పశ్చిమ ఆసియాలో రోజురోజుకు పెరుగుతున్న ఉద్రిక్తతలు, అంతర్జాతీయ మార్కెట్లో ముడి చమురు సరఫరాపై నెలకొన్న అనిశ్చిత పరిస్థితుల నేపథ్యంలో భారత్ ఇంధన భద్రతపై మరింత దృష్టి కేంద్రీకరిస్తోంది. విదేశాల నుంచి దిగుమతి చేసుకునే ముడి చమురుపై ఆధారాన్ని తగ్గించేందుకు కేంద్ర ప్రభుత్వం కీలక చర్యలపై ఆలోచిస్తోంది. ఇందులో భాగంగా ప్రస్తుతం పెట్రోల్లో అమల్లో ఉన్న 20 శాతం ఇథనాల్ మిశ్రమాన్ని 25 శాతానికి పెంచే అవకాశాన్ని పరిశీలిస్తున్నట్లు సమాచారం. ఈ నిర్ణయాన్ని ఒకేసారి కాకుండా దశలవారీగా అమలు చేసే అవకాశముందని ప్రభుత్వ వర్గాలు చెబుతున్నాయి. పశ్చిమాసియాలో కొనసాగుతున్న యుద్ధ వాతావరణం, అంతర్జాతీయ స్థాయిలో పెరుగుతున్న చమురు ధరలు భారత్కు పెద్ద సవాలుగా మారుతున్న నేపథ్యంలో దేశీయ ఇంధన భద్రతను బలోపేతం చేయాల్సిన అవసరం ఏర్పడిందని కేంద్ర ప్రభుత్వం భావిస్తోంది.
ప్రస్తుతం అమల్లో ఉన్న 20 శాతం ఇథనాల్ మిశ్రమ విధానం వల్ల దేశానికి గణనీయమైన ప్రయోజనం చేకూరిందని ప్రభుత్వ వర్గాలు వెల్లడిస్తున్నాయి. ఈ విధానం కారణంగా ప్రతి ఏడాది సుమారు 45 మిలియన్ బ్యారెళ్ల ముడి చమురు దిగుమతులు తగ్గినట్లు అంచనా వేస్తున్నారు. దీని ద్వారా దాదాపు రూ.1.5 లక్షల కోట్ల విదేశీ మారక ద్రవ్యం ఆదా అయినట్లు తెలుస్తోంది. అయితే ఇథనాల్ మిశ్రమాన్ని మరింత పెంచే విషయంలో కేంద్ర ప్రభుత్వం జాగ్రత్తగా వ్యవహరిస్తోంది. ముఖ్యంగా వాహనాల మైలేజీపై పడే ప్రభావం, ఇంజిన్ పనితీరు, దీర్ఘకాలిక వినియోగంలో తలెత్తే సమస్యలు వంటి అంశాలపై నిపుణులతో కలిసి అధ్యయనాలు కొనసాగిస్తున్నట్లు సమాచారం. ముఖ్యంగా పాత వాహనాల్లో అధిక ఇథనాల్ మిశ్రమం వల్ల ఎలాంటి ప్రభావం ఉంటుందనే దానిపై ప్రత్యేకంగా పరిశీలనలు జరుగుతున్నాయి. వాహన వినియోగదారులకు ఇబ్బందులు తలెత్తకుండా అన్ని కోణాల్లో అధ్యయనం చేసిన తర్వాతే తుది నిర్ణయం తీసుకునే అవకాశం ఉందని తెలుస్తోంది.
మరోవైపు దేశీయంగా చమురు శుద్ధి సామర్థ్యాన్ని పెంచే దిశగా కూడా భారత్ వేగంగా అడుగులు వేస్తోంది. ఇప్పటికే బార్మర్ రిఫైనరీ కార్యకలాపాలు ప్రారంభమయ్యాయి. అలాగే నుమాలిగఢ్ రిఫైనరీ విస్తరణ పనులు కొనసాగుతున్నాయి. అదనంగా మహారాష్ట్ర, గుజరాత్ రాష్ట్రాల్లో కొత్త రిఫైనరీ ప్రాజెక్టులు నిర్మాణ దశలో ఉన్నాయి. భవిష్యత్తులో ప్రపంచవ్యాప్తంగా సరఫరా అంతరాయాలు ఏర్పడిన సందర్భాల్లో దేశానికి తగినంత చమురు నిల్వలు ఉండేలా వ్యూహాత్మక పెట్రోలియం నిల్వలను కూడా కేంద్ర ప్రభుత్వం బలోపేతం చేస్తోంది. ప్రపంచ మార్కెట్పై పూర్తిగా ఆధారపడకుండా దేశీయ సామర్థ్యాలను పెంచే దిశగా కేంద్రం ప్రణాళికలు రూపొందిస్తోంది.
ఇంధన రంగ నిపుణుల అభిప్రాయం ప్రకారం.. పునరుత్పాదక ఇంధనం, జీవ ఇంధనాలు, హరిత హైడ్రోజన్ వంటి ప్రత్యామ్నాయ ఇంధన వనరులు ఇప్పుడు కేవలం పర్యావరణ పరిరక్షణ కోసమే కాకుండా దేశ ఆర్థిక భద్రతకు కూడా అత్యంత కీలకంగా మారుతున్నాయి. అంతర్జాతీయ మార్కెట్లో చమురు ధరల హెచ్చుతగ్గుల ప్రభావాన్ని తగ్గించాలంటే స్వచ్ఛమైన ఇంధన వినియోగాన్ని వేగంగా పెంచాల్సిన అవసరం ఉందని వారు సూచిస్తున్నారు. దీర్ఘకాలంలో భారత్ ఇంధన రంగంలో స్వయం సమృద్ధి సాధించాలంటే ఇథనాల్, బయో ఇంధనాలు, హరిత హైడ్రోజన్ వంటి రంగాలపై భారీగా పెట్టుబడులు పెట్టాల్సిన అవసరం ఉందని విశ్లేషకులు అభిప్రాయపడుతున్నారు.
ALSO READ: మళ్లీ తగ్గిన బంగారం ధరలు
