టాలీవుడ్‌లో విభిన్న కథాంశాలతో రూపొందుతున్న సినిమాలు ప్రేక్షకుల్లో ఆసక్తిని పెంచుతున్నాయి. ఈ క్రమంలో నటుడు ప్రియదర్శి ప్రధాన పాత్రలో తెరకెక్కుతున్న తాజా చిత్రం ‘ఇడుపు కాయితం’ సినీ ప్రియుల దృష్టిని ఆకర్షిస్తోంది. పల్లెటూరి వాతావరణం, కుటుంబ అనుబంధాలు, భావోద్వేగాల నేపథ్యంలో ఈ సినిమాను రూపొందిస్తున్నారు.
ఈ చిత్రంతో ఫోక్ డాన్సర్ నాగదుర్గ కథానాయికగా తెలుగు తెరకు పరిచయం కానున్నారు. దర్శకుడు వంశీరెడ్డి దొండపాటి ఈ సినిమాను తెరకెక్కిస్తున్నారు. సరికొత్త కథాంశంతో పాటు గ్రామీణ జీవనశైలిని ప్రతిబింబించే అంశాలు ఈ చిత్రంలో ప్రధాన ఆకర్షణగా నిలవనున్నట్లు తెలుస్తోంది.
నిర్మాణ పరంగా కూడా ఈ సినిమాకు ప్రముఖ సంస్థల అండ లభించింది. సుకుమార్ రైటింగ్స్, బన్నీ వాస్ వర్క్స్ సంయుక్తంగా ఈ చిత్రాన్ని నిర్మిస్తున్నాయి. సురేష్ బొబ్బిలి సంగీత బాధ్యతలు నిర్వహిస్తున్నారు.
ఇక ఈ సినిమా విడుదల తేదీని చిత్ర బృందం ఖరారు చేసింది. డిసెంబర్ 11న ‘ఇడుపు కాయితం’ను ప్రపంచవ్యాప్తంగా ప్రేక్షకుల ముందుకు తీసుకురానున్నారు. ప్రియదర్శి ఎంచుకున్న విభిన్నమైన కథ, పల్లెటూరి నేపథ్యం, కుటుంబ భావోద్వేగాలు వెండితెరపై ఎలాంటి అనుభూతిని అందిస్తాయో చూడాలి. విడుదల తేదీ దగ్గరపడుతుండటంతో ఈ సినిమాపై ప్రేక్షకుల్లో ఆసక్తి నెలకొంది.
also read: రూ.200 రిజిస్ట్రేషన్ ఫీజుపై హైకోర్టును ఆశ్రయించిన వ్యక్తి.. పిటిషన్‌పై ధర్మాసనం కీలక వ్యాఖ్యలు!