బాలీవుడ్ దిగ్గజ నటుడు అమితాబ్ బచ్చన్ నివాసమైన ‘జల్సా’తో పాటు ముంబైలోని కీలక ప్రాంతాలను బాంబులతో పేల్చివేస్తామంటూ వచ్చిన ఓ బెదిరింపు ఈమెయిల్ తీవ్ర ఆందోళనకు దారితీసింది. ముంబై మేయర్ కార్యాలయం, ఛత్రపతి శివాజీ మహారాజ్ అంతర్జాతీయ విమానాశ్రయాన్ని కూడా లక్ష్యంగా చేసుకుంటామని ఆ మెయిల్‌లో పేర్కొనడంతో పోలీసులు అప్రమత్తమయ్యారు.
బెదిరింపు సమాచారం అందుకున్న వెంటనే ముంబై పోలీసులు, భద్రతా విభాగాలు, బాంబు నిర్వీర్య బృందాలు రంగంలోకి దిగాయి. ఈమెయిల్‌లో ప్రస్తావించిన ప్రాంతాల్లో క్షుణ్ణంగా తనిఖీలు నిర్వహించారు. అయితే ఎక్కడా పేలుడు పదార్థాలు గానీ, అనుమానాస్పద వస్తువులు గానీ కనిపించలేదు. దీంతో ఈ బెదిరింపులు నకిలీవని ప్రాథమికంగా నిర్ధారించిన అధికారులు, ప్రజలు ఆందోళన చెందాల్సిన అవసరం లేదని స్పష్టం చేశారు.
ముంబై నగరంలో కొంతకాలంగా ఇలాంటి బెదిరింపు ఈమెయిళ్లు వరుసగా వస్తుండటం పోలీసులకు సవాలుగా మారింది. నవంబర్ 6న కూడా అమితాబ్ బచ్చన్ నివాసాన్ని లక్ష్యంగా చేసుకుని బెదిరింపు సందేశం వచ్చింది. అప్పట్లోనూ పోలీసులు తనిఖీలు చేపట్టగా ఎలాంటి ప్రమాదకర వస్తువులు లభించలేదు.
అంతకుముందు అక్టోబర్ 23న ముంబై మేయర్, డిప్యూటీ మేయర్‌లకు వచ్చిన బెదిరింపు ఈమెయిల్‌లో బృహన్ ముంబై మున్సిపల్ కార్పొరేషన్ (బీఎంసీ) ప్రధాన కార్యాలయం, జల్సా బంగ్లా, ప్రముఖ గాయకుడు దిల్జీత్ దోసాంజ్ సంగీత కార్యక్రమం జరిగే వేదికతో పాటు ఓ పాఠశాలను లక్ష్యంగా చేసుకుంటామని హెచ్చరించారు. ఆ తర్వాత బాంబే హైకోర్టు, బాంబే స్టాక్ ఎక్స్ఛేంజ్‌కు సంబంధించిన బెదిరింపులు కూడా వెలుగులోకి వచ్చాయి.
ఇదిలా ఉండగా, ఇటీవల అమితాబ్ బచ్చన్ తన నివాసం జల్సా వద్ద అభిమానులను పలకరించిన దృశ్యాలు చర్చనీయాంశమయ్యాయి. ఇంటి వద్ద ఏర్పాటు చేసిన బుల్లెట్ ప్రూఫ్ గ్లాస్ వెనుక నుంచి కుమారుడు అభిషేక్ బచ్చన్‌తో కలిసి ఆయన అభిమానులకు అభివాదం చేశారు. ఈ ఘటన జరిగిన కొద్ది రోజులకే మరోసారి బెదిరింపు రావడం ప్రాధాన్యత సంతరించుకుంది.
ప్రస్తుతం బెదిరింపులు వచ్చిన ప్రాంతాలకు ఎలాంటి తక్షణ ముప్పు లేదని పోలీసులు వెల్లడించారు. అయినప్పటికీ ముందస్తు జాగ్రత్తగా ఆయా ప్రాంతాల్లో భద్రతను మరింత పెంచారు. ఈ నకిలీ బెదిరింపు ఈమెయిళ్ల వెనుక ఎవరున్నారు? ఎక్కడి నుంచి సందేశాలు పంపిస్తున్నారు? అనే కోణాల్లో ముంబై సైబర్ క్రైమ్ పోలీసులు దర్యాప్తు ముమ్మరం చేశారు.
also read: భర్త చేతిలో భార్య దారుణ హత్య.. వంట పాత్రలు కడుగుతుండగా కర్రతో దాడి