క్రైమ్ మిర్రర్ : తిరుపతి నగరంలో విషాదకర ఘటన చోటుచేసుకుంది. భవన నిర్మాణ పనులు జరుగుతున్న ప్రాంతంలో భారీ క్రేన్ ఒక్కసారిగా కూలిపోవడంతో ముగ్గురు కార్మికులు ప్రాణాలు కోల్పోయారు. మరో ఇద్దరు తీవ్రంగా గాయపడినట్లు సమాచారం. డీబీఆర్ రోడ్డు పరిసరాల్లో నిర్మాణ పనులు జరుగుతున్న సమయంలో ఈ ప్రమాదం జరిగినట్లు తెలుస్తోంది. క్రేన్ అకస్మాత్తుగా అదుపుతప్పి కూలిపోవడంతో అక్కడ పనిచేస్తున్న కార్మికులు దాని కింద చిక్కుకున్నట్లు సమాచారం. ఘటనలో ముగ్గురు కార్మికులు అక్కడికక్కడే మృతి చెందినట్లు ప్రాథమికంగా తెలుస్తోంది.
ప్రమాదంలో గాయపడిన మరో ఇద్దరిని సహచరులు, స్థానికుల సహాయంతో బయటకు తీసి వెంటనే తిరుపతిలోని రుయా ఆసుపత్రికి తరలించారు. వారి పరిస్థితిపై వైద్యులు చికిత్స అందిస్తున్నారు. సమాచారం అందుకున్న పోలీసులు ఘటనాస్థలానికి చేరుకుని సహాయక చర్యలను పర్యవేక్షించారు. ప్రమాదానికి గల కారణాలపై ఆరా తీస్తున్నారు. క్రేన్ సాంకేతిక లోపం కారణంగా కూలిందా? లేక నిర్మాణ పనుల్లో ఏదైనా నిర్లక్ష్యం జరిగిందా? అనే కోణాల్లో అధికారులు వివరాలు సేకరిస్తున్నారు. ఈ ఘటనతో నిర్మాణ ప్రాంతంలో ఒక్కసారిగా ఉద్రిక్త వాతావరణం నెలకొంది. ప్రమాదానికి సంబంధించిన పూర్తి వివరాలు, మృతుల గుర్తింపు, ఘటనకు దారితీసిన కారణాలపై అధికారుల నుంచి మరింత సమాచారం వెలువడాల్సి ఉంది.
also read : వేములపల్లిలో ఉత్తమ ఉపాధ్యాయులకు ఘన సన్మానం…!