వర్షాకాలం ప్రారంభమవడంతో రాష్ట్రవ్యాప్తంగా రైతులు ఖరీఫ్ సాగుకు సన్నద్ధమవుతున్నారు. విత్తనాలు, ఎరువులు, ఇతర వ్యవసాయ అవసరాల కోసం పెట్టుబడి అవసరం పెరుగుతున్న నేపథ్యంలో రైతులకు ఆర్థిక అండగా నిలిచే రైతు భరోసా పథకం నిధుల విడుదలపై ప్రభుత్వం కీలక నిర్ణయం తీసుకుంది. తాజాగా జరిగిన ఉన్నతస్థాయి సమావేశంలో జూన్ 30న రైతు భరోసా నిధుల తొలి విడతను విడుదల చేయాలని నిర్ణయించినట్లు సమాచారం. ఖమ్మం జిల్లా మధిరలో నిర్వహించనున్న ప్రత్యేక కార్యక్రమంలో ముఖ్యమంత్రి రేవంత్ రెడ్డి ఈ నిధుల విడుదలకు శ్రీకారం చుట్టనున్నారని తెలుస్తోంది.
ఈసారి రైతు భరోసా నిధుల పంపిణీ ప్రక్రియను మరింత సులభతరం చేసేందుకు ప్రభుత్వం ప్రత్యేక కార్యాచరణను రూపొందించింది. అర్హులైన రైతుల ఖాతాల్లో నేరుగా నిధులు జమ అయ్యేలా ఏర్పాట్లు చేస్తూనే, ఒకేసారి మొత్తం మొత్తాన్ని విడుదల చేయకుండా విడతల వారీగా పంపిణీ చేయాలని నిర్ణయించింది. ఈ విధానం వల్ల రైతులకు సకాలంలో సహాయం అందడమే కాకుండా ప్రభుత్వంపై పడే ఆర్థిక భారం కూడా కొంత మేర తగ్గుతుందని అధికారులు భావిస్తున్నారు. ఇందుకోసం నిధుల విడుదలను మొత్తం 3 దశలుగా విభజించి అమలు చేయనున్నారు.
మొదటి విడతలో చిన్న, సన్నకారు రైతులకు ప్రాధాన్యం ఇవ్వాలని ప్రభుత్వం నిర్ణయించింది. ముఖ్యంగా 1 ఎకరం లేదా అంతకంటే తక్కువ సాగు భూమి కలిగిన రైతుల ఖాతాల్లో ముందుగా రైతు భరోసా నిధులు జమ చేయనున్నారు. వ్యవసాయ పనులు ప్రారంభ దశలో ఉన్న సమయంలో చిన్న రైతులకు పెట్టుబడి సాయం అందించడం ద్వారా సాగు పనులు సజావుగా సాగేందుకు ఇది ఉపయోగపడుతుందని అధికారులు చెబుతున్నారు.
ఆ తర్వాత రెండో విడతలో 2 ఎకరాల వరకు సాగు భూమి కలిగిన రైతుల ఖాతాల్లో నిధులు జమ చేయనున్నారు. ఇక మూడో మరియు చివరి విడతలో 2 ఎకరాల నుంచి 5 ఎకరాల వరకు భూమి కలిగిన రైతులకు రైతు భరోసా సాయం అందించనున్నారు. ఈ విధంగా భూవిస్తీర్ణాన్ని ఆధారంగా తీసుకుని దశలవారీగా నిధులు విడుదల చేయడం ద్వారా పంపిణీ ప్రక్రియలో పారదర్శకతతో పాటు వేగం కూడా పెరుగుతుందని అధికారులు వెల్లడిస్తున్నారు.
రాష్ట్రంలోని లక్షలాది మంది రైతులు రైతు భరోసా నిధుల కోసం ఎదురుచూస్తున్న నేపథ్యంలో ప్రభుత్వం తీసుకున్న ఈ నిర్ణయం వారికి ఊరటనివ్వనుంది. ఖరీఫ్ సాగు ప్రారంభానికి ముందే నిధులు అందితే విత్తనాలు, ఎరువులు, పురుగుమందులు కొనుగోలు చేయడంలో రైతులకు ఆర్థికంగా ఉపశమనం లభించే అవకాశం ఉంది. జూన్ 30 నుంచి ప్రారంభమయ్యే ఈ ప్రక్రియపై రైతుల్లో ఆసక్తి నెలకొంది.
ALSO READ: కన్నతండ్రే కాలయముడు..?
