క్రైమ్ మిర్రర్,హైదరాబాద్:- ప్రతిష్టాత్మక పోలవరం ప్రాజెక్టు నిర్మాణంతో తెలంగాణలోని పలు గ్రామాలకు ముప్పు పొంచి ఉందని రాష్ట్ర మంత్రి పొంగులేటి శ్రీనివాసరెడ్డి తీవ్ర ఆందోళన వ్యక్తం చేశారు. ఈ ప్రాజెక్టుపై ఆయన కీలక వ్యాఖ్యలు చేస్తూ, గత ప్రభుత్వ వైఫల్యాలను, ప్రాజెక్టు వల్ల ఎదురయ్యే భవిష్యత్ పరిణామాలను ప్రస్తావించారు.ఆంధ్రప్రదేశ్, తెలంగాణ రాష్ట్రాల విభజన సమయంలో పోలవరం ప్రాజెక్టు వల్ల ముంపునకు గురయ్యే గ్రామాల గురించి అప్పటి పాలకులు పట్టించుకోలేదని మంత్రి ఆరోపించారు. ప్రత్యేకించి, తెలంగాణలోని ఏడు మండలాలను హడావుడిగా ఆంధ్రప్రదేశ్లో కలపడంపై ఆయన తీవ్ర అభ్యంతరం వ్యక్తం చేశారు. నాటి ముఖ్యమంత్రి కేసీఆర్ నిర్లక్ష్యం వల్లే ఈ మండలాలు ఏపీలో కలపబడ్డాయని, దీని వల్ల తెలంగాణకు తీరని నష్టం వాటిల్లిందని ఆయన విమర్శించారు. విభజన చట్టంలోని హామీల అమలులోనూ, ముంపు గ్రామాల ప్రజల సమస్యల పరిష్కారంలోనూ గత ప్రభుత్వం విఫలమైందని ఆయన మండిపడ్డారు.
కొన్ని సినిమాలు సమాజాన్ని నాశనం చేస్తున్నాయి: సినీ నటుడు సుమన్ ఆందోళన
బ్యాక్ వాటర్ తో ప్రమాదం:- పోలవరం ప్రాజెక్టులో నీటి నిల్వ సామర్థ్యం పెరిగే కొద్దీ, బ్యాక్ వాటర్ (వెనక్కి తన్నే నీరు) వల్ల తెలంగాణ సరిహద్దుల్లోని గ్రామాలకు తీవ్ర ముప్పు ఉందని పొంగులేటి హెచ్చరించారు. గోదావరి నదికి భారీగా వరదలు వస్తే, ఆ వరద నీరు వెనక్కి తన్ని తెలంగాణలోని అనేక గ్రామాలు జలదిగ్బంధంలో చిక్కుకునే ప్రమాదం ఉందన్నారు. దీని వల్ల వేలాది ఎకరాల పంట భూములు ముంపునకు గురవడమే కాకుండా, ప్రజల ప్రాణ, ఆస్తులకు తీవ్ర నష్టం వాటిల్లే అవకాశం ఉందని ఆయన ఆందోళన వ్యక్తం చేశారు. ఊహించని రీతిలో వరదలు వస్తే పరిస్థితి మరింత దారుణంగా ఉంటుందని ఆయన స్పష్టం చేశారు.
కేంద్రం, ఏపీ ప్రభుత్వాలు స్పందించాలి:-ఈ ముప్పును నివారించేందుకు కేంద్ర ప్రభుత్వం, ఆంధ్రప్రదేశ్ ప్రభుత్వం తక్షణమే ముందస్తు చర్యలు తీసుకోవాలని మంత్రి పొంగులేటి డిమాండ్ చేశారు. బ్యాక్ వాటర్ ప్రభావంపై సమగ్ర అధ్యయనం చేయాలని, ముంపునకు గురయ్యే గ్రామాలకు తగిన నష్టపరిహారం చెల్లించడంతో పాటు, పునరావాస చర్యలు చేపట్టాలని కోరారు. గోదావరి వరదల వల్ల తలెత్తే పరిణామాలను అంచనా వేసి, తెలంగాణ ప్రజలకు ఎలాంటి నష్టం జరగకుండా చూడాల్సిన బాధ్యత కేంద్ర, ఏపీ ప్రభుత్వాలపైనే ఉందన్నారు. ఈ విషయంలో తెలంగాణ ప్రభుత్వం కూడా అప్రమత్తంగా ఉంటుందని, ప్రజల ప్రయోజనాల రక్షణ కోసం పోరాడుతుందని ఆయన స్పష్టం చేశారు.
ప్రేమపై హీరోయిన్ రష్మిక ఆసక్తికర వ్యాఖ్యలు!