బెంగళూరులో మరోసారి మహిళ భద్రతపై ఆందోళన కలిగించే దారుణ ఘటన వెలుగులోకి వచ్చింది. తన ప్రేమ ప్రతిపాదనను తిరస్కరించిందనే కారణంతో ఓ వ్యక్తి నడిరోడ్డుపై మహిళపై లైంగిక వేధింపులకు పాల్పడిన ఘటన నగరాన్ని కలచివేసింది. డిసెంబర్ 22న మధ్యాహ్నం 3 గంటల 20 నిమిషాల సమయంలో జ్ఞానభారతి పోలీస్ స్టేషన్ పరిధిలోని ఉల్లాల్ మెయిన్ రోడ్డులో, జ్ఞానజ్యోతి నగర్ సమీపంలోని ఓ ప్రైవేట్ పీజీ ఎదుట ఈ ఘటన జరిగింది. రద్దీ ప్రాంతంలోనే ఈ ఘాతుకానికి పాల్పడటం కలకలం రేపింది.
ಖಾಸಗಿ ಪಿಜಿ ಬಳಿ ಪ್ರೇಮ ಪ್ರಸ್ತಾಪ ತಿರಸ್ಕರಿಸಿದ ಮಹಿಳೆಗೆ ಹಾಡಹಗಲೇ ಹಲ್ಲೆ, ಲೈಂಗಿಕ ಕಿರುಕುಳ; ವೀಡಿಯೊ ವೈರಲ್#bengaluru #case #newskarnataka pic.twitter.com/ot20CPykqn
— News Karnataka (@Newskarnataka) December 25, 2025
పోలీసులు తెలిపిన వివరాల ప్రకారం.. నవీన్ కుమార్ అనే వ్యక్తి కారులో అక్కడికి వచ్చి మహిళను వేధించడం ప్రారంభించాడు. మహిళ ప్రతిఘటించి కేకలు వేస్తున్నప్పటికీ అతడు వెనక్కి తగ్గలేదు. ఆమెను అనుచితంగా తాకడం, బట్టలు లాగడం, చింపేందుకు ప్రయత్నించడం ద్వారా భయాందోళనలకు గురి చేశాడు. ఘటనకు సంబంధించిన వీడియోలో మహిళ తలపై కొట్టిన దృశ్యాలు కూడా కనిపించడం తీవ్ర ఆగ్రహానికి కారణమయ్యాయి. చుట్టుపక్కల వారు జోక్యం చేసుకునేలోపే నిందితుడు అక్కడి నుంచి పారిపోయినట్లు తెలుస్తోంది.
ఈ ఘటనపై బాధిత మహిళ పోలీసులకు ఫిర్యాదు చేస్తూ కీలక విషయాలను వెల్లడించింది. సెప్టెంబర్ 30, 2024న ఇన్స్టాగ్రామ్ ద్వారా నిందితుడితో తనకు పరిచయం ఏర్పడిందని తెలిపింది. మొదట స్నేహంగా మొదలైన పరిచయం క్రమంగా వేధింపులుగా మారిందని ఆరోపించింది. తన ప్రేమ ప్రతిపాదనను అంగీకరించాలంటూ నిందితుడు ఆమెపై ఒత్తిడి తెచ్చాడని, తిరస్కరించడంతోనే బెదిరింపులు మొదలయ్యాయని పేర్కొంది.
తాను టెలికాలర్ ఉద్యోగాన్ని వదిలి ప్రైవేట్ పీజీకి మారినప్పటికీ నిందితుడు తనను వెంటాడుతూనే ఉన్నాడని బాధితురాలు తెలిపింది. తరచూ పీజీ సమీపంలో కనిపిస్తూ భయపెట్టే ప్రయత్నం చేశాడని ఫిర్యాదులో పేర్కొంది. చివరకు ఈ వేధింపులు నడిరోడ్డుపై లైంగిక దాడి వరకు చేరాయని ఆమె ఆవేదన వ్యక్తం చేసింది. ఈ ఘటన తనకు తీవ్ర మానసిక క్షోభను కలిగించిందని పేర్కొంది.
బాధితురాలి ఫిర్యాదు ఆధారంగా జ్ఞానభారతి పోలీసులు కేసు నమోదు చేశారు. నిందితుడిపై లైంగిక వేధింపులు, బెదిరింపులు, మహిళ గౌరవానికి భంగం కలిగించిన అభియోగాలతో ఎఫ్ఐఆర్ నమోదు చేసినట్లు తెలిపారు. ప్రత్యేక బృందాలను ఏర్పాటు చేసి నిందితుడిని గుర్తించి అరెస్టు చేసేందుకు గాలింపు చర్యలు ముమ్మరం చేశారు. సీసీటీవీ ఫుటేజ్లు, వీడియో ఆధారాలను సేకరిస్తున్నట్లు పోలీసులు వెల్లడించారు.
ఈ ఘటన బెంగళూరులో మహిళల భద్రతపై మరోసారి ప్రశ్నలు లేవనెత్తుతోంది. సోషల్ మీడియా ద్వారా ఏర్పడుతున్న పరిచయాలు ఎలా ప్రమాదకరంగా మారుతున్నాయో ఈ ఘటన స్పష్టంగా చూపిస్తోంది. ప్రేమ పేరుతో జరుగుతున్న వేధింపులు, నిరాకరణను అంగీకరించని మానసికత సమాజంలో పెరుగుతున్న ఆందోళనకర ధోరణిగా మారిందని పలువురు అభిప్రాయపడుతున్నారు.
నగరంలో మహిళలపై జరుగుతున్న ఇలాంటి ఘటనలను కట్టడి చేయాలంటే కఠిన చర్యలు అవసరమని పలువురు కోరుతున్నారు. నిందితులకు కఠిన శిక్షలు పడితేనే ఇలాంటి ఘటనలకు అడ్డుకట్ట పడుతుందని, మహిళలు భయంలేకుండా జీవించే వాతావరణం ఏర్పడుతుందని అభిప్రాయాలు వ్యక్తమవుతున్నాయి. ఈ కేసులో పోలీసులు వేగంగా చర్యలు తీసుకుని నిందితుడిని అరెస్టు చేయాలని మహిళా సంఘాలు డిమాండ్ చేస్తున్నాయి.
ఈ ఘటన నేపథ్యంలో మహిళలు అప్రమత్తంగా ఉండాలని, సోషల్ మీడియా పరిచయాల్లో జాగ్రత్తలు పాటించాలని పోలీసులు సూచిస్తున్నారు. అదే సమయంలో, మహిళల భద్రతకు భంగం కలిగించే వారిపై చట్టం ఎంత కఠినంగా ఉంటుందో ఈ కేసు ద్వారా నిరూపిస్తామని పోలీసులు స్పష్టం చేశారు.
ALSO READ: ‘లే నాన్న.. అన్నం తినిపిస్తా’.. కన్నీళ్లు పెట్టిస్తున్న VIDEO