వంటగదిలో తరచూ ఎదురయ్యే ప్రధాన సమస్యల్లో గ్యాస్ సిలిండర్ ఎప్పుడు ఖాళీ అవుతుందో తెలియకపోవడం ఒకటి. ముఖ్యంగా వంట మధ్యలో సిలిండర్ ఖాళీ అయితే ఇబ్బంది మరింత ఎక్కువగా ఉంటుంది. ఈ సమస్యకు పరిష్కారమంటూ సోషల్ మీడియాలో ఓ దేశీ జుగాడ్ వీడియో వైరల్ అవుతోంది. Instagram లో @salve_6717 అనే ఖాతా షేర్ చేసిన ఈ వీడియోకు ఇప్పటికే కోట్లలో వ్యూస్ రావడంతో ఇది చర్చనీయాంశంగా మారింది.
ఈ వీడియోలో చూపించిన విధానం చాలా సింపుల్గా కనిపించినా, ఆసక్తిని రేకెత్తిస్తోంది. ముందుగా గ్యాస్ సిలిండర్ను తడి గుడ్డతో పూర్తిగా తుడవాలి. రెండు నిమిషాల తర్వాత గమనిస్తే, సిలిండర్లో గ్యాస్ లేని పైభాగం త్వరగా ఆరిపోతుందని, గ్యాస్ ఉన్న కింది భాగం మాత్రం కొంతసేపు తేమగా కనిపిస్తుందని చెబుతున్నారు. ఈ తేడా ఆధారంగా సిలిండర్లో ఎంత గ్యాస్ మిగిలి ఉందో అంచనా వేయొచ్చని వీడియోలో వివరించారు.
ఈ ట్రిక్ వైరల్ కావడంతో నెటిజన్లు తమదైన స్టైల్లో స్పందిస్తున్నారు. కొందరు దీనిని ఆసక్తికరంగా చూస్తుండగా, మరికొందరు సరదాగా కామెంట్లు చేస్తున్నారు. “తడి గుడ్డతో తుడిస్తే సిలిండర్ శుభ్రపడుతుంది కానీ గ్యాస్ లెవల్ ఎలా తెలుస్తుంది?” అని కొందరు సందేహం వ్యక్తం చేస్తే, “మా ఇంట్లో అయితే సిలిండర్ ఎత్తి చూస్తే చాలు అర్థమైపోతుంది” అంటూ మరికొందరు సరదాగా స్పందిస్తున్నారు. ఇంకొందరు “గ్యాస్ సంగతి పక్కనపెడితే సిలిండర్ మాత్రం మెరిసిపోతోంది” అంటూ వ్యంగ్యంగా కామెంట్లు చేస్తున్నారు.
అయితే ఈ పద్ధతిపై నిపుణులు మాత్రం జాగ్రత్తగా ఉండాలని సూచిస్తున్నారు. ఈ విధానం శాస్త్రీయంగా నిరూపితమైనది కాదని వారు స్పష్టం చేస్తున్నారు. సిలిండర్ ఎక్కడ త్వరగా ఆరిపోతుందనేది గది ఉష్ణోగ్రత, గాలి ప్రసరణ, వాతావరణ పరిస్థితులపై ఆధారపడి ఉండొచ్చని చెబుతున్నారు. కాబట్టి కేవలం ఈ పద్ధతిని నమ్మి గ్యాస్ లెవల్ను నిర్ణయించడం సరైనది కాదని హెచ్చరిస్తున్నారు.
గ్యాస్ ఎంత మిగిలి ఉందో ఖచ్చితంగా తెలుసుకోవాలంటే బరువు కొలవడం లేదా ప్రెజర్ గేజ్ వంటి పరికరాలను ఉపయోగించడం ఉత్తమమని సూచిస్తున్నారు. ఇవి మాత్రమే విశ్వసనీయమైన మార్గాలని నిపుణులు చెబుతున్నారు.
మొత్తానికి సోషల్ మీడియాలో వైరల్ అవుతున్న ఈ దేశీ జుగాడ్ ఆసక్తికరంగా ఉన్నా, దాన్ని పూర్తిగా నమ్మడం కంటే శాస్త్రీయ పద్ధతులను అనుసరించడం మంచిదని నిపుణులు సూచిస్తున్నారు.
ALSO READ: AP EAPCET 2026 దరఖాస్తు గడువు మళ్లీ పెంపు!