-
మాదాపూర్లో యువకుడి ఆత్మహత్య
-
అయ్యప్ప సొసైటీలో భవనం టెర్రస్ నుంచి దూకిన యువకుడు
హైదరాబాద్, మాదాపూర్: మాదాపూర్ అయ్యప్ప సొసైటీలో ఓ యువకుడు భవనం టెర్రస్ నుంచి దూకి ఆత్మహత్యకు పాల్పడిన ఘటన మంగళవారం చోటుచేసుకుంది. తీవ్ర గాయాల కారణంగా యువకుడు అక్కడికక్కడే మృతి చెందినట్లు పోలీసులు తెలిపారు.
పోలీసుల వివరాల ప్రకారం.. శ్రీకాకుళం జిల్లా పాతపట్నం ప్రాంతానికి చెందిన కలమట యశ్వంత్ (23), కలమట రమేష్ కుమారుడు. యశ్వంత్ గత సెప్టెంబర్ 2 నుంచి మాదాపూర్ అయ్యప్ప సొసైటీలోని అవాసా కో-లివింగ్లో గది నంబర్ 206లో నివాసం ఉంటున్నాడు. జనవరి 2026 నుంచి డెలాయిట్ సంస్థలో ఉద్యోగిగా పనిచేస్తున్నట్లు సమాచారం.
మంగళవారం ఉదయం యశ్వంత్ అస్వస్థతకు గురయ్యాడు. వైరల్ జ్వరం లేదా ఇతర ఆరోగ్య సమస్యలు ఉన్నాయా అనే నిర్ధారణ కోసం డాక్టర్ సూచన మేరకు రక్త నమూనాలను పరీక్షలకు ఇచ్చినట్లు తెలిసింది.
అనంతరం మధ్యాహ్నం సుమారు 3:08 గంటల సమయంలో యశ్వంత్ భవనం టెర్రస్పైకి వెళ్లి అక్కడి నుంచి కిందకు దూకినట్లు సమాచారం. తీవ్ర గాయాల కారణంగా అతడు అక్కడికక్కడే మృతి చెందినట్లు పోలీసులు తెలిపారు.
సమాచారం అందుకున్న పోలీసులు ఘటనాస్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం ఆస్పత్రికి తరలించారు. ఘటనపై కేసు నమోదు చేసి దర్యాప్తు చేపట్టారు.
యశ్వంత్ ఆత్మహత్యకు పాల్పడటానికి గల కారణాలు ఏమిటన్న దానిపై పోలీసులు విచారణ కొనసాగిస్తున్నారు. అతడి కుటుంబ సభ్యులు, స్నేహితులు, సహోద్యోగులను పోలీసులు విచారిస్తున్నట్లు సమాచారం. పూర్తి వివరాలు దర్యాప్తు అనంతరం వెల్లడయ్యే అవకాశం ఉంది.