ఆంధ్రప్రదేశ్లో దీర్ఘకాలంగా కొనసాగుతున్న తాగునీటి సమస్యకు శాశ్వత పరిష్కారం చూపే దిశగా రాష్ట్ర ప్రభుత్వం కీలక నిర్ణయం తీసుకుంది. ప్రతి కుటుంబానికి స్వచ్ఛమైన తాగునీరు అందేలా ఇంటింటికీ కుళాయి కనెక్షన్ ఏర్పాటు చేయాలని లక్ష్యంగా పెట్టుకుంది. హర్ ఘర్ జల్ కార్యక్రమం కింద జల జీవన్ మిషన్ 2.0 అమలుకు రాష్ట్ర ప్రభుత్వం దృఢంగా ముందడుగు వేసింది. ఈ పథకం ద్వారా రాష్ట్రంలోని ప్రతి ఇంటికి తాగునీటి సౌకర్యం కల్పించనున్నట్లు ముఖ్యమంత్రి నారా చంద్రబాబు నాయుడు వెల్లడించారు. ఈ కార్యక్రమం అమలు కోసం కేంద్రంతో రాష్ట్ర ప్రభుత్వం అవగాహన ఒప్పందం కుదుర్చుకోగా, ఇరుపక్షాలు అధికారికంగా సంతకాలు చేశాయి. ఢిల్లీలో జరిగిన ఈ కార్యక్రమానికి ముఖ్యమంత్రి సచివాలయంలోని క్యాంపు కార్యాలయం నుంచి వర్చువల్ విధానంలో పాల్గొని, హర్ ఘర్ జల్ లక్ష్యాన్ని సాకారం చేసే దిశగా ఇది కీలక అడుగని తెలిపారు. 2028 నాటికి రాష్ట్రంలోని ప్రతి ఇంటికి కుళాయి కనెక్షన్ అందించేలా చర్యలు తీసుకుంటామని ఆయన స్పష్టం చేశారు.
ప్రజలకు నిరంతరంగా తాగునీరు అందించడమే ఈ కార్యక్రమం ప్రధాన ఉద్దేశ్యం. అందుకే ప్రతి ఇంటికి ప్రత్యేకంగా కుళాయి కనెక్షన్ ఏర్పాటు చేయాలని నిర్ణయించారు. గతంలో అమల్లో ఉన్న జల జీవన్ మిషన్ పథకాన్ని 2028 వరకు పొడిగిస్తూ కేంద్ర ప్రభుత్వం నిర్ణయం తీసుకుంది. దేశవ్యాప్తంగా ప్రతి ఇంటికి తాగునీటి సౌకర్యం కల్పించడమే ఈ పథక ప్రధాన లక్ష్యం. ఇప్పటికీ అనేక గ్రామాల్లో తాగునీటి సదుపాయం లేని పరిస్థితులు ఉండటంతో ప్రజలు తీవ్ర ఇబ్బందులు ఎదుర్కొంటున్నారు. ఈ సమస్యను పూర్తిగా తొలగించేందుకు జల జీవన్ మిషన్ కార్యక్రమాన్ని మరింత బలోపేతం చేశారు. ఈ పథకం అమలులో భాగంగా కేంద్రం, రాష్ట్రం కలిసి పనిచేస్తూ అవసరమైన నిధులను సమకూర్చనున్నారు. కేంద్ర ప్రభుత్వం తన వంతు వాటా అందించగా, రాష్ట్ర ప్రభుత్వం కూడా తగిన నిధులు కేటాయించి కార్యక్రమాన్ని ముందుకు తీసుకెళ్తుంది. ఇప్పటికే అనేక రాష్ట్రాలు ఈ పథకాన్ని అమలు చేసేందుకు ముందుకు రావడం గమనార్హం.
జల జీవన్ మిషన్ 2.0 అమలుకు ఆంధ్రప్రదేశ్ ప్రభుత్వానికి అవసరమైన అనుమతులు మంజూరు చేసినట్లు కేంద్రమంత్రి సీఆర్ పాటిల్ వెల్లడించారు. తొలి దశలో దేశవ్యాప్తంగా సుమారు 16 కోట్ల ఇళ్లకు కుళాయి కనెక్షన్లు అందించగా, ఇంకా 3 కోట్ల ఇళ్లకు ఈ సౌకర్యం కల్పించాల్సి ఉందన్నారు. ప్రాజెక్టులో ఉన్న లోపాలను సరిచేసిన అనంతరం తదుపరి చర్యలు వేగవంతం చేస్తామని పేర్కొన్నారు. ఈ పథకం అమలుతో సుమారు 9 కోట్ల మహిళలకు నీటి సమస్య నుంచి ఉపశమనం లభిస్తుందని ఆయన తెలిపారు. ఈ కార్యక్రమంలో ఉప ముఖ్యమంత్రి పవన్ కల్యాణ్ కూడా వర్చువల్ విధానంలో పాల్గొని, 2028 నాటికి రాష్ట్రంలోని ప్రతి ఇంటికి మంచినీటి కుళాయి కనెక్షన్ అందిస్తామని చెప్పారు. కేంద్రంతో కుదిరిన ఈ ఒప్పందం రాష్ట్ర అభివృద్ధికి ఒక కీలక మైలురాయిగా నిలుస్తుందని అభివర్ణించారు.
ALSO READ: Director Aditya Dhar: ఆయన అభినందనలు ఒక వరంలా ఉన్నాయి