సమంత ప్రధాన పాత్రలో నటించిన తాజా చిత్రం ‘మా ఇంటి బంగారం’ విడుదలైన తొలి రోజు నుంచే బాక్సాఫీస్ వద్ద సంచలన ప్రదర్శన కొనసాగిస్తోంది. ట్రాలాలా పిక్చర్స్ పతాకంపై సమంత, రాజ్ నిడిమోరు, హిమాంక్ దువ్వూరు సంయుక్తంగా నిర్మించిన ఈ చిత్రానికి నందినీ రెడ్డి దర్శకత్వం వహించారు. జూన్ 19న ప్రపంచవ్యాప్తంగా ఘనంగా విడుదలైన ఈ సినిమా ప్రేక్షకుల నుంచి విశేష ఆదరణను సొంతం చేసుకుంటూ విజయవంతంగా ప్రదర్శితమవుతోంది. మొదటి ప్రదర్శన నుంచే ప్రేక్షకులతో పాటు సినీ విమర్శకుల నుంచి కూడా అద్భుతమైన స్పందన రావడం చిత్రబృందానికి మరింత ఉత్సాహాన్ని కలిగిస్తోంది. ముఖ్యంగా సమంత నటన ఈ సినిమాకు ప్రధాన బలంగా నిలిచిందనే అభిప్రాయాలు వ్యక్తమవుతున్నాయి. భావోద్వేగాలతో పాటు యాక్షన్ సన్నివేశాల్లో ఆమె చూపించిన ప్రతిభ ప్రేక్షకులను విశేషంగా ఆకట్టుకుంటోంది. ముఖ్యంగా ఆమె పాల్గొన్న పోరాట ఘట్టాలు థియేటర్లలో ప్రత్యేక ఆకర్షణగా మారాయి.
విడుదలకు ముందే విదేశీ మార్కెట్లలో బలమైన ముందస్తు బుకింగ్స్ నమోదు చేసిన ఈ చిత్రం, విడుదల తర్వాత వచ్చిన అద్భుతమైన స్పందనతో మరింత వేగంగా దూసుకుపోతోంది. ప్రపంచవ్యాప్తంగా ఈ వారాంతంలో సినిమాను చూసేందుకు ప్రేక్షకులు ఆసక్తి చూపుతున్నట్లు ట్రేడ్ వర్గాలు పేర్కొంటున్నాయి. తొలి రోజే ప్రపంచవ్యాప్తంగా రూ.13.15 కోట్ల గ్రాస్ వసూలు చేసిన ఈ చిత్రం సమంత కెరీర్లోనే అత్యధిక ప్రారంభ వసూళ్లు సాధించిన సినిమాగా నిలిచినట్లు సమాచారం. ముఖ్యంగా మహిళా ప్రేక్షకుల నుంచి విశేష ఆదరణ లభిస్తుండటం చిత్ర విజయానికి మరింత బలం చేకూరుస్తోంది. మాస్ అంశాలు, ఉత్కంఠభరితమైన యాక్షన్ ఘట్టాలు, ప్రారంభం నుంచి ముగింపు వరకు భావోద్వేగాలతో నిండిన కథనం ప్రేక్షకులను ఆకట్టుకుంటున్నాయని సినీ వర్గాలు చెబుతున్నాయి.
రెండో రోజు కూడా ఈ సినిమాకు బలమైన వసూళ్లు నమోదైనట్లు సమాచారం. రెండు రోజుల వ్యవధిలో ‘మా ఇంటి బంగారం’ ప్రపంచవ్యాప్తంగా సుమారు రూ.25 కోట్ల గ్రాస్ వసూలు చేసినట్లు ప్రచారం జరుగుతోంది. ఈ స్థాయి ప్రారంభ వసూళ్లు ట్రేడ్ విశ్లేషకులను కూడా ఆశ్చర్యానికి గురి చేస్తున్నాయి. వారి అంచనాల ప్రకారం ఈ చిత్రం కేవలం వారాంతానికే పరిమితం కాకుండా వచ్చే రోజుల్లో కూడా బాక్సాఫీస్ వద్ద తన జోరును కొనసాగించే అవకాశాలు కనిపిస్తున్నాయి. ప్రధాన కేంద్రాల్లో మంచి ఆక్యుపెన్సీ నమోదు కావడంతో పాటు ప్రేక్షకుల నుంచి వస్తున్న సానుకూల స్పందన కారణంగా అనేక ప్రాంతాల్లో అదనపు ప్రదర్శనలను ఏర్పాటు చేస్తున్నట్లు తెలుస్తోంది.
థియేటర్ల వద్ద కనిపిస్తున్న సందడి, హౌస్ఫుల్ ప్రదర్శనలు, ప్రేక్షకుల ఉత్సాహభరిత స్పందన, అలాగే సోషల్ మీడియాలో కొనసాగుతున్న ప్రశంసల వర్షం ‘మా ఇంటి బంగారం’ను ఈ ఏడాది అత్యంత విజయవంతమైన చిత్రాల్లో ఒకటిగా నిలబెట్టే సూచనలు కనిపిస్తున్నాయి. ప్రస్తుతం కొనసాగుతున్న ధోరణి ఇలాగే కొనసాగితే రాబోయే రోజుల్లో ఈ చిత్రం మరిన్ని బాక్సాఫీస్ రికార్డులను తన ఖాతాలో వేసుకునే అవకాశాలు ఉన్నాయని సినీ విశ్లేషకులు భావిస్తున్నారు. ఈ చిత్రానికి సంతోష్ నారాయణన్ సంగీతం అందించగా, ఓం ప్రకాష్ ఛాయాగ్రాహకుడిగా, ధర్మేంద్ర కాకర్ల ఎడిటర్గా పని చేశారు. సమంతతో పాటు శ్రీనివాస గవిరెడ్డి, మంజూష, దిగంత్, గుల్షన్ దేవయ్య, శ్రీముఖి, గౌతమీ, ఆనంద్, లక్ష్మీ తదితరులు ఈ చిత్రంలో కీలక పాత్రలు పోషించారు.
ALSO READ: నీట్కు హైటెక్ కవచం
