మాస్ మహారాజా రవితేజ తన తదుపరి చిత్రంతో ప్రేక్షకుల ముందుకు రావడానికి సిద్ధమవుతున్నారు. సెన్సిబుల్ డైరెక్టర్ శివ నిర్వాణ దర్శకత్వంలో రూపొందుతున్న ‘ఇరుముడి’ సినిమా విడుదల తేదీని చిత్రబృందం అధికారికంగా ప్రకటించింది. ఈ సినిమాను ఆగస్ట్ 21న ప్రపంచవ్యాప్తంగా థియేటర్లలో విడుదల చేయనున్నట్లు వెల్లడించారు. విడుదలకు ఇంకా కొద్ది రోజులు మాత్రమే ఉండటంతో అభిమానుల్లో ఉత్సాహం పెరిగింది.
యాక్షన్, మాస్ ఎంటర్టైనర్లతో తనకంటూ ప్రత్యేక గుర్తింపు తెచ్చుకున్న రవితేజ, ఈసారి పూర్తిగా భిన్నమైన భావోద్వేగ కథతో ప్రేక్షకులను అలరించేందుకు సిద్ధమవుతున్నారు. కుటుంబ భావోద్వేగాలను హృదయానికి హత్తుకునేలా చూపించడంలో ప్రత్యేకత కలిగిన శివ నిర్వాణ దర్శకత్వం ఈ చిత్రానికి ప్రధాన బలంగా నిలుస్తోంది.
‘ఇరుముడి’ సినిమా తండ్రీకూతుళ్ల మధ్య ఉన్న అనుబంధాన్ని ప్రధానంగా తీసుకుని రూపొందిన కథగా తెలుస్తోంది. ఈ చిత్రంలో రవితేజ ఓ కొత్త కోణంలో కనిపించబోతున్నారని సమాచారం. విడుదల చేసిన పోస్టర్లో రవితేజ, చిన్నారి నక్షత్రతో కలిసి కనిపించడం ప్రేక్షకుల దృష్టిని ఆకర్షించింది.
ఈ చిత్రాన్ని ప్రముఖ నిర్మాణ సంస్థలు మైత్రీ మూవీ మేకర్స్ మరియు టీ-సిరీస్ ఫిలిమ్స్ సంయుక్తంగా నిర్మిస్తున్నాయి. నవీన్ యెర్నేని, వై. రవిశంకర్, భూషణ్ కుమార్, క్రిషన్ కుమార్ నిర్మాతలుగా వ్యవహరిస్తున్నారు. హీరోయిన్గా ప్రియా భవానీ శంకర్ నటిస్తుండగా, సీనియర్ నటుడు సాయికుమార్ కీలక పాత్రలో కనిపించనున్నారు.
సంగీతాన్ని జీవీ ప్రకాశ్ కుమార్ అందిస్తుండగా, సినిమాటోగ్రఫీని విష్ణు శర్మ నిర్వహిస్తున్నారు. ఎడిటింగ్ బాధ్యతలను ప్రవీణ్ పూడి చూసుకుంటున్నారు. భావోద్వేగం, కథా బలం, మాస్ ఎలిమెంట్స్ కలిసిన ఈ సినిమా ప్రేక్షకుల్లో భారీ ఆసక్తిని రేకెత్తిస్తోంది.
ఆగస్ట్ 21న విడుదల కానున్న ‘ఇరుముడి’ చిత్రం బాక్సాఫీస్ వద్ద ఎలాంటి ప్రభావం చూపుతుందో చూడాలి.
also read: జయం రవికి కోర్టులో భారీ ఊరట.. భరణం డిమాండ్కు నో, పిల్లలను కలుసుకునేందుకు గ్రీన్ సిగ్నల్