హైదరాబాద్, క్రైమ్మిర్రర్: ఢిల్లీలో నడుస్తున్న మోసపూరిత సైబర్ క్రైమ్ కాల్ సెంటర్ల గుట్టును తెలంగాణ సైబర్ సెక్యూరిటీ బ్యూరో (TGCSB) పోలీసులు రట్టు చేశారు. ఈ కేసులో 21 మంది తెలుగు మాట్లాడే మహిళా టెలీకాలర్లతో పాటు ఓ బ్యాంక్ ఖాతాదారుడిని పోలీసులు అరెస్ట్ చేశారు. ఢిల్లీలోని శివా మార్కెట్లో నిర్వహిస్తున్న మూడు కాల్ సెంటర్లపై సమన్వయంతో దాడులు నిర్వహించి ఈ అరెస్టులు చేపట్టారు. ఈ నెట్వర్క్ సుమారు 18 నెలలుగా పనిచేస్తున్నట్లు దర్యాప్తులో వెల్లడైంది.
తెలంగాణ నుంచే మహిళల నియామకం…
Also Read:యువ నటిపై దాడి ఆరోపణలు.. నిర్మాత అరెస్ట్
పోలీసుల దర్యాప్తులో కీలక విషయాలు వెలుగులోకి వచ్చాయి. కాల్ సెంటర్ నిర్వాహకులు తెలంగాణలోని కోరుట్ల, సైదాబాద్, బోరబండ, మహబూబ్నగర్ ప్రాంతాల నుంచి 25 నుంచి 40 ఏళ్ల మధ్య వయసున్న మహిళలను ఎంపిక చేసి ఢిల్లీకి తీసుకెళ్లినట్లు అధికారులు తెలిపారు. తెలుగు మాట్లాడే సామర్థ్యం ఉన్నవారిని లక్ష్యంగా చేసుకుని నియమించుకున్నట్లు తెలుస్తోంది.
లోన్ల పేరుతో సైబర్ మోసాలు…
Also Read: విశాఖలో AAA సినిమాస్.. కొత్త ఎయిర్పోర్ట్పై బన్నీ ఆసక్తికర వ్యాఖ్యలు!
ఈ కాల్ సెంటర్ల ద్వారా ప్రధానంగా రుణాలు ఇప్పిస్తామంటూ బాధితులను నమ్మించి డబ్బులు వసూలు చేసినట్లు దర్యాప్తులో తేలింది. ముందుగా బాధితులకు ఫోన్ చేసి లోన్ మంజూరవుతుందని చెప్పడం, అనంతరం ప్రాసెసింగ్ ఫీజు, ఇతర ఛార్జీల పేరుతో డబ్బులు చెల్లించాలని ఒత్తిడి చేయడం వంటి పద్ధతులను ముఠా ఉపయోగించినట్లు అధికారులు గుర్తించారు. బాధితులు లావాదేవీలపై ప్రశ్నించినప్పుడు లేదా డబ్బులు తిరిగి ఇవ్వాలని అడిగినప్పుడు చట్టపరమైన చర్యలు తీసుకుంటామని, పరువు తీస్తామని, వ్యక్తిగత సమాచారం లేదా గుర్తింపు పత్రాలను దుర్వినియోగం చేస్తామని బెదిరించినట్లు పోలీసులు తెలిపారు.
22 కేసులతో సంబంధాలు…
Also Read:ప్రభాస్పై టాలీవుడ్ నటుడి ఆసక్తికర వ్యాఖ్యలు.. ఆయన నా దేవుడు.. మా బంధం మాటల్లో చెప్పలేను!
ఈ నెట్వర్క్కు తెలంగాణలో నమోదైన 22 సైబర్ క్రైమ్ కేసులతో సంబంధాలు ఉన్నట్లు TGCSB ఇప్పటివరకు గుర్తించింది. ఢిల్లీలో నిర్వహించిన సోదాల్లో 23 మొబైల్ ఫోన్లు, రెండు బ్యాంక్ పాస్బుక్లు స్వాధీనం చేసుకున్నట్లు అధికారులు తెలిపారు. కాల్ సెంటర్ల నిర్వాహకులుగా భావిస్తున్న లలిత్ సింగ్, కుల్దీప్ సింగ్, అనిల్ పరారీలో ఉన్నట్లు సమాచారం. వారి కోసం పోలీసులు గాలింపు కొనసాగిస్తున్నారు.
మరింత లోతుగా దర్యాప్తు…
Also Read:విజయ్ సేతుపతి స్లమ్ డాగ్ సినిమాలో టాబు రోల్ ఇదే..!
ఈ కాల్ సెంటర్ల ద్వారా ఎంత మొత్తంలో మోసం జరిగింది? దేశవ్యాప్తంగా ఇంకా ఎన్ని కేసులతో ఈ నెట్వర్క్కు సంబంధాలు ఉన్నాయి? తెలంగాణ నుంచి మరెంతమందిని నియమించుకున్నారు? అనే అంశాలపై అధికారులు దర్యాప్తు చేస్తున్నారు. అరెస్టయిన వారి నుంచి స్వాధీనం చేసుకున్న మొబైల్ ఫోన్లు, బ్యాంకు వివరాలను విశ్లేషించి నెట్వర్క్కు సంబంధించిన మరిన్ని వివరాలను సేకరిస్తున్నారు. ఢిల్లీలో వెలుగులోకి వచ్చిన ఈ కాల్ సెంటర్ వ్యవహారం తెలంగాణలోనూ కలకలం రేపుతోంది. తెలుగు ప్రజలను లక్ష్యంగా చేసుకుని నిర్వహించిన సైబర్ మోసాల్లో తెలంగాణకు చెందిన మహిళలను టెలీకాలర్లుగా ఉపయోగించిన విషయం బయటపడటం ఇప్పుడు పోలీసులకు కొత్త సవాలుగా మారింది.