నిత్యావసర వస్తువుల ధరలు వరుసగా పెరుగుతుండటంతో సామాన్య కుటుంబాలపై ఆర్థిక భారం మరింత అధికమవుతోంది. ఇప్పటికే పెరిగిన ఖర్చులతో సతమతమవుతున్న ప్రజలకు ప్రముఖ కంపెనీలు తీసుకుంటున్న ధరల పెంపు నిర్ణయాలు ఆందోళన కలిగిస్తున్నాయి. ఆహార పదార్థాల నుంచి గృహ వినియోగ వస్తువుల వరకు ధరలు పెరుగుతుండటంతో నెలవారీ కుటుంబ బడ్జెట్‌పై ప్రభావం పడుతోంది.
పాల ఉత్పత్తుల రంగంలో ప్రముఖ సంస్థలైన అమూల్‌, మదర్‌ డెయిరీ పాల ధరలను పెంచాయి. వీటితో పాటు నెయ్యి, వెన్న ధరలు కూడా అధికమయ్యాయి. దీంతో ప్రతిరోజూ పాలు, పాల ఉత్పత్తులు కొనుగోలు చేసే కుటుంబాల ఖర్చులు పెరగనున్నాయి.
మరోవైపు గృహ అవసరాలకు ఉపయోగించే డిటర్జెంట్లు, సబ్బుల ధరల విషయంలోనూ కంపెనీలు మార్పులు చేశాయి. హిందుస్థాన్‌ యూనిలివర్‌ తన సర్ఫ్‌ ఎక్సెల్‌, రిన్‌, వీల్‌ డిటర్జెంట్లతో పాటు మోతీ సబ్బు ధరలను పెంచింది. డాబర్‌ సంస్థకు చెందిన పలు ఉత్పత్తుల ధరలు కూడా పెరిగాయి. దీంతో రోజువారీ వినియోగ వస్తువుల కొనుగోలుకు వినియోగదారులు మరింత డబ్బు వెచ్చించాల్సిన పరిస్థితి ఏర్పడింది.
ఇక పొగాకు ఉత్పత్తుల ధరల్లోనూ పెరుగుదల నమోదైంది. ఐటీసీ సంస్థ గోల్డ్‌ ఫ్లేక్‌ ప్రీమియం సిగరెట్‌ ప్యాక్‌పై రూ.10 పెంచింది. అటు వాణిజ్య అవసరాలకు వినియోగించే గ్యాస్ సిలిండర్‌ ధరలు కూడా పెరిగాయి. ఢిల్లీలో కమర్షియల్‌ గ్యాస్ సిలిండర్‌ ధర రెండు నెలల వ్యవధిలో రూ.72.50 మేర పెరిగింది. ఇది హోటళ్లు, రెస్టారెంట్లు, ఇతర ఆహార వ్యాపారాల నిర్వహణ ఖర్చులపై ప్రభావం చూపే అవకాశం ఉంది.
వీటికి తోడు డ్రై ఫ్రూట్స్‌, కందిపప్పు, శనగలు వంటి నిత్యావసర ఆహార పదార్థాల ధరలు కూడా పెరుగుతున్నాయి. దీంతో మధ్యతరగతి, దిగువ మధ్యతరగతి కుటుంబాలు ఖర్చులను నియంత్రించుకోవాల్సిన పరిస్థితి నెలకొంది. ఒకవైపు ఇంటి అవసరాలు, మరోవైపు పెరుగుతున్న మార్కెట్ ధరలతో సామాన్యుల నెలవారీ బడ్జెట్‌పై ఒత్తిడి కొనసాగుతోంది.
also read: సంక్రాంతి ప్రయాణికులకు గుడ్‌న్యూస్.. రైలు టికెట్ల బుకింగ్ తేదీలు ఇవే!