క్రైమ్ మిర్రర్, హెల్త్ న్యూస్:- ఈ రోజుల్లో అధిక రక్తపోటు సమస్య చిన్నవాళ్లలో కూడా ఎక్కువగా కనిపిస్తోంది. ఒకప్పుడు వయసు పెరిగిన తర్వాత మాత్రమే వచ్చే సమస్యగా భావించిన బీపీ.. ఇప్పుడు యువతను కూడా వేధిస్తోంది. వైద్య నిపుణులు దీనిని “సైలెంట్ కిల్లర్” అని పిలుస్తున్నారు. ఎందుకంటే చాలా మందికి ఎలాంటి లక్షణాలు కనిపించకపోయినా లోపల శరీరాన్ని నెమ్మదిగా దెబ్బతీస్తుంది. గుండె, మెదడు, కిడ్నీలు, రక్తనాళాలపై తీవ్ర ప్రభావం చూపించే ప్రమాదం ఉంటుంది.
ఈ లక్షణాలు కనిపిస్తే వెంటనే జాగ్రత్త!
వైద్య నిపుణుల ప్రకారం బీపీ పెరగడానికి జీవనశైలిలోని కొన్ని చెడు అలవాట్లు ప్రధాన కారణాలుగా మారుతున్నాయి. ముఖ్యంగా రోజంతా కూర్చొని పనిచేయడం, శారీరక శ్రమ లేకపోవడం, వ్యాయామం చేయకపోవడం వల్ల గుండె బలహీనపడుతుంది. దీంతో రక్తనాళాలపై ఒత్తిడి పెరిగి బీపీ ఎక్కువయ్యే ప్రమాదం ఉంటుంది.
అలాగే తినే ఆహారం కూడా బీపీపై భారీ ప్రభావం చూపుతుంది. ఈ రోజుల్లో చాలామంది ఫాస్ట్ ఫుడ్స్, ప్రాసెస్ చేసిన ఆహారం, ప్యాకెట్ స్నాక్స్ ఎక్కువగా తీసుకుంటున్నారు. వీటిలో ఉప్పు శాతం అధికంగా ఉంటుంది. ఎక్కువ ఉప్పు తీసుకోవడం వల్ల శరీరంలో నీరు నిల్వ అవుతుంది. దీంతో గుండె ఎక్కువగా పని చేయాల్సి వస్తుంది. అదే సమయంలో పండ్లు, కూరగాయలు, పొటాషియం ఉన్న ఆహారం తక్కువగా తీసుకోవడం కూడా బీపీ నియంత్రణను కష్టతరం చేస్తుంది.
ఒత్తిడి కూడా బీపీ పెరగడానికి మరో ప్రధాన కారణం. పని ఒత్తిడి, నిద్రలేమి, ఎప్పుడూ మొబైల్ లేదా కంప్యూటర్ ముందు ఉండటం వల్ల శరీరంలో హార్మోన్ల మార్పులు వస్తాయి. దీని ప్రభావం రక్తపోటుపై పడుతుంది. కొంతమందిలో ఇది తాత్కాలికంగా ప్రారంభమై తర్వాత స్థిరమైన సమస్యగా మారే అవకాశం ఉంటుంది.చాలామందికి బీపీ ఉన్నా ఎలాంటి లక్షణాలు కనిపించవు. అయితే బీపీ చాలా ఎక్కువైతే కొన్ని హెచ్చరికలు కనిపిస్తాయి. ఉదయాన్నే తలనొప్పి రావడం, తల తిరగడం, చూపు మసకబారడం, ఛాతీలో అసౌకర్యం, శ్వాస తీసుకోవడంలో ఇబ్బంది, గుండె వేగంగా కొట్టుకోవడం, ముక్కు నుంచి రక్తం రావడం వంటి లక్షణాలు కనిపించవచ్చు. ఇవి నిర్లక్ష్యం చేస్తే గుండెపోటు లేదా స్ట్రోక్ ప్రమాదం పెరుగుతుంది.
అయితే చిన్న చిన్న జీవనశైలి మార్పులతోనే బీపీని చాలా వరకు నియంత్రించవచ్చని వైద్యులు చెబుతున్నారు. రోజూ కనీసం 30 నిమిషాలు నడవడం, ఉప్పు తగ్గించడం, సరైన నిద్రపోవడం, ఒత్తిడిని తగ్గించుకోవడం, పొగ తాగడం మరియు మద్యం మానేయడం వల్ల మంచి ఫలితాలు ఉంటాయి.కుటుంబంలో బీపీ హిస్టరీ ఉన్నవారు, డయాబెటిస్ లేదా అధిక బరువు ఉన్నవారు తప్పనిసరిగా రెగ్యులర్గా బీపీ చెక్ చేయించుకోవాలని నిపుణులు సూచిస్తున్నారు.
