త్వరలో కొత్త స్మార్ట్‌ఫోన్ కొనాలని ప్లాన్ చేస్తున్నారా? అయితే సాధారణ వినియోగదారులకు, ముఖ్యంగా బడ్జెట్ స్మార్ట్‌ఫోన్ కొనుగోలుదారులకు చేదు వార్త అందుతోంది. రాబోయే రోజుల్లో బడ్జెట్ మరియు లో-ఎండ్ స్మార్ట్‌ఫోన్ల ధరలు ఏకంగా 30 శాతం వరకు పెరిగే అవకాశం ఉందని ప్రముఖ గ్లోబల్ బ్రోకరేజ్ సంస్థ ‘జెఫ్రీస్’ తమ తాజా నివేదికలో సంచలన విషయాన్ని వెల్లడించింది.
ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) సాంకేతికత విపరీతంగా పుంజుకోవడమే ఈ ధరల బాదుడుకు ప్రధాన కారణమని విశ్లేషకులు చెబుతున్నారు. పెద్ద ఎత్తున విస్తరిస్తున్న AI డేటా సెంటర్లు, మౌలిక సదుపాయాల కోసం మెమరీ చిప్స్ డిమాండ్ విపరీతంగా పెరిగింది. ఈ భారీ డిమాండ్ కారణంగా గ్లోబల్ మార్కెట్‌లో మెమరీ చిప్‌ల కొరత ఏర్పడి, వాటి ధరలు ఆకాశాన్నంటాయి. రాబోయే సంవత్సరాల్లో ప్రపంచ మెమరీ చిప్స్ డిమాండ్‌లో దాదాపు 60 శాతానికి పైగా కేవలం AI కంపెనీల నుంచే ఉండే అవకాశం ఉంది.
స్మార్ట్‌ఫోన్ తయారీ ఖర్చులపై తీవ్ర ప్రభావం
సాధారణంగా ఒక బడ్జెట్ స్మార్ట్‌ఫోన్ తయారీ ఖర్చులో మెమరీ చిప్స్ వాటానే దాదాపు 60 శాతం వరకు ఉంటుంది. ఇటీవల కాలంలో మెమరీ చిప్ ధరలు దాదాపు 3 రెట్లు (3x) పెరిగాయి. గతంలో ఒక ఫోన్ మెమరీ భాగాల తయారీకి $20 డాలర్లు ఖర్చయితే, ప్రస్తుతం అది $60 నుండి $65 డాలర్లకు చేరుకుంది. ఈ అదనపు భారాన్ని మొబైల్ తయారీ కంపెనీలు భరించలేక వినియోగదారులపైనే మోపేందుకు సిద్ధమవుతున్నాయి.
ధరలు ఒకేసారి 30% పెరిగితే, బడ్జెట్ ఫోన్ల విక్రయాలు మందగించే అవకాశం ఉందని జెఫ్రీస్ పేర్కొంది. దీనివల్ల చాలామంది కొత్త ఫోన్ల కొనుగోలును వాయిదా వేసుకోవడమో, లేదా రీఫర్బిష్డ్ (సెకండ్ హ్యాండ్) ఫోన్ల వైపు మొగ్గు చూపడమో జరుగుతుందని అంచనా వేస్తున్నారు. రాబోయే రెండు మూడేళ్ల పాటు మెమరీ చిప్‌ల ధరలు గరిష్ట స్థాయిలోనే కొనసాగే అవకాశం ఉన్నందున, స్మార్ట్‌ఫోన్ మార్కెట్‌పై ఈ ప్రభావం దీర్ఘకాలం ఉండేలా కనిపిస్తోంది.
విమర్శల నుండి ప్రశంసల వైపు: ‘రామాయణ’ లో రావణుడిగా యష్ అద్భుత నటన!