టాలీవుడ్లోనే కాకుండా ప్రపంచవ్యాప్తంగా భారీ అంచనాలు నెలకొల్పిన చిత్రం ‘వారణాసి’. దర్శకధీరుడు ఎస్.ఎస్. రాజమౌళి, సూపర్ స్టార్ మహేశ్ బాబు కలయికలో తెరకెక్కుతున్న ఈ సినిమాపై అభిమానుల్లో భారీ ఆసక్తి నెలకొంది. ఇప్పటికే విడుదలైన ప్రచార చిత్రాలు, సినిమా విశేషాలు ప్రేక్షకుల్లో అంచనాలను పెంచగా.. తాజాగా చిత్ర బృందం మరో కీలక ప్రకటన చేసింది.
‘వారణాసి’ సినిమా షూటింగ్ పూర్తయినట్లు మేకర్స్ అధికారికంగా వెల్లడించారు. ఈ విషయాన్ని సినిమా అధికారిక సోషల్ మీడియా ఖాతా ద్వారా అభిమానులతో పంచుకున్నారు. ప్రస్తుతం చిత్ర నిర్మాణంలో తదుపరి కీలకమైన పోస్ట్ ప్రొడక్షన్ పనులు కొనసాగుతున్నాయని తెలిపారు. ముఖ్యంగా విజువల్ ఎఫెక్ట్స్, రీ-రికార్డింగ్ పనులపై చిత్ర బృందం దృష్టి సారించింది. త్వరలోనే డబ్బింగ్ కార్యక్రమాలు కూడా ప్రారంభం కానున్నట్లు వెల్లడించింది.
షూటింగ్ పూర్తవడంతో సినిమా నిర్మాణంలో ఒక ముఖ్యమైన దశ ముగిసినట్లయింది. అయితే మేకర్స్ చేసిన ప్రకటనలో మరో ఆసక్తికరమైన అంశం అభిమానుల దృష్టిని ఆకర్షించింది. ప్రస్తుతం వెల్లడించిన విషయాలు కేవలం ప్రారంభ సమాచారం మాత్రమేనని, అసలైన సర్ప్రైజ్ కోసం మరికొంత సమయం వేచి చూడాలని చిత్ర బృందం సంకేతాలిచ్చింది.
దీంతో రాజమౌళి తదుపరి విడుదల చేయబోయే అప్డేట్ ఏమై ఉంటుందనే చర్చ మొదలైంది. సినిమాలో మహేశ్ బాబు పోషిస్తున్న పాత్రకు సంబంధించిన కొత్త లుక్ను విడుదల చేస్తారా? లేక ప్రత్యేకమైన గ్లింప్స్, మేకింగ్ వీడియోతో ప్రేక్షకులకు సర్ప్రైజ్ ఇస్తారా? అనే ఊహాగానాలు సోషల్ మీడియాలో వినిపిస్తున్నాయి. అయితే ఈ విషయంపై చిత్ర బృందం నుంచి ఇప్పటివరకు ఎలాంటి స్పష్టత రాలేదు.
‘బాహుబలి’, ‘ఆర్ఆర్ఆర్’ చిత్రాలతో భారతీయ సినిమాకు అంతర్జాతీయ స్థాయిలో గుర్తింపు తీసుకొచ్చిన రాజమౌళి.. ఈసారి మహేశ్ బాబుతో ఎలాంటి అద్భుతాన్ని ఆవిష్కరించబోతున్నారనే ఆసక్తి సినీ అభిమానుల్లో నెలకొంది. భారీ స్థాయిలో తెరకెక్కుతున్న ఈ గ్లోబల్ అడ్వెంచర్ థ్రిల్లర్ను 2027 ఏప్రిల్ 7న ప్రపంచవ్యాప్తంగా విడుదల చేయాలని చిత్ర నిర్మాతలు లక్ష్యంగా పెట్టుకున్నారు.
షూటింగ్ పూర్తవడంతో ఇప్పుడు అందరి దృష్టి పోస్ట్ ప్రొడక్షన్ పనులు, తదుపరి ప్రచార కార్యక్రమాలపై పడింది. ముఖ్యంగా మేకర్స్ చెప్పిన ఆ సర్ప్రైజ్ ఏమిటో తెలియాలంటే మరికొంత కాలం వేచి చూడాల్సిందే.
also read: “సోషల్ మీడియా కూడా ఒక వ్యసనమే”.. కీలక వ్యాఖ్యలు చేసిన ఆర్ఎస్ఎస్ చీఫ్ మోహన్ భగవత్
