హీరో రవితేజ నటించిన ‘ఇరుముడి’ సినిమాపై వివాదం నెలకొంది. చిత్రంలోని కొన్ని సన్నివేశాలు అయ్యప్ప దీక్షను, భక్తుల విశ్వాసాలను కించపరిచేలా ఉన్నాయంటూ అఖిల భారత అయ్యప్ప దీక్ష సమితి సభ్యులు అభ్యంతరం వ్యక్తం చేశారు.
అయ్యప్ప మాల ధరించే భక్తుల విషయంలో సినిమాలో చూపించిన కొన్ని అంశాలు తమ మనోభావాలను దెబ్బతీసేలా ఉన్నాయని సమితి సభ్యులు పేర్కొన్నారు. ముఖ్యంగా మద్యం సేవించే వ్యక్తులు అయ్యప్ప మాల ధరిస్తారని, దీక్ష పూర్తయిన వెంటనే మద్యం సేవిస్తారని చూపించడం సరికాదని వారు ఆగ్రహం వ్యక్తం చేశారు.
అయ్యప్ప దీక్ష అనేది భక్తి, నియమ నిష్ఠలు, ఆధ్యాత్మిక విశ్వాసాలతో ముడిపడి ఉంటుందని సమితి సభ్యులు తెలిపారు. అలాంటి దీక్షకు సంబంధించిన విషయాలను సినిమాల్లో చూపించే సమయంలో మరింత బాధ్యతతో వ్యవహరించాల్సిన అవసరం ఉందని అన్నారు.
తమ మనోభావాలను దెబ్బతీసేలా ఉన్న సన్నివేశాలపై చిత్రబృందం స్పందించి, బేషరతుగా క్షమాపణ చెప్పాలని అఖిల భారత అయ్యప్ప దీక్ష సమితి సభ్యులు డిమాండ్ చేశారు. వివాదాస్పద సన్నివేశాలపై తగిన చర్యలు తీసుకోవాలని కోరారు.
ఇదిలా ఉండగా.. ‘ఇరుముడి’ సినిమాలో ప్రభుత్వ ఉపాధ్యాయులను కించపరిచేలా ఉన్నాయంటూ ఆరోపణలు ఎదుర్కొంటున్న కొన్ని సన్నివేశాలపైనా గతంలో అభ్యంతరాలు వ్యక్తం అయ్యాయి. దీంతో సినిమా విడుదల నేపథ్యంలో వివిధ వర్గాల నుంచి వస్తున్న అభ్యంతరాలు చర్చనీయాంశంగా మారాయి.
also read: విజయ్ దేవరకొండ ఫ్యాన్స్కు వరుస ట్రీట్స్.. రెండు సినిమాలతో ఫుల్ బిజీ!