ఉన్నత విద్యను అభ్యసించాలనుకునే విద్యార్థులకు కేంద్ర ప్రభుత్వం కీలక నిర్ణయం తీసుకుంది. విద్యా రుణాల ప్రక్రియను మరింత వేగవంతం చేయాలని బ్యాంకులకు సూచనలు జారీ చేసింది. విద్యార్థులు దరఖాస్తు చేసుకున్న తర్వాత గరిష్ఠంగా 10 రోజుల్లో రుణ మంజూరు ప్రక్రియ పూర్తి చేయాలని ఆదేశించింది.
విద్యార్థులకు ఆర్థిక ఇబ్బందులు లేకుండా ఉన్నత చదువులు కొనసాగించేలా విద్యా రుణాల పంపిణీని వేగవంతం చేయాలని కేంద్రం లక్ష్యంగా పెట్టుకుంది. వచ్చే ఏడాది నాటికి ప్రస్తుతం ఉన్న రుణాల పంపిణీ వేగాన్ని రెట్టింపు చేయాలని ప్రణాళిక రూపొందించింది.
50 వేల కాలేజీల్లో ప్రత్యేక శిబిరాలు
విద్యార్థులకు రుణాలపై అవగాహన కల్పించడంతో పాటు, సులభంగా రుణాలు పొందేలా దేశవ్యాప్తంగా సుమారు 50 వేల కళాశాలల్లో బ్యాంకులు ప్రత్యేక శిబిరాలు నిర్వహించనున్నాయి. ఈ శిబిరాల ద్వారా అర్హత ఉన్న విద్యార్థులకు అక్కడికక్కడే రుణ ప్రక్రియ ప్రారంభించే అవకాశం కల్పించనున్నారు.
పూచీకత్తు లేని రుణ పరిమితి పెంపుపై ప్రతిపాదన
ప్రస్తుతం ఉన్న పూచీకత్తు లేని విద్యా రుణ పరిమితిని పెంచాలని పార్లమెంటరీ కమిటీ సూచించింది. ప్రస్తుతం రూ.7.5 లక్షల వరకు ఉన్న పరిమితిని రూ.20 లక్షలకు పెంచాలని సిఫార్సు చేసింది. దీనివల్ల ఖరీదైన ఉన్నత విద్యా కోర్సులు చదివే విద్యార్థులకు మరింత ప్రయోజనం కలగనుంది.
విద్యాలక్ష్మి పథకం ద్వారా వడ్డీ రాయితీ
ప్రధానమంత్రి విద్యాలక్ష్మి యోజన కింద విద్యార్థులకు వడ్డీ రాయితీ అందించేందుకు 2024 నుంచి 2031 మధ్య కాలానికి రూ.3,600 కోట్ల నిధులను కేటాయించారు. ఆర్థికంగా వెనుకబడిన విద్యార్థులకు ఉన్నత విద్యను అందుబాటులోకి తీసుకురావడమే ఈ పథకం ప్రధాన ఉద్దేశం.
విద్యా రుణాల ప్రక్రియ సులభతరం అయితే, దేశవ్యాప్తంగా వేలాది మంది విద్యార్థులకు ఉన్నత చదువుల అవకాశాలు మరింత పెరగనున్నాయి.
also read: LPG వినియోగదారులకు అలర్ట్: ఈ-KYC తప్పనిసరి – లేకపోతే గ్యాస్ బుకింగ్, సబ్సిడీ నిలుపుదల!