తెలంగాణలో నిషేధిత గడ్డిమందుల అక్రమ రవాణాపై పోలీసులు కఠిన చర్యలు చేపట్టారు. మహారాష్ట్ర నుంచి గడ్డిమందులను అక్రమంగా తీసుకొచ్చి రైతులకు విక్రయించేందుకు ప్రయత్నించిన నలుగురిని తాండూర్ పోలీసులు అరెస్ట్ చేశారు. వారి వద్ద నుంచి భారీ మొత్తంలో గడ్డిమందులు, వాహనాలను స్వాధీనం చేసుకున్నారు.
విశ్వసనీయ సమాచారం అందడంతో పోలీసులు తనిఖీలు నిర్వహించి, భీమిని మండల పరిధిలో ఈ అక్రమ రవాణాను అడ్డుకున్నారు. ఈ సందర్భంగా నిందితులు మహారాష్ట్రలోని ప్రాంతాల నుంచి గడ్డిమందులు తెచ్చి స్థానిక రైతులకు విక్రయించేందుకు ప్రయత్నిస్తున్నట్లు గుర్తించారు.
అరెస్టు చేసిన నలుగురి వద్ద నుంచి సుమారు రూ.1.44 లక్షల విలువైన 290 లీటర్ల గడ్డిమందులు స్వాధీనం చేసుకున్నారు. అదనంగా ఒక కారు, రెండు ద్విచక్ర వాహనాలను కూడా పోలీసులు జప్తు చేశారు. విచారణలో నిందితులు ఈ మందులను రైతులకు అనుమతులు లేకుండా విక్రయించేందుకు తెచ్చినట్లు ఒప్పుకున్నారని అధికారులు తెలిపారు.
ఈ సందర్భంగా పోలీసులు రైతులకు కీలక సూచనలు చేశారు. అనుమతి లేని గడ్డిమందుల వాడకం వల్ల భూసారం తగ్గిపోవడం, పంట దిగుబడులు దెబ్బతినడం వంటి సమస్యలు ఎదురయ్యే అవకాశం ఉందని హెచ్చరించారు. అలాగే ఆరోగ్య సమస్యలు, ముఖ్యంగా చర్మ సంబంధిత వ్యాధులు వచ్చే ప్రమాదం ఉందని పేర్కొన్నారు.
రైతులు తప్పనిసరిగా లైసెన్సు కలిగిన దుకాణాల నుంచే ఎరువులు, పురుగుమందులు కొనుగోలు చేయాలని, ప్రతి కొనుగోలుకు రసీదు తీసుకోవాలని సూచించారు. దళారుల మోసాలకు గురికాకుండా జాగ్రత్తగా ఉండాలని కూడా విజ్ఞప్తి చేశారు.
గ్రామాల్లో ఎవరైనా అనుమతులు లేకుండా గడ్డిమందులు విక్రయిస్తే వెంటనే పోలీసులకు సమాచారం అందించాలని తెలిపారు. సమాచారం ఇచ్చిన వారి వివరాలు గోప్యంగా ఉంచుతామని భరోసా ఇచ్చారు.
also read: బ్రేకప్ రూమర్లపై అనుపమ పరమేశ్వరన్ క్లారిటీ! ఎమోషనల్ కామెంట్స్ వైరల్