నేపాల్లో భారీ వర్షాలు, వరదలు, కొండచరియలు విరిగిపడటంతో పరిస్థితి ఆందోళనకరంగా మారింది. ప్రకృతి విపత్తుల కారణంగా మృతుల సంఖ్య భారీగా పెరిగింది. మంగళవారం నాటికి దేశవ్యాప్తంగా 962 మంది ప్రాణాలు కోల్పోయినట్లు అధికారులు వెల్లడించారు. మరో 4,000 మందికిపైగా ఆచూకీ తెలియడం లేదని తెలిపారు.
ముఖ్యంగా నువాకోట్ జిల్లాలో విషాద ఘటన చోటుచేసుకుంది. వరదలు, కొండచరియల ప్రభావంతో దెబ్బతిన్న ఓ ఇంట్లో ఏకంగా 23 మృతదేహాలు బయటపడటం కలకలం రేపింది. దీంతో అక్కడ సహాయక చర్యలను అధికారులు మరింత ముమ్మరం చేశారు.
భారీ వర్షాల కారణంగా అనేక ప్రాంతాలు వరద నీటిలో చిక్కుకున్నాయి. ఇళ్లు, రహదారులు, వంతెనలు తీవ్రంగా దెబ్బతిన్నాయి. పలు జలవిద్యుత్ ప్రాజెక్టులపై కూడా వరదల ప్రభావం పడింది. దీంతో విద్యుత్ సరఫరా, రాకపోకలకు అంతరాయం ఏర్పడింది.
ఇదిలా ఉండగా, పలు సొరంగాల్లో వందలాది మంది కార్మికులు చిక్కుకుపోయి ఉండొచ్చన్న అనుమానాలు వ్యక్తమవుతున్నాయి. వారి కోసం నేపాల్ సైన్యం ప్రత్యేక సహాయక చర్యలు చేపట్టింది. భారీ వర్షాలు, ప్రమాదకర పరిస్థితులను ఎదుర్కొంటూనే సైనిక సిబ్బంది రెస్క్యూ ఆపరేషన్ కొనసాగిస్తున్నారు.
ప్రస్తుతం గల్లంతైన వారి కోసం గాలింపు చర్యలు కొనసాగుతున్నాయి. మృతుల సంఖ్య మరింత పెరిగే అవకాశం ఉందని అధికారులు భావిస్తున్నారు. బాధిత ప్రాంతాల్లో సహాయక చర్యలను వేగవంతం చేసేందుకు ప్రభుత్వం చర్యలు చేపడుతోంది.
also read: రష్మికను ‘వదిన’ అని పిలవను..: ఆనంద్ దేవరకొండ