మారుతున్న కాలానికి అనుగుణంగా మనిషి ఆలోచనా విధానం, జీవనశైలి గణనీయంగా మారిపోతున్నాయి. ఒకప్పుడు వివాహం అంటే ఉమ్మడి కుటుంబం, పిల్లల సందడి, బాధ్యతలతో నిండిన జీవితం గుర్తుకొచ్చేది. కానీ ఇప్పుడు ముఖ్యంగా మెట్రో నగరాల్లో కొత్త తరహా జీవన విధానం ప్రాచుర్యంలోకి వస్తోంది. దంపతులిద్దరూ సంపాదిస్తూ, పిల్లల బాధ్యతలను తీసుకోకుండా తమ జీవితాన్ని తమకు నచ్చిన విధంగా తీర్చిదిద్దుకునే విధానాన్ని డింక్ జీవనశైలి అని పిలుస్తున్నారు. ఈ విధానం వేగంగా విస్తరిస్తోందని ఐజారెస్మ్ (IJARESM) నిర్వహించిన అధ్యయనంలో వెల్లడైంది. సంపాదన, స్వేచ్ఛ, వ్యక్తిగత అభిరుచులు ప్రధానంగా మారిన ఈ తరహా జీవన విధానం యువతలో ఎక్కువగా ఆకర్షణీయంగా మారుతోంది.
ఈ జీవనశైలిలో ముఖ్యమైన అంశం ఆర్థిక స్వేచ్ఛ. దంపతులిద్దరూ ఉద్యోగాలు చేస్తుండటంతో ఆదాయం రెట్టింపు అవుతుంది. పిల్లల పెంపకం, విద్య, ఆరోగ్య ఖర్చులు లేకపోవడం వల్ల పెద్ద మొత్తంలో డబ్బును పొదుపు చేయడానికి వీలవుతుంది. చిన్న వయసులోనే పెట్టుబడులు పెట్టడం ద్వారా వడ్డీపై వడ్డీ లాభాలను పొందుతూ ఆర్థికంగా త్వరగా స్థిరపడుతున్నారు. అందువల్ల 40 నుండి 45 ఏళ్ల వయసులోనే ఉద్యోగ విరమణ చేసి సుఖవంతమైన జీవితం గడపగల అవకాశాలు పెరుగుతున్నాయి. కెరీర్ విషయంలో కూడా వీరికి ఎలాంటి అడ్డంకులు ఉండవు. ఒక నగరం నుంచి మరో నగరానికి లేదా విదేశాలకు మారడంలో ఎలాంటి ఇబ్బందులు ఉండవు. కొత్త వ్యాపారాలు ప్రారంభించాలన్నా భయం తక్కువగా ఉంటుంది.
ఇక జీవన ప్రమాణాల విషయానికి వస్తే.. పిల్లల బాధ్యతలు లేకపోవడం వల్ల దంపతులు ఒకరితో ఒకరు గడిపే సమయం ఎక్కువగా ఉంటుంది. తమ అభిరుచులను పంచుకోవడం, వ్యక్తిగత అభివృద్ధిపై దృష్టి పెట్టడం సులభమవుతుంది. సంప్రదాయ కుటుంబ వ్యవస్థలో ఉండే ఒత్తిడులు లేకపోవడం వల్ల ఎలాంటి నిర్ణయాలైనా స్వేచ్ఛగా తీసుకునే అవకాశముంటుంది. ప్రయాణాలు చేయడం, ఆరోగ్యాన్ని కాపాడుకోవడం, జీవితం ఆనందంగా గడపడం వంటి విషయాల్లో ఎలాంటి రాజీ పడాల్సిన అవసరం ఉండదు. తక్కువ బాధ్యతలతో మానసిక ప్రశాంతత కూడా ఎక్కువగా ఉంటుందని నిపుణులు చెబుతున్నారు.
అయితే ఈ జీవన విధానానికి కొన్ని ప్రతికూలతలు కూడా ఉన్నాయి. వయస్సు పెరిగిన తర్వాత ఆరోగ్య సమస్యలు వచ్చినప్పుడు లేదా శారీరకంగా బలహీనత ఏర్పడినప్పుడు భావోద్వేగంగా తోడుగా ఉండే వ్యక్తులు లేకపోవడం ఒక పెద్ద లోటుగా అనిపించవచ్చు. మన సమాజంలో ఇప్పటికీ పిల్లలు లేకపోవడాన్ని కొంతమంది విమర్శాత్మకంగా చూడటం వల్ల సామాజిక ఒత్తిడి ఎదురయ్యే అవకాశం ఉంది. అలాగే జీవితాంతం సంపాదించిన ఆస్తిని ఎవరికీ అప్పగించాలి అనే విషయంలో సందిగ్ధతలు ఉండవచ్చు. అందువల్ల ఈ జీవనశైలిని ఎంచుకునే వారు భవిష్యత్తులో ఎదురయ్యే పరిస్థితులను ముందుగానే అంచనా వేసుకుని నిర్ణయం తీసుకోవడం అవసరం. మొత్తానికి ఇది పూర్తిగా వ్యక్తిగత నిర్ణయం. ఈ జీవన విధానం ఇచ్చే ఆర్థిక స్వేచ్ఛను ఆస్వాదిస్తూ, భవిష్యత్తు ఒంటరితనాన్ని కూడా సమర్థంగా ఎదుర్కొనే సిద్ధత ఉండాలి.
ALSO READ: ఆధార్, పాన్ లేకుండానే ఆటోమెటిక్గా కేవైసీ ప్రాసెస్.. ఎలా అంటే?