కాంగ్రెస్ అగ్రనేత రాహుల్ గాంధీకి పుణెలో జరిగిన ఓ కార్యక్రమంలో అనూహ్యమైన అనుభవం ఎదురైంది. విద్యార్థులు, యువత కోసం నిర్వహించిన కార్యక్రమంలో కొందరితో కలిసి ఆయన సెల్ఫీలు దిగుతున్న సమయంలో ఓ యువతి అకస్మాత్తుగా రాహుల్ గాంధీ బుగ్గపై ముద్దుపెట్టింది. దీంతో అక్కడున్నవారు ఒక్కసారిగా ఆశ్చర్యానికి గురయ్యారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్గా మారింది.
సెల్ఫీల సమయంలో ఊహించని ఘటన
పుణెలో ‘ఛాత్రోం కీ గూంజ్’ పేరుతో నిర్వహించిన కార్యక్రమానికి రాహుల్ గాంధీ హాజరయ్యారు. ఈ సందర్భంగా పలువురు విద్యార్థులు, యువతీ యువకులతో ఆయన ముచ్చటించారు. అనంతరం కొందరితో కలిసి వేదికపై సెల్ఫీలు దిగుతున్న సమయంలో ఓ యువతి రాహుల్ వద్దకు వచ్చి ఆయన బుగ్గపై ముద్దుపెట్టినట్లు వీడియోలో కనిపిస్తోంది.
అనూహ్య పరిణామంతో రాహుల్ కాసేపు ఆశ్చర్యపోయినప్పటికీ.. అనంతరం చిరునవ్వుతో స్పందించారు. ఆ తర్వాత భద్రతా సిబ్బందితో కలిసి అక్కడి నుంచి వెళ్లిపోయారు.
ఈ ఘటనకు సంబంధించిన వీడియోను ఓ ఎక్స్ ఖాతాలో షేర్ చేయడంతో సోషల్ మీడియాలో విస్తృతంగా చక్కర్లు కొడుతోంది. ఈ ఘటనపై నెటిజన్లు భిన్నాభిప్రాయాలు వ్యక్తం చేస్తున్నారు. కొందరు దీనిని సరదా ఘటనగా అభివర్ణిస్తుండగా.. మరికొందరు యువతలో రాహుల్ గాంధీకి ఉన్న ఆదరణకు ఇది ఉదాహరణగా పేర్కొంటున్నారు.
A cute moment during a show as a female student met Rahul Gandhi, took a selfie with him, shook hands, and even gave him a kiss. ❤️#RahulGandhi pic.twitter.com/9YZyC0fynO
— Abhishek Yadav 🇮🇳 (@iamabhishekydv) August 23, 2026
రాహుల్ వ్యాఖ్యలపై రాజకీయ దుమారం
ఇదిలా ఉంటే.. ఇదే కార్యక్రమంలో రాహుల్ గాంధీ చేసిన రాజకీయ వ్యాఖ్యలు కూడా చర్చనీయాంశంగా మారాయి. దేశంలో పితృస్వామ్య భావజాలం, ‘మనుస్మృతి మనస్తత్వం’ కొనసాగుతోందని ఆయన విమర్శించారు. మహిళలు తమ హక్కుల కోసం పితృస్వామ్య వ్యవస్థను ప్రశ్నించాలని పిలుపునిచ్చారు.
మహిళల సమస్యలు, సామాజిక సమానత్వం వంటి అంశాలపై కేంద్ర ప్రభుత్వ వైఖరిని కూడా రాహుల్ గాంధీ ప్రశ్నించారు. ఆయన వ్యాఖ్యలు రాజకీయ వర్గాల్లో చర్చకు దారితీశాయి.
బీజేపీ కౌంటర్
రాహుల్ గాంధీ వ్యాఖ్యలపై బీజేపీ నేతలు తీవ్రంగా స్పందించారు. మహారాష్ట్ర బీజేపీ ఉపాధ్యక్షుడు కేశవ్ ఉపాధ్యాయ్ ఈ కార్యక్రమాన్ని విమర్శిస్తూ.. రాజకీయ ప్రచారం కోసం విద్యార్థులను ఉపయోగించుకున్నారని ఆరోపించారు. యువత, మహిళల సమస్యలపై మాట్లాడే నైతిక హక్కు కాంగ్రెస్కు లేదని ఆయన విమర్శించారు.
కాంగ్రెస్ ఎదురుదాడి
బీజేపీ విమర్శలకు కాంగ్రెస్ నేత సచిన్ సావంత్ స్పందించారు. ప్రభుత్వం ఎన్ని ఆంక్షలు విధించినప్పటికీ కార్యక్రమానికి యువత పెద్ద సంఖ్యలో హాజరయ్యారని అన్నారు. యువత, మహిళలు ఎదుర్కొంటున్న సమస్యలపై ప్రభుత్వం దృష్టి పెట్టాలని డిమాండ్ చేశారు.
మొత్తంగా పుణెలో జరిగిన రాహుల్ గాంధీ కార్యక్రమం.. ఓ వైపు వేదికపై చోటుచేసుకున్న అనూహ్య ఘటనతో సోషల్ మీడియాలో వైరల్ కాగా, మరోవైపు రాహుల్ రాజకీయ వ్యాఖ్యలు, వాటిపై బీజేపీ-కాంగ్రెస్ నేతల మధ్య మొదలైన విమర్శలు, ప్రతివిమర్శలతో వార్తల్లో నిలిచింది.