ప్రభుత్వ పాఠశాలల్లో విద్యార్థుల చేరికలు తగ్గిపోతున్నాయని, కొన్ని చోట్ల విద్యార్థులే లేక పాఠశాలలు మూతపడుతున్నాయనే వార్తలు తరచూ వినిపిస్తున్న వేళ తెలంగాణలోని ఒక ప్రభుత్వ పాఠశాల మాత్రం అందుకు పూర్తి భిన్నంగా నిలుస్తోంది. అక్కడ అడ్మిషన్ పొందడం కోసం విద్యార్థులు పోటీ పడుతుండగా, తల్లిదండ్రులు సైతం నెలల ముందుగానే ప్రయత్నాలు ప్రారంభిస్తున్నారు. పరిస్థితి ఎంతవరకు వెళ్లిందంటే, అందుబాటులో ఉన్న సీట్ల కంటే దరఖాస్తులు అనేక రెట్లు ఎక్కువగా రావడంతో ప్రవేశాల కోసం ప్రత్యేకంగా ప్రవేశ పరీక్ష నిర్వహించాల్సిన పరిస్థితి ఏర్పడింది. ఈ అరుదైన ఘనతను సిద్దిపేట పట్టణంలోని ఇందిరానగర్ పబ్లిక్ స్కూల్ సొంతం చేసుకుంది.
కొత్త విద్యా సంవత్సరం ప్రారంభానికి ముందు నిర్వహించిన ప్రవేశ పరీక్షకు భారీ స్పందన లభించింది. పాఠశాల ఆవరణలో బుధవారం నిర్వహించిన పరీక్షకు మొత్తం 691 మంది విద్యార్థులు హాజరయ్యారు. 6వ తరగతిలో అందుబాటులో ఉన్న 180 సీట్లకు, 8వ తరగతిలో ఖాళీగా ఉన్న 40 సీట్లకు మాత్రమే ప్రవేశాలు ఉండగా, వాటి కోసం వందలాది మంది విద్యార్థులు పోటీ పడ్డారు. సిద్దిపేట జిల్లాతో పాటు నిజామాబాద్ జిల్లా బోధన్, మెదక్ జిల్లా శివ్వంపేట, సంగారెడ్డి జిల్లాలోని పలు ప్రాంతాల నుంచి కూడా విద్యార్థులు పరీక్ష రాయడానికి రావడం ఈ పాఠశాలపై ఉన్న విశ్వాసాన్ని స్పష్టంగా చూపిస్తోంది.
ఈ పాఠశాలలో హాస్టల్ సౌకర్యం లేకపోయినా, తమ పిల్లలకు సీటు లభిస్తే స్థానిక ప్రైవేట్ హాస్టళ్లలో ఉంచి అయినా చదివిస్తామని తల్లిదండ్రులు ముందుకు రావడం విశేషం. ప్రధానోపాధ్యాయుడు ఏ. రాజా ప్రభాకర్ రెడ్డి ముందుగానే హాస్టల్ సదుపాయం లేదని తెలియజేసినా, నాణ్యమైన విద్య కోసం తల్లిదండ్రులు వెనుకడుగు వేయలేదు. ఇది ప్రభుత్వ పాఠశాలలపై ప్రజల అభిప్రాయాన్ని మార్చే స్థాయిలో ఉన్న విజయంగా విద్యావేత్తలు అభిప్రాయపడుతున్నారు.
ప్రవేశ పరీక్షకు హాజరైన 691 మంది విద్యార్థుల్లో దాదాపు 360 మంది ప్రైవేట్ పాఠశాలల్లో చదువుతున్న విద్యార్థులే కావడం మరింత ఆసక్తికరంగా మారింది. అధునాతన సౌకర్యాలు, క్రమశిక్షణతో కూడిన విద్యా విధానం, ప్రతిభావంతులైన ఉపాధ్యాయులు, అద్భుత ఫలితాలు ఈ పాఠశాల ప్రత్యేకతగా నిలుస్తున్నాయి. ముఖ్యంగా పదో తరగతి ఫలితాల్లో ప్రతి సంవత్సరం అద్భుత ప్రదర్శన కనబరుస్తుండటంతో ఈ పాఠశాలకు ఆదరణ మరింత పెరుగుతోంది.
ఈ ఏడాది పదో తరగతి పరీక్షలకు హాజరైన 259 మంది విద్యార్థుల్లో 251 మంది ఉత్తీర్ణత సాధించారు. ఒక విద్యార్థి 576 మార్కులు సాధించి పాఠశాల టాపర్గా నిలిచాడు. అంతేకాకుండా విద్యార్థులను ఉన్నత విద్య వైపు ప్రోత్సహించే క్రమంలో ఈ ఏడాది 15 మంది విద్యార్థులు ఐఐఐటీ-బాసరలో సీట్లు సాధించడం మరో విశేషం. ఈ విజయాలు పాఠశాల ప్రతిష్ఠను మరింత పెంచాయి.
పాఠశాల అభివృద్ధిలో మాజీ మంత్రి టి.హరీశ్ రావు చేసిన కృషిని ప్రధానోపాధ్యాయుడు ఏ.రాజా ప్రభాకర్ రెడ్డి ప్రత్యేకంగా గుర్తుచేశారు. కంప్యూటర్ ల్యాబ్, సైన్స్ ల్యాబ్, గ్రంథాలయం వంటి ఆధునిక సదుపాయాల ఏర్పాటులో ఆయన సహకారం ఎంతో ఉందని తెలిపారు. అలాగే ఐఐఐటీ-బాసరలో సీట్లు సాధించిన విద్యార్థులకు ఐప్యాడ్లు అందజేస్తూ వారిని ప్రోత్సహిస్తున్నట్లు చెప్పారు.
నాణ్యమైన విద్య, ఆధునిక మౌలిక వసతులు, ఉత్తమ ఫలితాలు, విద్యార్థుల ప్రతిభాభివృద్ధికి అనుకూల వాతావరణం కల్పించడం వల్ల ఇందిరానగర్ పబ్లిక్ స్కూల్ ప్రభుత్వ విద్యా రంగంలో ఒక ఆదర్శ పాఠశాలగా నిలుస్తోంది. ప్రభుత్వ పాఠశాలలు కూడా ప్రైవేట్ విద్యాసంస్థలకు ఏమాత్రం తీసిపోవని నిరూపిస్తూ ఈ పాఠశాల విద్యా రంగంలో ప్రత్యేక గుర్తింపు పొందుతోంది.
ALSO READ: పీఎం కిసాన్ పథకానికి అర్హులు ఎవరో తెలుసా?
