ఆన్లైన్ బెట్టింగ్, గేమింగ్ యాప్ల ప్రచారానికి సంబంధించిన కేసులో సినీ నటి నిధి అగర్వాల్ నేడు ఎన్ఫోర్స్మెంట్ డైరెక్టరేట్ (ఈడీ) అధికారుల ఎదుట హాజరుకానున్నారు. బెట్టింగ్ ప్లాట్ఫారమ్లకు ప్రచారం చేశారన్న ఆరోపణలపై ఇప్పటికే ఆమెకు ఈడీ సమన్లు జారీ చేసింది. ఈ క్రమంలో విచారణకు హాజరయ్యే నిధి అగర్వాల్ నుంచి అధికారులు కీలక వివరాలను సేకరించనున్నట్లు తెలుస్తోంది.
ఈ కేసులో ప్రధానంగా మనీ లాండరింగ్, బెట్టింగ్ యాప్ల ఆర్థిక లావాదేవీలు, వాటి ప్రచారానికి సెలబ్రిటీలతో జరిగిన ఒప్పందాలు వంటి అంశాలపై ఈడీ దృష్టి సారించినట్లు సమాచారం. ముఖ్యంగా సినీ ప్రముఖులు, సోషల్ మీడియా ఇన్ఫ్లుయెన్సర్లు బెట్టింగ్ ప్లాట్ఫారమ్లను ప్రమోట్ చేసిన విధానం, అందుకు వారు పొందిన పారితోషికం వంటి అంశాలను అధికారులు పరిశీలిస్తున్నట్లు తెలుస్తోంది.
మియాపూర్కు చెందిన వ్యాపారవేత్త ఫణీంద్ర శర్మ ఇచ్చిన ఫిర్యాదు ఆధారంగా ఈ వ్యవహారంపై కేసు నమోదు చేసినట్లు సమాచారం. బెట్టింగ్ యాప్లకు ప్రముఖులు ఇచ్చిన ప్రచారం కారణంగా పలువురు వాటి వైపు ఆకర్షితులై ఆర్థికంగా నష్టపోయారన్న ఆరోపణలను కూడా అధికారులు పరిశీలిస్తున్నారు.
ఈ కేసుకు సంబంధించిన ఎఫ్ఐఆర్లో నిధి అగర్వాల్తో పాటు పలువురు సినీ ప్రముఖులు, సోషల్ మీడియా ఇన్ఫ్లుయెన్సర్ల పేర్లు ఉన్నట్లు సమాచారం. రానా దగ్గుబాటి, ప్రకాశ్రాజ్, విజయ్ దేవరకొండ, మంచు లక్ష్మి, ప్రణీత, అనన్య నాగళ్ల తదితరుల పేర్లు కూడా అందులో ఉన్నట్లు తెలుస్తోంది.
అయితే, ఎఫ్ఐఆర్లో పేరు ఉండటం లేదా విచారణకు పిలవడం మాత్రమే నేరం రుజువైనట్లు కాదని గమనించాలి. ఈడీ విచారణలో వెలువడే వివరాల ఆధారంగా తదుపరి చర్యలు ఉండే అవకాశం ఉంది. నిధి అగర్వాల్ నుంచి అధికారులు ఈరోజు స్టేట్మెంట్ నమోదు చేయనున్నట్లు సమాచారం.
also read: హరీశ్ రావుకు హౌస్ అరెస్ట్.. కోకాపేట్లో భారీగా పోలీసుల మోహరింపు