నగరాల్లో సొంత ఇల్లు అనేది చాలా మంది మధ్యతరగతి కుటుంబాల కల. అయితే భూమి ధరలు, నిర్మాణ వ్యయాలు, గృహాల కొనుగోలు ఖర్చులు భారీగా పెరిగిపోవడంతో ఈ కలను నిజం చేసుకోవడం అంత సులభం కావడం లేదు. లక్షల నుంచి కోట్ల రూపాయల వరకు ఖర్చు కావాల్సి రావడంతో సాధారణ కుటుంబాలు ఆర్థిక ఇబ్బందులు ఎదుర్కొంటున్నాయి. ఈ నేపథ్యంలో ఆర్థికంగా వెనుకబడిన, మధ్య ఆదాయ వర్గాల కుటుంబాలకు కేంద్ర ప్రభుత్వం ప్రధానమంత్రి ఆవాస్ యోజన-అర్బన్ 2.0 పథకం ద్వారా చేయూత అందిస్తోంది. ఈ పథకం కింద అర్హులైన లబ్ధిదారులు ఇల్లు నిర్మించుకోవడానికి లేదా కొనుగోలు చేయడానికి రూ.2.5 లక్షల వరకు ఆర్థిక సాయం పొందే అవకాశం ఉంది. అంతేకాకుండా గృహ రుణాలపై వడ్డీ రాయితీ సౌకర్యం కూడా కల్పిస్తోంది.
ప్రధానమంత్రి ఆవాస్ యోజన-అర్బన్ 2.0 పథకం కింద పట్టణ ప్రాంతాల్లో నివసించే బలహీన వర్గాల కుటుంబాలకు ప్రత్యేక ప్రయోజనాలు అందిస్తున్నాయి. సొంతంగా 45 చదరపు మీటర్ల వరకు భూమి కలిగి ఉన్న అర్హులైన కుటుంబాలు ఇంటి నిర్మాణం చేపడితే రూ.2.5 లక్షల వరకు ఆర్థిక సహాయం పొందవచ్చు. అలాగే కొత్త ఇల్లు కొనుగోలు చేయాలనుకునే వారు కూడా ఇదే మొత్తంలో కేంద్ర ప్రభుత్వ సహాయాన్ని పొందే అవకాశం ఉంది. దీంతో గృహ నిర్మాణం లేదా గృహ కొనుగోలు ఖర్చు కొంత మేర తగ్గే అవకాశం ఉంటుంది.
ఇల్లు నిర్మించుకోవడానికి లేదా కొనుగోలు చేయడానికి గృహ రుణం తీసుకునే వారికి కూడా ఈ పథకం ద్వారా ప్రత్యేక ప్రయోజనాలు లభిస్తున్నాయి. సెప్టెంబర్ 1, 2024 లేదా ఆ తర్వాత మంజూరైన గృహ రుణాలకు వడ్డీ రాయితీ సౌకర్యం వర్తిస్తుంది. ఆర్థికంగా బలహీన వర్గాలు, తక్కువ ఆదాయ వర్గాలు, మధ్య ఆదాయ వర్గాలకు చెందిన అర్హులైన కుటుంబాలు ఈ ప్రయోజనం పొందవచ్చు. గృహ రుణంపై కేంద్ర ప్రభుత్వం గరిష్టంగా రూ.1.80 లక్షల వరకు వడ్డీ రాయితీ అందిస్తోంది. దీని వల్ల రుణ భారం గణనీయంగా తగ్గే అవకాశం ఉంటుంది.
ఈ పథకానికి అర్హత సాధించాలంటే కొన్ని నిబంధనలు తప్పనిసరిగా పాటించాలి. ఆర్థికంగా బలహీన వర్గానికి చెందిన కుటుంబాల వార్షిక ఆదాయం రూ.3 లక్షల లోపు ఉండాలి. తక్కువ ఆదాయ వర్గాల వార్షిక ఆదాయం రూ.3 లక్షల నుంచి రూ.6 లక్షల మధ్య ఉండాలి. మధ్య ఆదాయ వర్గాల వార్షిక ఆదాయం రూ.6 లక్షల నుంచి రూ.9 లక్షల మధ్య ఉండాలి. అలాగే దరఖాస్తుదారుడు లేదా అతని కుటుంబ సభ్యుల పేరుపై దేశంలో ఎక్కడా పక్కా ఇల్లు ఉండకూడదు. ఈ నిబంధనలను పూర్తి చేసినవారే పథకానికి అర్హులుగా పరిగణించబడతారు.
అదేవిధంగా వితంతువులు, అవివాహిత మహిళలు, దివ్యాంగులు, వృద్ధులు, ట్రాన్స్జెండర్ వ్యక్తులు, షెడ్యూల్డ్ కులాలు, షెడ్యూల్డ్ తెగలు, మైనారిటీ వర్గాలు మరియు ఇతర బలహీన వర్గాలకు ఈ పథకంలో ప్రాధాన్యత ఇవ్వబడుతోంది. గృహ వసతి లేని కుటుంబాలకు సొంత ఇంటి కలను నెరవేర్చే దిశగా ప్రభుత్వం ప్రత్యేక చర్యలు చేపడుతోంది.
దరఖాస్తు చేసుకునే సమయంలో ఆధార్ కార్డు, బ్యాంకు ఖాతా వివరాలు, ఆదాయ ధ్రువీకరణ పత్రం, కుల ధ్రువీకరణ పత్రం, భూమికి సంబంధించిన పత్రాలు వంటి అవసరమైన పత్రాలు సిద్ధంగా ఉంచుకోవాలి. దరఖాస్తుదారులు ముందుగా తమ అర్హతను పరిశీలించుకుని, ఆధార్ ధ్రువీకరణ పూర్తి చేసిన తర్వాత లబ్ధిదారుల సర్వే దరఖాస్తు పత్రాన్ని నింపాలి. ఇందులో వ్యక్తిగత వివరాలు, కుటుంబ సమాచారం, గృహానికి సంబంధించిన వివరాలు, గృహ రుణ వివరాలను నమోదు చేసి సమర్పించాల్సి ఉంటుంది. ఈ పథకం ద్వారా వేలాది కుటుంబాలు సొంత ఇంటి కలను సాకారం చేసుకునే అవకాశం పొందుతున్నాయి.
ALSO READ: గోదావరి పుష్కరాలు.. మాస్టర్ ప్లాన్ రెడీ
