టాలీవుడ్ హీరో సాయి ధరమ్ తేజ్ తన జీవితంలో ఐదేళ్ల క్రితం జరిగిన ఘోర రోడ్డు ప్రమాదాన్ని మరోసారి గుర్తుచేసుకున్నారు. ప్రమాదం జరిగిన రోజును తనకు పునర్జన్మ లభించిన రోజుగా పేర్కొంటూ సోషల్ మీడియాలో భావోద్వేగ సందేశాన్ని పంచుకున్నారు. తనపై అభిమానులు, కుటుంబ సభ్యులు చూపించిన ప్రేమ, చేసిన ప్రార్థనల వల్లే తాను ఈరోజు ఇలా ఉన్నానని తెలిపారు.
ఐదేళ్ల క్రితం జరిగిన ప్రమాదం తర్వాత ప్రస్తుతం దాదాపు 90 శాతం కోలుకున్నానని సాయి ధరమ్ తేజ్ వెల్లడించారు. అయితే మాట్లాడే విషయంలో, అలాగే మరికొన్ని అంశాల్లో ఇంకా సవాళ్లు ఎదురవుతున్నాయని చెప్పారు. వాటిని అధిగమిస్తూ ఒక్కో అడుగు ముందుకు వేస్తున్నానని పేర్కొన్నారు.
ప్రమాదం తర్వాత కష్టమైన రోజుల్లో తనకు అభిమానులు అందించిన మద్దతును ఆయన గుర్తుచేసుకున్నారు. ప్రతి ఎదురుదెబ్బ సమయంలోనూ అభిమానుల ప్రేమ తనకు ధైర్యాన్ని ఇచ్చిందని తెలిపారు. ఐదేళ్ల తర్వాత కూడా తాను నిలబడగలిగానంటే అందుకు అభిమానుల ప్రార్థనలు, శుభాకాంక్షలు, ప్రేమే కారణమని కృతజ్ఞతలు చెప్పారు.
అయితే తన ప్రమాదం నుంచి ప్రతి ఒక్కరూ ఒక ముఖ్యమైన విషయం నేర్చుకోవాలని సాయి ధరమ్ తేజ్ కోరారు. హెల్మెట్ తప్పనిసరిగా ధరించాలని అభిమానులకు సూచించారు. ప్రమాద సమయంలో హెల్మెట్ ధరించి ఉండటమే తాను ప్రాణాలతో బయటపడటానికి ప్రధాన కారణమని పేర్కొన్నారు. చిన్న నిర్ణయం కూడా ఒక్కోసారి జీవితాన్ని కాపాడుతుందని తన అనుభవం ద్వారా చెప్పారు.
ఐదేళ్ల క్రితం ఏం జరిగింది?
2021 సెప్టెంబర్లో హైదరాబాద్లో సాయి ధరమ్ తేజ్ రోడ్డు ప్రమాదానికి గురయ్యారు. స్పోర్ట్స్ బైక్పై ప్రయాణిస్తుండగా అదుపుతప్పి కిందపడటంతో తీవ్రంగా గాయపడ్డారు. వెంటనే ఆసుపత్రికి తరలించి వైద్యం అందించారు. చికిత్స అనంతరం క్రమంగా కోలుకున్న ఆయన.. ఇప్పుడు తన సినీ ప్రయాణాన్ని కొనసాగిస్తున్నారు.
‘సంబరాల ఏటి గట్టు’లో హీరోగా..
ప్రస్తుతం సాయి ధరమ్ తేజ్ దర్శకుడు రోహిత్ కేపీ తెరకెక్కిస్తున్న పాన్ ఇండియా చిత్రం ‘సంబరాల ఏటి గట్టు’లో నటిస్తున్నారు. భారీ స్థాయిలో రూపొందుతున్న ఈ సినిమాను వచ్చే ఏడాది జనవరి 12న ప్రేక్షకుల ముందుకు తీసుకురావాలని మేకర్స్ సన్నాహాలు చేస్తున్నారు.
also read: నోయిడా బస్సు ప్రమాదంపై సంచలన ఆరోపణలు.. పొగ వస్తున్నా పట్టించుకోలేదా?