దేశవ్యాప్తంగా బుల్లితెర ప్రేక్షకులను విశేషంగా ఆకర్షిస్తున్న బిగ్బాస్ రియాలిటీ షోకి ఉండే క్రేజ్ అంతాఇంతా కాదు. ఏ భాషలో ప్రసారమైనా ఈ షో రికార్డు స్థాయి టీఆర్పీ రేటింగ్లతో దూసుకుపోతోంది. ఈ షో ఇంతటి ఘనవిజయం సాధించడంలో, ప్రేక్షకులను టీవీలకు అతుక్కుపోయేలా చేయడంలో వీకెండ్ ఎపిసోడ్లను నడిపించే హోస్ట్ల పాత్ర ఎంతో కీలకం. స్టార్ హీరోలు హోస్ట్లుగా వ్యవహరిస్తుండటంతో నిర్వాహకులు సైతం వారికి భారీ స్థాయిలో రెమ్యునరేషన్ చెల్లించేందుకు వెనకాడటం లేదు. తాజాగా వివిధ భాషలకు చెందిన బిగ్బాస్ హోస్ట్ల పారితోషికాల వివరాలు బయటకు వచ్చాయి.
అత్యధిక పారితోషికం ఎవరికంటే?
అత్యధిక పారితోషికం అందుకుంటున్న వారి జాబితాలో బాలీవుడ్ స్టార్ హీరో సల్మాన్ ఖాన్ అగ్రస్థానంలో నిలిచారు. జాతీయ మీడియా కథనాల ప్రకారం, హిందీ బిగ్బాస్ కోసం ఆయన అత్యధిక మొత్తాన్ని డిమాండ్ చేసినట్లు తెలుస్తోంది.
వివిధ భాషల హోస్ట్ల రెమ్యునరేషన్ అంచనాలు ఇలా ఉన్నాయి:-
సల్మాన్ ఖాన్ (హిందీ):- ఏకంగా ₹125 కోట్ల భారీ రెమ్యునరేషన్ తీసుకుంటున్నట్లు సమాచారం. ఆయన ఒక్కో వీకెండ్ ఎపిసోడ్కే ₹15 కోట్లకు పైగా ఛార్జ్ చేస్తున్నారట.
విజయ్ సేతుపతి (తమిళం):- కమల్ హాసన్ స్థానంలో బాధ్యతలు చేపట్టిన విలక్షణ నటుడు విజయ్ సేతుపతి సుమారు ₹75 నుంచి ₹80 కోట్ల వరకు పారితోషికం తీసుకుంటున్నట్లు టాక్.
నాగార్జున (తెలుగు):- తెలుగు బిగ్బాస్ను తనదైన శైలిలో నడిపిస్తున్న టాలీవుడ్ కింగ్ నాగార్జున ఈ సీజన్కు ₹35 నుంచి ₹40 కోట్ల వరకు రెమ్యునరేషన్ అందుకుంటున్నట్లు సమాచారం.
మోహన్ లాల్ (మలయాళం):- మలయాళ ఇండస్ట్రీలో సూపర్ స్టార్ మోహన్ లాల్ ఈ షో కోసం ₹30 కోట్లు తీసుకుంటున్నారు.
కిచ్చా సుదీప్ (కన్నడ):- కన్నడలో స్టార్ హీరో కిచ్చా సుదీప్ ₹20 కోట్ల పారితోషికం అందుకుంటున్నారని నేషనల్ మీడియా పేర్కొంది.
క్రికెటర్ గంగూలీ భారీ డీల్
ఇదిలా ఉండగా, బెంగాలీ వర్షన్ బిగ్బాస్ కోసం భారత క్రికెట్ జట్టు మాజీ కెప్టెన్ సౌరవ్ గంగూలీ హోస్ట్గా వ్యవహరించనున్నారు. ఆయన ఏకంగా 4 ఏళ్ల కాలానికి కలిపి ₹125 కోట్లతో భారీ ఒప్పందం కుదుర్చుకున్నట్లు తెలుస్తోంది. మొత్తానికి బిగ్బాస్ హోస్ట్ల పారితోషికాలు ఏ రేంజ్లో ఉన్నాయో చూసి నెటిజన్లు ఆశ్చర్యపోతున్నారు.