రష్యాపై ఉక్రెయిన్ డ్రోన్ల దాడుల మోత

క్రైమ్ మిర్రర్ ; రష్యా-ఉక్రెయిన్ మధ్య కొనసాగుతున్న యుద్ధంలో మరోసారి భారీ స్థాయిలో డ్రోన్ దాడులు చోటుచేసుకున్నాయి. శనివారం అర్ధరాత్రి నుంచి ఆదివారం తెల్లవారుజాము వరకు రష్యాలోని పలు ప్రాంతాలపై ఉక్రెయిన్ భారీ సంఖ్యలో డ్రోన్లతో దాడులు చేసినట్లు రష్యా రక్షణ మంత్రిత్వ శాఖ వెల్లడించింది. ఉక్రెయిన్ నుంచి వెయ్యికిపైగా డ్రోన్లు దూసుకొచ్చినట్లు రష్యా అధికారులు పేర్కొన్నారు. వాటిలో 800కు పైగా డ్రోన్లను తమ రక్షణ వ్యవస్థలు అడ్డుకుని ధ్వంసం చేసినట్లు తెలిపారు. అయితే కొన్ని డ్రోన్లు లక్ష్యాలను చేరుకున్నట్లు తెలుస్తోంది.

మాస్కోను టార్గెట్ చేసిన డ్రోన్లు

మాస్కో నగరంలోని పలు ప్రాంతాలను లక్ష్యంగా చేసుకుని ఉక్రెయిన్ దాడులు నిర్వహించినట్లు సమాచారం. ముఖ్యంగా మాస్కో ఆయిల్ రిఫైనరీ సమీపంలో డ్రోన్ దాడులు జరగడంతో భారీగా మంటలు చెలరేగాయి. దట్టమైన పొగ పరిసర ప్రాంతాలను కమ్మేసింది. ఈ దాడుల్లో ఆరుగురు మరణించగా.. పలువురు గాయపడినట్లు సమాచారం. క్షతగాత్రులను స్థానిక ఆసుపత్రులకు తరలించి చికిత్స అందిస్తున్నట్లు అధికారులు తెలిపారు. దాడుల నేపథ్యంలో మాస్కోలో భద్రతా చర్యలను మరింత కట్టుదిట్టం చేశారు.

విమాన రాకపోకలకు అంతరాయం

డ్రోన్ దాడుల ప్రభావం విమాన రాకపోకలపైనా పడింది. మాస్కోలోని ప్రధాన విమానాశ్రయాల్లో కార్యకలాపాలను తాత్కాలికంగా నిలిపివేసినట్లు సమాచారం. దీంతో పలు విమానాలు రద్దు కాగా.. మరికొన్ని విమానాలు ఆలస్యంగా నడిచాయి. ప్రయాణికుల భద్రతను దృష్టిలో ఉంచుకుని విమానాశ్రయాల వద్ద అదనపు భద్రతా చర్యలు చేపట్టినట్లు అధికారులు తెలిపారు.

ఐదేళ్లలో భారీ దాడుల్లో ఒకటి

గత ఐదేళ్ల కాలంలో ఉక్రెయిన్.. రష్యాపై చేపట్టిన అతిపెద్ద డ్రోన్ దాడుల్లో ఇది ఒకటిగా రష్యా మీడియా కథనాలు పేర్కొన్నాయి. భారీ సంఖ్యలో డ్రోన్లను ఒకేసారి ప్రయోగించడం ద్వారా రష్యా రక్షణ వ్యవస్థలను ఒత్తిడికి గురిచేయడమే ఉక్రెయిన్ లక్ష్యంగా కనిపిస్తోందని విశ్లేషణలు వెలువడుతున్నాయి.

క్రిమియాపైనా దాడులు

మరోవైపు క్రిమియా ప్రాంతంపైనా ఉక్రెయిన్ దాడులు కొనసాగిస్తున్నట్లు సమాచారం. రష్యా సైనిక సరఫరా వ్యవస్థలు, విద్యుత్ మౌలిక వసతులను లక్ష్యంగా చేసుకుని దాడులు చేసినట్లు ఉక్రెయిన్ వెల్లడించింది. క్రిమియాలోని కొన్ని క్షిపణి వ్యవస్థలపై కూడా దాడులు జరిపినట్లు ఉక్రెయిన్ పేర్కొంది. ఈ దాడులపై రష్యా నుంచి కూడా స్పందన వెలువడే అవకాశం ఉంది.

కీవ్‌పైనా రష్యా డ్రోన్ దాడులు

ఇదిలా ఉండగా.. రష్యా కూడా ఉక్రెయిన్ రాజధాని కీవ్‌పై డ్రోన్ దాడులు నిర్వహించింది. తెల్లవారుజామున కీవ్‌లోని పలు ప్రాంతాలను లక్ష్యంగా చేసుకుని రష్యా డ్రోన్లు దాడులు చేసినట్లు ఉక్రెయిన్ అధికారులు తెలిపారు. ఈ దాడుల్లో పలు నివాస ప్రాంతాలు, దుకాణాలు దెబ్బతిన్నట్లు సమాచారం. కొన్ని చోట్ల మంటలు చెలరేగడంతో అగ్నిమాపక సిబ్బంది సహాయక చర్యలు చేపట్టారు. రెండు దేశాల మధ్య యుద్ధం కొనసాగుతున్న నేపథ్యంలో తాజాగా జరిగిన భారీ డ్రోన్ దాడులు మరోసారి ఉద్రిక్తతలను పెంచాయి. ఇరువైపులా సైనిక, పౌర మౌలిక వసతులను లక్ష్యంగా చేసుకుని దాడులు జరుగుతుండటంతో పరిస్థితిపై అంతర్జాతీయంగా ఆందోళన వ్యక్తమవుతోంది.
also read : భార్యను హత్య చేసిన జవాన్.. టెర్రస్‌పై నుంచి పడిందని నమ్మించే యత్నం