Travel: విమానం లేకుండా, ఫ్లైట్ ఎక్కకుండా కేవలం కాలినడకన భారతదేశం నుండి అమెరికా చేరుకోవచ్చా అనే ప్రశ్నకు సోషల్ మీడియాలో వైరల్ అవుతున్న ఒక మ్యాప్ ఆసక్తికర సమాధానాన్ని సూచిస్తోంది. రోజుకు కేవలం 15 కిలోమీటర్లు నడిస్తే సరిపోతుందని, ఇలా నిరంతరం ప్రయాణిస్తే సుమారు 20 ఏళ్లలో అమెరికా చేరుకోవచ్చని చెబుతున్న ఈ కాన్సెప్ట్ నెట్టింట పెద్ద చర్చకు దారితీసింది. వాయుమార్గంలో భారత్ నుండి అమెరికా దూరం సుమారు 16,000 కిలోమీటర్లే అయినప్పటికీ, భూమిపై ప్రయాణం మాత్రం అనేక దేశాలు, పర్వతాలు, అడవులు, రహదారులు దాటాల్సి రావడం వల్ల దూరం అమాంతం పెరిగిపోతుంది. ఈ మొత్తం మార్గాన్ని ఒక వినియోగదారుడు గూగుల్ మ్యాప్స్, ట్రావెల్ బ్లాగ్ల ఆధారంగా రూపొందించడంతో ఇది సోషల్ మీడియాలో వేగంగా వైరల్ అవుతోంది.
ఈ నడక ప్రయాణం భారతదేశం నుంచి ప్రారంభమై పాకిస్థాన్, అఫ్గానిస్థాన్, ఉజ్బెకిస్థాన్, కజకిస్థాన్ దేశాల మీదుగా రష్యా తూర్పు ప్రాంతాలకు చేరుకుంటుంది. అక్కడి నుండి అమెరికాలోని అలాస్కా రాష్ట్రం సమీపంలోకి చేరుకోవచ్చని ఈ మార్గం సూచిస్తోంది. ముఖ్యంగా రష్యా మరియు అమెరికా మధ్య ఉన్న బేరింగ్ జలసంధి దూరం కేవలం 80 నుండి 90 కిలోమీటర్ల మధ్యే ఉండటంతో, శీతాకాలంలో అది పూర్తిగా గడ్డకట్టినప్పుడు నడిచి దాటవచ్చని ఈ వైరల్ పోస్ట్ పేర్కొంటోంది. ఈ అంశమే నెటిజన్లను మరింత ఆశ్చర్యానికి గురి చేస్తోంది.
అయితే ఈ ప్రయాణం అంత సులభం కాదని నిపుణులు స్పష్టం చేస్తున్నారు. భారతదేశం నుండి అలాస్కా వరకు భూమిపై మొత్తం దూరం సుమారు 1,10,000 కిలోమీటర్లకు పైగా ఉండొచ్చని అంచనా. రోజుకు 15 కిలోమీటర్లు కూడా ఆగకుండా నడిస్తే ఈ ప్రయాణం పూర్తి చేయడానికి దాదాపు 20 ఏళ్ల సమయం పడుతుంది. అంతేకాకుండా ఈ మార్గంలో ఉన్న అనేక దేశాలకు ప్రవేశించడానికి వీసాలు పొందడం చాలా క్లిష్టమైన విషయం. ముఖ్యంగా రష్యా మరియు అమెరికా మధ్య సరిహద్దుల్లో భద్రతా నిబంధనలు అత్యంత కఠినంగా ఉంటాయి.
ఇక భౌగోళిక పరిస్థితులు కూడా ఈ ప్రయాణాన్ని దాదాపు అసాధ్యంగా మారుస్తాయి. సైబీరియా ప్రాంతాల్లో మైనస్ 50 డిగ్రీల వరకు పడే తీవ్ర చలిలో ప్రయాణించడం ప్రాణాంతకం. అడవులు, ఎడారులు, మంచుతో కప్పబడిన పర్వతాలు దాటే సమయంలో ఆహారం, నీరు, రక్షణ వంటి ప్రాథమిక అవసరాలు కూడా అందుబాటులో ఉండకపోవచ్చు. సంవత్సరాల తరబడి ఇలా ఒంటరిగా ప్రయాణించడం సాధారణ మనుషులకు దాదాపు అసాధ్యమే.
అందుకే ఈ వైరల్ మ్యాప్ను ఒక సాహసకల్పనగా మాత్రమే చూడాలని నిపుణులు సూచిస్తున్నారు. భూమిపై సాంకేతికంగా మార్గం ఉన్నప్పటికీ, వాస్తవ జీవితంలో ఇలాంటి ప్రయాణాన్ని పూర్తి చేయడం అనేక ప్రమాదాలతో కూడుకున్నది. అయినప్పటికీ ఈ కాన్సెప్ట్ సోషల్ మీడియా లో భారీగా చక్కర్లు కొడుతూ, ప్రపంచాన్ని కాలినడకన చుట్టొచ్చే ఆలోచనపై ఆసక్తికర చర్చకు దారితీస్తోంది.
ALSO READ: ప్రభుత్వ కార్యాలయాల్లో కుర్చీలపై తెల్ల టవల్ ఎందుకు ఉంటాయో తెలుసా?
