క్రైమ్ మిర్రర్, సినిమా:- టాలీవుడ్లో వరుస విజయాలతో దూసుకుపోతున్న యువ కథానాయకుడు తేజ సజ్జా తన జీవితంలో మరో కొత్త అధ్యాయానికి శ్రీకారం చుట్టారు. ఆయన నిశ్చితార్థ వేడుక హైదరాబాద్లోని బంజారాహిల్స్లో ఉన్న ప్రముఖ తాజ్ కృష్ణ హోటల్లో అత్యంత వైభవంగా, కన్నుల పండువగా జరిగింది. కుటుంబ సభ్యులు, అత్యంత సన్నిహితుల సమక్షంలో జరిగిన ఈ వేడుకలో తేజ సజ్జా తన కాబోయే జీవిత భాగస్వామితో కలిసి ఉంగరాలు మార్చుకున్నారు. ఈ ఆనందకర ఘట్టానికి సంబంధించిన ఫోటోలు ప్రస్తుతం సోషల్ మీడియాలో వైరల్గా మారాయి.
ఈ వేడుకకు పలువురు రాజకీయ, సినీ ప్రముఖులు హాజరై నూతన వధూవరులను ఆశీర్వదించారు. ముఖ్యంగా తెలంగాణ గవర్నర్ శివ్ ప్రతాప్ శుక్లా వేడుకకు విచ్చేసి, కాబోయే వధూవరులను ప్రత్యేకంగా ఆశీర్వదించి శుభాకాంక్షలు తెలిపారు. అలాగే కేంద్ర మంత్రి కిషన్ రెడ్డి కూడా ఈ వేడుకలో పాల్గొని సందడి చేశారు.సినీ రంగం నుంచి పెద్ద ఎత్తున ప్రముఖులు హాజరుకావడంతో వేడుకకు మరింత శోభ చేకూరింది. మాస్ మహారాజా రవితేజ, నేచురల్ స్టార్ నాని, సీనియర్ నటుడు శ్రీకాంత్, దగ్గుబాటి రానా వంటి ప్రముఖ హీరోలు హాజరై తేజ సజ్జాకు అభినందనలు తెలియజేశారు. దర్శకుల విభాగం నుంచి ప్రశాంత్ వర్మ, అనిల్ రావిపూడితో పాటు సీనియర్ దర్శకులు కె. రాఘవేంద్రరావు కూడా ఈ నిశ్చితార్థ వేడుకకు విచ్చేసి వధూవరులను దీవించారు.
వీరితో పాటు పలువురు ఇతర సినీ ప్రముఖులు, నిర్మాతలు, సాంకేతిక నిపుణులు మరియు కుటుంబ సన్నిహితులు పెద్ద సంఖ్యలో ఈ వేడుకలో పాల్గొన్నారు. అతిథుల రాకతో తాజ్ కృష్ణ హోటల్ ప్రాంగణం సందడిగా మారింది. ‘హనుమాన్’ వంటి బ్లాక్బస్టర్ విజయం తర్వాత తేజ సజ్జా కెరీర్ పరంగా మంచి జోరు మీదున్న సమయంలో, వ్యక్తిగత జీవితంలోనూ ఈ తీపి కబురు పంచుకోవడంతో అభిమానులు, సినీ వర్గాలు ఆయనకు సోషల్ మీడియా వేదికగా శుభాకాంక్షలు తెలుపుతున్నారు.
