ఆంధ్రప్రదేశ్‌లోని అనంతపురం జిల్లా రాప్తాడులో పాఠశాల విద్యార్థినులపై జరిగిన దాడి ఘటన ప్రస్తుతం తీవ్ర చర్చనీయాంశంగా మారింది. ఈ ఘటనకు సినిమాల్లో చూపించే హింసాత్మక సన్నివేశాలే కారణమంటూ కొందరు విమర్శలు చేస్తుండటంపై ప్రముఖ దర్శకుడు సందీప్ రెడ్డి వంగా తీవ్ర అభ్యంతరం వ్యక్తం చేశారు. తనపై వస్తున్న విమర్శలకు సోషల్ మీడియా వేదికగా ఘాటుగా బదులిచ్చారు.
సమాజంలో ఇలాంటి దారుణ ఘటనలు చోటుచేసుకున్నప్పుడు వాటికి సినిమాలను బాధ్యులుగా చేయడం సరైన విధానం కాదని సందీప్ అభిప్రాయపడ్డారు. ముందుగా బాధితుల పట్ల సానుభూతి చూపించాలని, అసలు నేరానికి దారితీసిన కారణాలను గుర్తించి వాటిపై దృష్టి పెట్టాలని సూచించారు. జరిగిన ఘటనను పక్కనపెట్టి సినిమాలను విమర్శించడం ద్వారా అసలు సమస్య పరిష్కారం కాదని పేర్కొన్నారు.
ఈ విషాద ఘటనను కొందరు తమ వ్యక్తిగత అభిప్రాయాలు, కక్షలు వెళ్లగక్కడానికి అవకాశంగా ఉపయోగించుకుంటున్నారని ఆయన ఆరోపించారు. బాధితుల పట్ల నిజమైన ఆందోళన కంటే, సినిమాలపై విమర్శలు చేయడానికే కొందరు ప్రాధాన్యత ఇస్తున్నారని తన పోస్టులో అసహనం వ్యక్తం చేశారు.
అంతేకాకుండా, తన వ్యాఖ్యలు ఎవరిని ఉద్దేశించి చేశారో కూడా సందీప్ స్పష్టం చేశారు. సినీ పరిశ్రమలో అవకాశాలు కోల్పోయిన కొందరు నటీనటులు, అసంతృప్తితో ఉన్న దర్శకులు, నిర్మాతలు ఇతరుల సినిమాలను విమర్శించే అవకాశం వచ్చినప్పుడల్లా సామాజిక బాధ్యత గురించి మాట్లాడుతున్నారని వ్యాఖ్యానించారు.
ఒక విషాదకరమైన ఘటన జరిగినప్పుడు బాధితులకు అండగా నిలవడం ముఖ్యమని, దానిని వ్యక్తిగత విమర్శలకు వేదికగా మార్చుకోవడం సరికాదని సందీప్ రెడ్డి వంగా స్పష్టం చేశారు. ప్రస్తుతం ఆయన చేసిన ఈ వ్యాఖ్యలు సినీ వర్గాల్లో చర్చకు దారితీస్తున్నాయి.
also read: ఎంపీటీసీ, జడ్పీటీసీ ఎన్నికల్లో ఉద్రిక్తతలు.. టీడీపీ, వైసీపీ శ్రేణుల మధ్య ఘర్షణలు!