క్రైమ్ మిర్రర్ : ఆంధ్రప్రదేశ్–ఒడిశా సరిహద్దులో యువతి మృతదేహం వెలుగులోకి రావడంతో తీవ్ర కలకలం రేగింది. విజయనగరం జిల్లా గజపతినగరం మండలం మరుపల్లి పెట్రోల్ బంక్ సమీపంలోని ప్రాంతంలో ఒడిశాకు చెందిన ఓ యువతి మృతదేహాన్ని పోలీసులు గుర్తించారు. ఘటనకు సంబంధించి ఏపీ, ఒడిశా పోలీసులు సంయుక్తంగా దర్యాప్తు చేస్తున్నారు. పోలీసుల వివరాల ప్రకారం.. ఒడిశాకు చెందిన అలూ మీనా (22), మోహన్ కిల్లో (35) కొంతకాలంగా ప్రేమలో ఉన్నట్లు సమాచారం. ఇటీవల యువతి గర్భవతి అని అంగన్వాడీ నివేదిక ద్వారా నిర్ధారణ కావడంతో ఈ విషయం ఇరు కుటుంబాలకు తెలిసినట్లు తెలుస్తోంది. ఆ తర్వాత కొన్ని పరిణామాల నేపథ్యంలో యువతి కుటుంబంలో ఆందోళన నెలకొంది.
ఇదిలా ఉండగా, అలూ మీనా సుమారు 14 రోజులుగా కనిపించకుండా పోయింది. ఆమె ఆచూకీ కోసం కుటుంబ సభ్యులు ఒడిశాలోని శిమిలిగుడా పోలీస్ స్టేషన్ను ఆశ్రయించి ఫిర్యాదు చేశారు. ఫిర్యాదు ఆధారంగా పోలీసులు మిస్సింగ్ కేసు నమోదు చేసి దర్యాప్తు ప్రారంభించారు. యువతి ఎక్కడికి వెళ్లింది, చివరిసారిగా ఎవరితో ఉంది అనే కోణాల్లో వివరాలు సేకరించారు. దర్యాప్తులో భాగంగా యువతి ప్రియుడిగా భావిస్తున్న మోహన్ కిల్లోను పోలీసులు ప్రశ్నించినట్లు సమాచారం. ఈ క్రమంలో అతడు ఇచ్చిన సమాచారం ఆధారంగా విజయనగరం జిల్లా మరుపల్లి ప్రాంతంలో పోలీసులు గాలింపు చేపట్టారు. అక్కడ యువతి మృతదేహం ఉన్నట్లు గుర్తించి, సంబంధిత అధికారుల సమక్షంలో వెలికితీసినట్లు తెలుస్తోంది.
విషయం తెలుసుకున్న యువతి కుటుంబ సభ్యులు కూడా ఘటనాస్థలికి చేరుకున్నారు. మృతదేహాన్ని గుర్తించే ప్రక్రియతో పాటు పోస్టుమార్టం, ఫోరెన్సిక్ ఆధారాల సేకరణకు పోలీసులు చర్యలు చేపట్టారు. యువతి మృతికి అసలు కారణం ఏమిటి? ఆమెను అక్కడికి ఎవరు తీసుకొచ్చారు? మరణం ఎలా సంభవించింది? అనే అంశాలపై దర్యాప్తు కొనసాగుతోంది. ఈ ఘటనలో మోహన్ కిల్లో పాత్రపై పోలీసులు ప్రత్యేకంగా దృష్టి సారించినట్లు సమాచారం. అయితే దర్యాప్తు పూర్తయ్యే వరకు హత్యకు సంబంధించిన పూర్తి వివరాలు, మరణానికి గల కారణాలపై స్పష్టత రావాల్సి ఉంది. ఏపీ, ఒడిశా పోలీసులు సమన్వయంతో ఆధారాలను సేకరిస్తూ కేసును అన్ని కోణాల్లో విచారిస్తున్నారు.
also read : వర్క్ ఫ్రమ్ హోమ్ పేరుతో సైబర్ మోసం.. చైనా ఆధారిత ముఠా గుట్టురట్టు