క్రైమ్ మిర్రర్,తెలంగాణ:- తెలంగాణ రాష్ట్ర వ్యాప్తంగా ఉన్న పాఠశాలలు, అలాగే ఇంటర్మీడియట్ కళాశాలలకు దసరా పండుగ సెలవుల షెడ్యూల్ ఖరారైంది. పండుగ నేపథ్యంలో ఈ నెల 10వ తేదీ నుంచి విద్యాసంస్థలకు అధికారికంగా దసరా సెలవులు ప్రారంభం కానున్నాయి. ఈ క్రమంలో రాష్ట్రంలోని అన్ని ప్రభుత్వ, ప్రైవేట్ విద్యాసంస్థల యాజమాన్యాలకు విద్యాశాఖ ఉన్నతాధికారులు కీలక ఆదేశాలు జారీ చేశారు. ప్రభుత్వం ప్రకటించిన హాలిడేస్ షెడ్యూల్‌ను ప్రతి ఒక్క విద్యాసంస్థ కచ్చితంగా పాటించి తీరాలని, అందులో ఎలాంటి మార్పులు చేయడానికి వీల్లేదని అధికారులు స్పష్టం చేశారు.
ముఖ్యంగా, ఈ సెలవు దినాల్లో విద్యార్థులపై చదువుల ఒత్తిడి పెంచేలా విద్యాసంస్థలు ఎలాంటి ప్రత్యేక తరగతులు (స్పెషల్ క్లాసులు) నిర్వహించడానికి వీల్లేదని కఠినంగా ఆదేశించారు. ఈ నిబంధనలను ఉల్లంఘించి క్లాసులు నిర్వహిస్తే సంబంధిత యాజమాన్యాలపై చర్యలు తప్పవని పరోక్షంగా హెచ్చరించారు. దసరా పండుగ ముగిసిన అనంతరం విద్యాసంస్థల పునఃప్రారంభ తేదీలను కూడా అధికారులు వెల్లడించారు. ఇంటర్మీడియట్ కళాశాలలు ఈ నెల 22వ తేదీన తిరిగి తెరుచుకోనుండగా, పాఠశాలలు మాత్రం ఈ నెల 23వ తేదీన పునఃప్రారంభం కానున్నాయి.
మరోవైపు, పొరుగు రాష్ట్రమైన ఆంధ్రప్రదేశ్ విద్యాశాఖ కూడా పండుగ సెలవులపై స్పష్టత ఇచ్చింది. ఏపీలోని పాఠశాలలకు ఈ నెల 10వ తేదీ నుంచి 21వ తేదీ వరకు దసరా సెలవులు ప్రకటించారు. విద్యార్థులు పండుగను తమ కుటుంబ సభ్యులతో సంతోషంగా జరుపుకునేందుకు వీలుగా రెండు రాష్ట్రాల ప్రభుత్వాలు ఈ మేరకు అధికారికంగా నిర్ణయం తీసుకున్నాయి.
పేదల సొంతింటి కలను జగన్ ఛిద్రం చేశారు : కేంద్ర మంత్రి శివరాజ్ సింగ్ చౌహాన్