పాకిస్థాన్లోని బలూచిస్తాన్ ప్రావిన్స్ రాజధాని క్వెట్టాలో ఆదివారం జరిగిన భారీ పేలుడు ఘటన కలకలం రేపింది. క్వెట్టా సమీపంలోని చమన్ ఫాటక్ ప్రాంతంలో రైల్వే ట్రాక్ వద్ద జరిగిన ఈ పేలుడులో ప్రయాణిస్తున్న జాఫర్ ఎక్స్ప్రెస్ తీవ్రంగా దెబ్బతిన్నట్లు అధికారులు వెల్లడించారు. ప్రాథమిక సమాచారం ప్రకారం ఈ ఘటనలో కనీసం 24 మంది ప్రాణాలు కోల్పోగా, 50 మందికి పైగా గాయపడినట్లు స్థానిక అధికారులు తెలిపారు. మృతుల్లో సైనిక సిబ్బంది, పౌరులు ఉన్నట్లు సమాచారం వెలువడుతోంది.
అధికారుల వివరాల ప్రకారం.. రైలు చమన్ ఫాటక్ సమీపానికి చేరుకున్న సమయంలో రైల్వే ట్రాక్ వద్ద భారీ పేలుడు సంభవించింది. పేలుడు ధాటికి రైలులోని బోగీలు దెబ్బతినడంతో పాటు కొన్ని ప్రాంతాల్లో మంటలు చెలరేగినట్లు వెల్లడించారు. చుట్టుపక్కల ఉన్న భవనాల అద్దాలు పగిలిపోవడంతో పాటు సమీపంలో నిలిపిన వాహనాలకు కూడా నష్టం జరిగినట్లు అధికారులు తెలిపారు. పేలుడు తర్వాత ప్రాంతమంతా దట్టమైన పొగతో కమ్ముకుపోయి భయాందోళన వాతావరణం నెలకొంది.
ఘటన అనంతరం పోలీసులు, రెస్క్యూ బృందాలు వెంటనే అక్కడికి చేరుకుని సహాయక చర్యలు ప్రారంభించాయి. గాయపడిన వారిని క్వెట్టాలోని ప్రభుత్వ ఆసుపత్రులకు తరలించారు. పలువురి పరిస్థితి విషమంగా ఉన్నందున మరణాల సంఖ్య పెరిగే అవకాశం ఉందని వైద్య వర్గాలు భావిస్తున్నాయి. పరిస్థితిని దృష్టిలో ఉంచుకుని బలూచిస్తాన్ వ్యాప్తంగా అప్రమత్త చర్యలు చేపట్టినట్లు సమాచారం.
ఈ ఘటనకు సంబంధించి వివిధ వర్గాల నుంచి భిన్న సమాచారం వెలువడుతోంది. కొన్ని స్థానిక నివేదికల్లో నిషేధిత ఉగ్రవాద సంస్థ బలూచ్ లిబరేషన్ ఆర్మీ బాధ్యత వహించినట్లు పేర్కొన్నప్పటికీ, అధికారిక దర్యాప్తు పూర్తయ్యే వరకు తుది నిర్ధారణగా పరిగణించలేమని అధికారులు సూచిస్తున్నారు. పేలుడు స్వభావం, దాడి విధానం, లక్ష్యం వంటి అంశాలపై దర్యాప్తు కొనసాగుతోంది.
ALSO READ: ఇది మాములు పుంజు కాదు భయ్యో!.. దీని వయసెంతో తెలుసా..?
