్తామని చెప్పి మహిళలను మోసం చేసిన ఘటన సేలం జిల్లాలో చోటుచేసుకుంది.
ఈ ఘటనలో ముగ్గురు మహిళలు మోసగాడి మాటలు నమ్మి తమ తలలను గీయించుకున్నారు. మోసగాడు తనను ప్రభుత్వ అధికారిగా పరిచయం చేసుకుని ఫోన్ ద్వారా గ్రామస్తులను సంప్రదించాడు. అతను మహిళల వ్యక్తిగత వివరాలు చెప్పడంతో వారు అతనిపై నమ్మకం పెంచుకున్నారు.
తర్వాత అతను ‘కోవిడ్లాంటి కొత్త వ్యాధి జుట్టు ద్వారా వ్యాపిస్తోంది’ అని భయపెట్టాడు. ఈ వ్యాధి నుంచి రక్షణ పొందాలంటే తల గీయించుకోవాలని సూచించాడు. ఇతర దేశాల్లో కూడా ఇదే విధానం పాటిస్తున్నారని అబద్ధపు ఉదాహరణలు ఇచ్చాడు.
ఇంకా ముందుకు వెళ్లి, ప్రభుత్వం ఈ చర్యకు ప్రోత్సాహకంగా మహిళలకు రూ. 15,000, విద్యార్థినులకు రూ. 45,000తో పాటు ల్యాప్టాప్, పురుషులకు రూ. 6,000 ఇస్తుందని చెప్పాడు. గ్రామంలో కొంతమందినే ఎంపిక చేశామని, వెంటనే తల గీయించుకోవాలని ఒత్తిడి చేశాడు.
ఈ మాటలు నమ్మిన గ్రామంలోని దాదాపు 20 మంది తల గీయించుకునేందుకు సిద్ధమయ్యారు. అందులో ముగ్గురు మహిళలు ముందుగా తల గీయించుకున్నారు. అయితే డబ్బుల కోసం మోసగాడిని సంప్రదించగా అతని ఫోన్ స్విచ్ ఆఫ్గా ఉండడంతో మోసం బయటపడింది.
ఈ విషయం తెలుసుకున్న వెంటనే మిగిలిన గ్రామస్తులు తమ నిర్ణయాన్ని మార్చుకున్నారు. అధికారులు ఇలాంటి వదంతులను నమ్మవద్దని, ప్రభుత్వ పథకాల గురించి అధికారిక సమాచారం మాత్రమే విశ్వసించాలని ప్రజలకు సూచిస్తున్నారు.
గమనిక: తెలియని వ్యక్తుల ఫోన్ కాల్స్కి వ్యక్తిగత వివరాలు ఇవ్వకండి. అనుమానాస్పద ఆఫర్లపై వెంటనే స్థానిక అధికారులకు సమాచారం ఇవ్వండి.
also read: విక్రమార్కుడు లో రవితేజ డూప్గా నటించిన హీరో…దురదృష్టకరంగా అకాల మరణం..!