క్రైమ్ మిర్రర్, స్పోర్ట్స్:- భారత క్రికెట్ దిగ్గజం, చెన్నై సూపర్ కింగ్స్ (CSK) మాజీ కెప్టెన్ మహేంద్ర సింగ్ ధోనీ ఇండియన్ ప్రీమియర్ లీగ్ (IPL) ఆటగాడిగా తన సుదీర్ఘ ప్రయాణానికి వీడ్కోలు పలికారు. గత కొంతకాలంగా ఆయన రిటైర్మెంట్పై సాగుతున్న ఉత్కంఠకు తెరదించుతూ, ధోనీ ఐపీఎల్ నుంచి తప్పుకుంటున్నట్లు అధికారికంగా ప్రకటించారు. ఈ విషయాన్ని చెన్నై సూపర్ కింగ్స్ ఫ్రాంచైజీ కూడా ధృవీకరించింది. అయితే, ఆటగాడిగా తప్పుకున్నప్పటికీ, ధోనీ జట్టును వీడి వెళ్లడం లేదు. ఆయనను జట్టుకు ‘మెంటార్’గా నియమిస్తున్నట్లు CSK యాజమాన్యం ఘనంగా ప్రకటించింది.
ధోనీ నిర్ణయంపై చెన్నై సూపర్ కింగ్స్ యజమాని ఎన్. శ్రీనివాసన్ తీవ్ర భావోద్వేగానికి లోనయ్యారు. ఈ సందర్భంగా ఆయన మాట్లాడుతూ.. “మహేంద్ర సింగ్ ధోనీ లేకుండా అసలు చెన్నై సూపర్ కింగ్స్ అనే జట్టే లేదు. ఐపీఎల్ ప్రారంభమైనప్పటి నుండి గత రెండు దశాబ్దాలుగా ఆయన మాతో కలిసి ఎంతో అద్భుతమైన ప్రయాణం చేశారు. జట్టుకు ఎన్నో చారిత్రాత్మక విజయాలను, ట్రోఫీలను అందించారు. ఆటగాడిగా ఆయన మైదానంలో లేకపోయినా, మెంటార్గా మాతోనే ఉండటం ఎంతో సంతోషంగా ఉంది. చెన్నై సూపర్ కింగ్స్ ఎప్పటికీ ధోనీ సొంత ఇల్లే” అని ఎమోషనల్ వ్యాఖ్యలు చేశారు.
అభిమానుల్లో మిశ్రమ స్పందన..
2008లో ఐపీఎల్ మొదలైనప్పటి నుంచి చెన్నై జట్టుకు వెన్నెముకగా నిలిచిన ధోనీ, జట్టును ఐదుసార్లు ఛాంపియన్గా నిలిపారు. మైదానంలో ఆయన వ్యూహాలు, ప్రశాంతత, చివరి ఓవర్లలో ఫినిషింగ్ షాట్లు ప్రపంచవ్యాప్తంగా కోట్లాది మంది అభిమానులను సంపాదించి పెట్టాయి.ఇకపై మైదానంలో పసుపు రంగు జెర్సీలో నంబర్ 7 ఆటగాడిగా ధోనీ కనిపించరనే వార్త అభిమానులను కొంత నిరాశకు గురిచేసినప్పటికీ, మెంటార్గా డగౌట్లో ఉండి జట్టును నడిపిస్తారనే విషయం వారికి ఊరటనిస్తోంది. ఆటగాడిగా ఒక శకాన్ని ముగించిన ‘తలా’ ధోనీ, మెంటార్గా చెన్నై సూపర్ కింగ్స్కు మరిన్ని విజయాలు అందించాలని అభిమానులు ఆకాంక్షిస్తున్నారు.
