సాహితీ ఇన్ఫ్రా మనీలాండరింగ్ కేసులో ఎన్ఫోర్స్మెంట్ డైరెక్టరేట్ (ఈడీ) దర్యాప్తు వేగం పెంచింది. ఈ కేసుకు సంబంధించి శేరిలింగంపల్లి ఎమ్మెల్యే అరికెపూడి గాంధీకి ఈడీ అధికారులు నోటీసులు జారీ చేసినట్లు సమాచారం. సాహితీ ఇన్ఫ్రా ఖాతాల నుంచి ఆయనకు జరిగినట్లు గుర్తించిన సుమారు రూ.2.1 కోట్ల నగదు బదిలీలపై వివరణ తీసుకునేందుకు ఈ నెల 27న విచారణకు హాజరుకావాలని నోటీసుల్లో పేర్కొన్నట్లు తెలుస్తోంది.
సాహితీ ఇన్ఫ్రాకు సంబంధించిన బ్యాంకు ఖాతాల పరిశీలనలో గాంధీకి దాదాపు రూ.2.1 కోట్ల మేర నిధులు బదిలీ అయినట్లు దర్యాప్తు అధికారులు గుర్తించినట్లు సమాచారం. ఈ లావాదేవీలకు సంబంధించిన వివరాలు, వాటి ఉద్దేశం, నిధుల వినియోగంపై ఎమ్మెల్యే నుంచి వివరాలు సేకరించేందుకు ఈడీ విచారణ చేపట్టనున్నట్లు తెలుస్తోంది.
తెలంగాణ పోలీసులు నమోదు చేసిన ఎఫ్ఐఆర్ ఆధారంగా ఈడీ మనీలాండరింగ్ కోణంలో దర్యాప్తు కొనసాగిస్తోంది. సాహితీ ఇన్ఫ్రా సంస్థ ప్రీ-లాంచ్ ఆఫర్ల పేరుతో కొనుగోలుదారుల నుంచి భారీగా నిధులు సమీకరించి, ఆ మొత్తాలను ఇతర మార్గాల్లోకి మళ్లించిందనే ఆరోపణలు ఈ కేసులో ఉన్నాయి. ఈ వ్యవహారంలో నిధుల ప్రవాహం, సంబంధిత వ్యక్తులు, సంస్థల ఆర్థిక లావాదేవీలను ఈడీ అధికారులు పరిశీలిస్తున్నారు.
ఇప్పటికే ఈ కేసులో సాహితీ ఇన్ఫ్రా సంస్థతో పాటు సంబంధిత వ్యక్తులకు చెందిన ఆస్తులపై ఈడీ చర్యలు చేపట్టింది. సుమారు రూ.161 కోట్ల విలువైన ఆస్తులను అధికారులు అటాచ్ చేసినట్లు సమాచారం. మరోవైపు సాహితీ ఇన్ఫ్రాటెక్ మేనేజింగ్ డైరెక్టర్ బూడాటి లక్ష్మీనారాయణను 2024లో అరెస్ట్ చేశారు.
తాజాగా ఎమ్మెల్యే అరికెపూడి గాంధీకి నోటీసులు జారీ కావడంతో సాహితీ ఇన్ఫ్రా కేసులో దర్యాప్తు మరోసారి ప్రాధాన్యం సంతరించుకుంది. ఈ నెల 27న ఈడీ విచారణకు గాంధీ హాజరైన తర్వాత లావాదేవీలకు సంబంధించి మరిన్ని వివరాలు వెలుగులోకి వచ్చే అవకాశం ఉంది.
also read: అజయ్ దేవ్గణ్కు బీఎంసీ షాక్.. బంగ్లాలో నిర్మాణ పనులు నిలిపివేత