తెలుగు సినీ చరిత్రలో ప్రయోగాలకు, సాహసానికి ప్రతీకగా నిలిచిన హీరో కృష్ణ తన కెరీర్లో ఎన్నో మైలురాళ్లు నెలకొల్పారు. సూపర్ స్టార్గా గుర్తింపు పొందిన ఆయన, కొత్త సాంకేతికతలను పరిచయం చేస్తూ ప్రేక్షకులను ఆశ్చర్యపరిచిన వ్యక్తిగా నిలిచారు. తెలుగులో తొలి గూఢచారి తరహా చిత్రం గూఢచారి 116తో సంచలనం సృష్టించిన ఆయన, మోసగాళ్లకు మోసగాడు వంటి తొలి కౌబాయ్ సినిమాతో కొత్త ట్రెండ్ తీసుకువచ్చారు. అలాగే అల్లూరి సీతారామరాజు వంటి చారిత్రక చిత్రంతో ప్రేక్షకుల మన్ననలు పొందారు. ఈ ప్రయోగాల పరంపరలోనే ఆయన దర్శకత్వంలో తెరకెక్కిన సింహాసనం చిత్రం ఒక ప్రత్యేక స్థానం సంపాదించుకుంది.
1986 మార్చి 21న విడుదలైన ఈ చిత్రం సాంకేతికంగా కూడా అద్భుతంగా నిలిచింది. తెలుగులో తొలి 70 ఎంఎం 6 ట్రాక్ స్టీరియోఫోనిక్ సౌండ్తో రూపొందిన చిత్రంగా ఇది చరిత్రలో నిలిచిపోయింది. విడుదలైన వెంటనే భారీ స్పందనను అందుకున్న ఈ చిత్రం, కృష్ణ కెరీర్లో ఒక కీలక మలుపు తిప్పిన సినిమాగా గుర్తింపు పొందింది. విడుదలై 40 సంవత్సరాలు పూర్తయినా ఈ సినిమాకు ఉన్న ప్రాచుర్యం ఇప్పటికీ తగ్గలేదు.
కథ పరంగా చూస్తే.. దశార్ణ రాజ్యానికి చెందిన సైన్యాధిపతి విక్రమసింహ పాత్రలో కృష్ణ నటన ఆకట్టుకుంటుంది. అతని ప్రతిభను గుర్తించిన రాజు క్షేమేంద్ర భూపతి భవానీ ఖడ్గాన్ని బహుమతిగా అందజేస్తాడు. ఇదే సమయంలో యువరాణి అలకనందాదేవి పాత్రలో జయప్రద విక్రమసింహపై ప్రేమ పెంచుకుంటుంది. కానీ రాజ్యంలోని మంత్రి భేరుండ శ్ పాత్రలో ప్రభాకర్ రెడ్డి చేసిన కుట్రల వల్ల విక్రమసింహ రాజ్య బహిష్కరణకు గురవుతాడు. అనంతరం అతని జీవితం ఎలా మలుపుతిరిగింది, తిరిగి రాజ్యంలోకి ఎలా ప్రవేశించాడు అనేదే కథలో ప్రధానాంశం.
వాణిజ్య పరంగా కూడా ఈ చిత్రం అద్భుత విజయాన్ని సాధించింది. విడుదలైన మొదటి వారంలోనే రూ.1.5 కోట్లకు పైగా వసూళ్లు సాధించడం అప్పటి పరిస్థితుల్లో ఒక పెద్ద రికార్డుగా నిలిచింది. విశాఖపట్నం, విజయవాడ, హైదరాబాద్ వంటి ప్రధాన కేంద్రాల్లో 100 రోజులకు పైగా ప్రదర్శించబడింది. మద్రాసులో శతదినోత్సవం జరుపుకున్న తొలి తెలుగు చిత్రంగా కూడా ఇది ప్రత్యేక గుర్తింపు పొందింది.
ఈ చిత్రానికి వచ్చిన అపార స్పందన వల్ల థియేటర్ల వద్ద భారీ రద్దీ నెలకొంది. ట్రాఫిక్ సమస్యలను నియంత్రించేందుకు ప్రత్యేక చర్యలు తీసుకోవాల్సి వచ్చింది. విజయవాడలోని కొన్ని థియేటర్ల వద్ద 144 సెక్షన్ విధించాల్సి రావడం ఆ కాలంలో సంచలనంగా మారింది. టికెట్ ఉన్నవారినే థియేటర్ ప్రాంతాల్లోకి అనుమతించే పరిస్థితి ఏర్పడింది. ఒక సినిమా కోసం 144 సెక్షన్ అమలు చేయడం ఇదే తొలిసారి కావడం విశేషం.
