మహిళల భద్రతపై మళ్లీ ప్రశ్నలు లేవనెత్తే ఘటన కీసర ప్రాంతంలో వెలుగుచూసింది. 13 ఏళ్ల బాలికపై ఆమెకు అత్యంత సమీప బంధువులే లైంగిక దాడికి పాల్పడిన ఘటన స్థానికంగా కలకలం రేపింది.
మహారాష్ట్రకు చెందిన ఈ బాలిక తల్లిదండ్రులు కొన్ని సంవత్సరాల క్రితం మరణించడంతో, కీసరలోని అమ్మమ్మ వద్ద నివసిస్తోంది. చదువు కోసం స్థానికుల సహకారంతో తుర్కపల్లి ప్రాంతంలోని వసతిగృహంలో చేరింది. ఇటీవల సెలవులు రావడంతో తిరిగి అమ్మమ్మ ఇంటికి వచ్చింది.
ఈ సమయంలో బాలిక ఒంటరిగా ఉన్న అవకాశాన్ని ఉపయోగించుకుని, మేనమామతో పాటు వరసకు సోదరులైన ఇద్దరు యువకులు మత్తు పదార్థాల ప్రభావంలో ఆమెపై దాడికి పాల్పడ్డారు. ఘటన బయటకు రాకుండా నిందితులు జాగ్రత్తలు తీసుకున్నట్లు సమాచారం.
తర్వాత స్కూల్స్ ప్రారంభం కావడంతో బాలిక తిరిగి వసతిగృహానికి వెళ్లింది. అక్కడ జరిగిన చిన్న ప్రమాదంలో గాయపడటంతో చికిత్స కోసం మళ్లీ అమ్మమ్మ ఇంటికి చేరింది. ఈ సమయంలో ఆమె పరిస్థితి గమనించిన కుటుంబ సభ్యులు విషయాన్ని తెలుసుకుని పోలీసులకు సమాచారం అందించారు.
సమాచారం అందుకున్న పోలీసులు వెంటనే చర్యలు తీసుకుని నిందితుల్లో ఒకరిని అదుపులోకి తీసుకున్నారు. మిగిలిన ఇద్దరు పరారీలో ఉండగా, వారిని పట్టుకునేందుకు గాలింపు చర్యలు కొనసాగుతున్నాయి.
ఈ ఘటనపై కేసు నమోదు చేసి, బాలికకు అవసరమైన వైద్య, మానసిక సహాయం అందిస్తున్నట్లు పోలీసులు తెలిపారు.