తెలంగాణలో పోస్ట్ గ్రాడ్యుయేట్ ఇంజనీరింగ్, ఫార్మసీ కోర్సుల్లో ప్రవేశాల కోసం నిర్వహించే టీజీ పీజీఈసెట్-2026 ప్రవేశ పరీక్షల షెడ్యూల్ను జవహర్లాల్ నెహ్రూ సాంకేతిక విశ్వవిద్యాలయం హైదరాబాద్ మరియు తెలంగాణ ఉన్నత విద్యామండలి సంయుక్తంగా విడుదల చేశాయి. ఈ ఏడాది మే 28 నుంచి మే 31 వరకు మొత్తం 4 రోజుల పాటు ఈ ప్రవేశ పరీక్షలు నిర్వహించనున్నట్లు అధికారులు వెల్లడించారు. రాష్ట్రవ్యాప్తంగా ఇంజనీరింగ్, ఫార్మసీ ఉన్నత విద్య కోర్సుల్లో ప్రవేశాల కోసం పోటీపడుతున్న విద్యార్థులు ఈ పరీక్షలకు భారీగా దరఖాస్తు చేసుకున్నారు. మొత్తం 19 విభాగాలకు గానూ ఈసారి 26,005 మంది అభ్యర్థులు నమోదు కావడం విశేషంగా మారింది. సాంకేతిక విద్యపై యువత ఆసక్తి ఏ స్థాయిలో పెరిగిందో ఈ గణాంకాలు స్పష్టం చేస్తున్నాయి.
ఈసారి అత్యధికంగా కంప్యూటర్ సైన్స్ అండ్ ఇన్ఫర్మేషన్ టెక్నాలజీ విభాగానికి 10,006 మంది అభ్యర్థులు దరఖాస్తు చేసుకున్నారు. అలాగే ఫార్మసీ విభాగానికి 8,248 మంది విద్యార్థులు నమోదు చేసుకున్నారు. మరోవైపు టెక్స్టైల్ టెక్నాలజీ విభాగానికి కేవలం 10 మంది మాత్రమే దరఖాస్తు చేయడం ఆసక్తికరంగా మారింది. ప్రస్తుతం ఉద్యోగ అవకాశాలు ఎక్కువగా ఉన్న సాంకేతిక కోర్సుల వైపు విద్యార్థులు అధికంగా మొగ్గుచూపుతున్నట్లు విద్యా నిపుణులు అభిప్రాయపడుతున్నారు.
ప్రవేశ పరీక్షలు ప్రతిరోజూ రెండు విడతల్లో నిర్వహించనున్నారు. మొదటి విడత ఉదయం 10 గంటల నుంచి మధ్యాహ్నం 12 గంటల వరకు కొనసాగుతుంది. రెండో విడత మధ్యాహ్నం 2 గంటల నుంచి సాయంత్రం 4 గంటల వరకు నిర్వహించనున్నారు. మే 28న ఉదయం విడతలో సెషన్లో జియో-ఇంజనీరింగ్ & జియో-ఇన్ఫర్మాటిక్స్, ఫార్మసీ పరీక్షలు జరగనున్నాయి. అదే రోజు మధ్యాహ్నం సెషన్లో సివిల్ ఇంజనీరింగ్ పరీక్ష నిర్వహించనున్నారు. మే 29న ఉదయం సెషన్లో ఈసీఈ మరియు బయో-టెక్నాలజీ, మెకానికల్ ఇంజనీరింగ్ పరీక్షలు జరుగుతాయి. మధ్యాహ్నం సెషన్లో ఈఈఈ మరియు ఫుడ్ టెక్నాలజీ, ఏరోస్పేస్ ఇంజనీరింగ్ పరీక్షలు నిర్వహించనున్నారు.
అలాగే మే 30న ఉదయం సెషన్లో ఇన్స్ట్రుమెంటేషన్, కెమికల్, టెక్స్టైల్ టెక్నాలజీ పరీక్షలు జరగనున్నాయి. మధ్యాహ్నం సెషన్లో ఆర్కిటెక్చర్ & ప్లానింగ్ మరియు బయోమెడికల్ ఇంజనీరింగ్ పరీక్షలు నిర్వహించనున్నారు. చివరిదైన మే 31న ఉదయం సెషన్లో మైనింగ్, ఎన్విరాన్మెంటల్ మేనేజ్మెంట్ పరీక్షలు జరుగుతాయి. మధ్యాహ్నం సెషన్లో మెటలర్జికల్, నానోటెక్నాలజీ, కంప్యూటర్ సైన్స్ అండ్ ఇన్ఫర్మేషన్ టెక్నాలజీ విభాగాల పరీక్షలు నిర్వహించనున్నట్లు అధికారులు వెల్లడించారు.
పరీక్షల నిర్వహణకు సంబంధించిన ఏర్పాట్లు ఇప్పటికే తుది దశకు చేరుకున్నాయని అధికారులు తెలిపారు. పరీక్షలకు హాజరయ్యే విద్యార్థులు ముందుగానే తమ ప్రవేశ పత్రాలు, పరీక్షా కేంద్రాల వివరాలు పరిశీలించుకోవాలని సూచించారు. సమయపాలన పాటిస్తూ పరీక్షా కేంద్రాలకు ముందుగానే చేరుకోవాలని, చివరి నిమిషంలో ఇబ్బందులు ఎదురుకాకుండా జాగ్రత్తలు తీసుకోవాలని అధికారులు కోరుతున్నారు. రాష్ట్రవ్యాప్తంగా వేలాది మంది విద్యార్థులు ఇప్పుడు ఈ ప్రవేశ పరీక్షలపైనే దృష్టి సారించారు.
ALSO READ: కోట్లు తెచ్చిన తంట.. షాకిచ్చిన బీసీసీఐ..!
