హీరో అల్లు శిరీష్ చేసిన డీజే సౌండ్ ఫిర్యాదుపై సైబరాబాద్ పోలీసులు స్పందించారు. అర్ధరాత్రి వరకు భారీ శబ్ధాలతో ఇబ్బంది కలుగుతోందంటూ శిరీష్ చేసిన ఫిర్యాదుపై పోలీసులు విచారణ చేపట్టారు. ఈ సందర్భంగా కీలక విషయాలను వెల్లడించారు.
అల్లు శిరీష్ నివాసం సమీపంలో వినిపించిన భారీ శబ్ధాలకు హనుమాన్ ఆలయానికి ఎలాంటి సంబంధం లేదని పోలీసులు స్పష్టం చేశారు. ఈ విషయంపై అల్లు శిరీష్తో మాట్లాడినట్లు తెలిపారు.
విచారణలో భాగంగా ఆ శబ్ధాలు గణేశ్ నిమజ్జనం ఊరేగింపు సందర్భంగా వినిపించిన డీజే సౌండ్స్గా గుర్తించినట్లు పోలీసులు వెల్లడించారు. అవి హనుమాన్ ఆలయం నుంచి వచ్చిన శబ్ధాలు కాదని శిరీష్కు వివరించినట్లు పేర్కొన్నారు.
అలాగే గణేశ్ నిమజ్జన కార్యక్రమం నిర్వహించిన నిర్వాహకులతోనూ పోలీసులు మాట్లాడారు. నిమజ్జనం కార్యక్రమం ఇప్పటికే పూర్తయిందని నిర్వాహకులు తెలిపినట్లు పోలీసులు వెల్లడించారు.
కొన్ని రోజుల క్రితం అల్లు శిరీష్ సోషల్ మీడియా వేదికగా డీజే సౌండ్స్పై అసహనం వ్యక్తం చేశారు. తన ఇంటి సమీపంలోని హనుమాన్ ఆలయం వద్ద అర్ధరాత్రి వరకు భారీ శబ్ధాలతో డీజే నిర్వహిస్తున్నారని ఆయన పేర్కొన్నారు. ఈ పోస్టు సోషల్ మీడియాలో చర్చకు దారితీయడంతో పాటు కొందరు నెటిజన్ల నుంచి విమర్శలు కూడా వచ్చాయి.
ఈ నేపథ్యంలో పోలీసులు ఫిర్యాదుపై విచారణ జరిపి శబ్ధాలకు సంబంధించిన వివరాలను వెల్లడించారు. డీజే శబ్ధాలు హనుమాన్ ఆలయం నుంచి కాకుండా గణేశ్ నిమజ్జనం ఊరేగింపు నుంచి వచ్చినవేనని స్పష్టం చేయడంతో ఈ వ్యవహారంపై పోలీసుల వివరణ వెలుగులోకి వచ్చింది.